¹ Ho gnany mpipaiky hira;" atao ami-gny " Gadony gny Diera." Salamo nataon'i Nagnino lavitsy loatsy amign'ny fandomba ahy iha ndraiky lavitsy ami-gny safa fagniriako? ² Ndranagnahary o, nitaray taminao aho tsy ho atoandro, fe tsy nivinalianao, ndraiky haly la tsy nantsitsigny aho! ³ Kanefa masy iha, mifitaky manahaky gny mpanjaka ami-gny fandrengean'ny Israely iha. ⁴ Natoky anao gny razambenay, natoky anao rozy, ka nilombanao. ⁵ Nitaray rozy taminao ka nilomba. Natoky anao rozy ka tsy diso fagnantena. ⁶ Nefa hanka aho fa tsy raha mba olo, fahafaham-baraka ho gnan'olombelo voho nataony gny tsisy dikany. ⁷ Ze mahitaky ahy aby la mivola raty ahy; aratin-drozy aho; voho ahifikin-drozy gny lohako. ⁸ Hoy rozy hoe " Matoky an'i Yaveh ie; aleo Yaveh hagnavotsy azy. Engao ie hagnavotsy azy, fa ankasitrahany ie." ⁹ Fa iha ro handay ahy baka ami-gny fokonolo ao, nataonao matoky anao aho fe tan-tratran-dreniko. ¹⁰ Na anky taminao aho liany bakan-troky gny ; Iha ro Ndranagnahariko liany zaho mbo tan-trokin-dreniko! ¹¹ Ka mihalavitsy ahy, fa marikitsy gny alahelo; tsy misy gn'olo handomba ahy. ¹² Magnodidy ahy gn'aombilahy maro, magnodidy ahy gnaomby lahy masiakin'ny Basana. ¹³ Hampitagnatagna gny vavany amiko manahaky gny liona miero mandrapaky gny hazany. ¹⁴ Nagnaraky manahaky gny rano aho, sady nipitsoky gny taolako iaby. ¹⁵ Maiky manahaky gny valagny tany gny heriko; mipitiky ami-gny lagnilagniko gny lelako. Nampiroro ahy tami-gny lembokiny gny fahafateza iha. ¹⁶ Fa nagnodidy ahy gn'alika; sady fa magnodidy ahy tariky gny raty; nilinjan-drozy gny tagnako vaho gny tomboko. ¹⁷ Azoko isahy gny taolako iaby. Magnety voho mametsivetsy rozy iaby. ¹⁸ Nifampizaran-drozy gny sikiko; nilokan-drozy gny akanjoko. ¹⁹ Ka magnalavitsy ahy iha Yaveh; malaky hagnavotsy ahy, heriko! ²⁰ Avoto ami-gny sabatsy gny fagnahiko, marary gnaiko ami-gny rangotsy gn'amboadia. ²¹ Lombao ami-gny vavany gny liona aho; avoto ami-gny tsifany aomby ly aho ²² Hagnambara gnagnaranao ami-gny rahalahiko reo aho; agnivony gny fiangona ro handrengeako anao. ²³ Ka nareo mavaka an'i Yaveh, mandrengea Azy! Nareo taranak'i Jakoba iaby magnomeza voninahitsy Azy1 Mivahara ami-gny fitalanjoa Aminy, nareo taranak'Israely iaby. ²⁴ Fa tsy nagnamavo na nangaroharo Azy gny fijaleany gn'olo mampalahelo, tsy magnetaky gny tarehiny taminy Yaveh; lafa nitaray taminy gn'olo mampalahelo, ka nahanjanjy ie. ²⁵ Gny fandrengeako la noho iha ami-gny fiangona bavata; hagnatanteraky gny voadiko agnatrehany gny mavaka Azy aho. ²⁶ Gny mampalahelo hihina ka la ho afa-po; ze mila an'i Yaveh la handrengy Azy. ²⁷ Gny fonareo ho velo mandrakizay. Hahatiaro ndraiky himpoly amin'i Yaveh gny olony gny tany iaby, ka hanongaliky agnatrehanao gny mpilongo iaby ami-gny firenena marobe. ²⁸ Fa gnan'i Yaveh gny fanjaka; Ie ro mpanapaka reo firenena. ²⁹ Gny olo mpagnarivo iaby la hifalifaly sady handrengy; hiankohoky eo agnatrehanao reo iaby zay hanjary vovoky, reo zay tsy afaky miaro gny ain-drozy. ³⁰ Hanompo Azy gny taranaky ho avy, rozy gny hagnambara taranaky mandimby ami-gny Tompo. ³¹ Ho avy rozy voho hagnambara gny maha to an-drozy; hagnambara gny raha fa nataony amign'olo mbo tsy teraky rozy!