¹ Gny lagnitsy magnambara gny voninahinagnahary, la gny habakabaky mampahafantatsy gnasany tagnany! ² San'andro san'andro la nifororotsy gny sefa, isaky matognaly la magnambara gny fahaiza raha zay. ³ Tsy misy kabary na safa voa vehatsy; tsy janjy gny feon-drozy. ⁴ Kanefa gny safan-drozy miboaky; tsy ami-gny tany iaby, maneran-tany iaby gny vesadresany, fa nampitsanga lay ho ami-masoandro tamin-drozy ie. ⁵ Gny masondro la manahaky gny mpagnahatsy miboaky baha-gnefitragnony vo manahaky gny lelahy fatratsy la faly lafa manao gny filaisany. ⁶ Mipisaky bakagny gni-fara-vodilagnitsy raiky gny masoandro la mitety gny habakabaky ho agny ami-raiky hafa; tsy misy afaky lomay gny hafanany. ⁷ Soa vatany gny lalan'i Yaveh, mampireny gny fagnahy azo, antoky gny safa vavolombelon'i Yaveh maha-hendry gny hatsotra. ⁸ Mahitsy gny fampianaran'i Yaveh; mampazotozoto gny fo; malio gny lilin'i Yaveh, manday fahazava ho gnan'ny maso. ⁹ Malio gny fatahora an'i Yaveh, maharitsy mandrakizay, to sady mahity iaby gny lily ton'i Yaveh! ¹⁰ Misy lanjany nihoatsy noho ny gny volamena zany, eka mandilatsy gny volamena tena soa aza ka; mamy noho ny gny tantely miraradraraky baka ami-tragno tantely zany. ¹¹ Eka, ami-gnalalan'izay ro hampitandrema gny mpanomponao; fa hisy valisoa bevata ami-fangnekea zany. ¹² Ia ro afaky mamotopototsy gny fahadisoany iaby? Liovo ami-reo heloky mietaky zaho. ¹³ La hehy gny mpanomponao ami-gnota mahasahisahy; ka enga hanapaky gnahy reo. La ho soa vatany zaho, ro sady tsy hanan-keloky ami-gny tsy fagnaraha lily maro. ¹⁴ Ho ehe eo agnilanao anie gny safan'ny vavako voho gny fihevitsy voho gny foko, vy Yaveh, vatolampiko voho mpagnafaky gnahy.