¹ Bakeo Ie nivola fanohara tamin-drozy reo gny mikasiky gny tokony hivavahan-drozy, sady tsy ho kivy, ² nivola hoe: " Tao amin'ny tana raiky la nisy mpitsara zay tsy natahotsy an-Dranagnahary sady tsy nanaja olo. ³ Sady nisy mpitondra-tena raiky tao amin'io tana io, sady ie nagnagny amin'ny matetiky, nivola hoe: ' Ampio aho mba hahazoako rariny manoloa gny fahavaoloko.' ⁴ Fa hatry ny ela ie ro tsy vonona gny hagnampy gnazy, fa tafara kelin'izay la nivola tamin'ny vatany ie hoe: ' Na la tsy matahotsy an-Dranagnahary aza aho na tsy manaja olo, ⁵ fa koa fotony manahira gnahy toy mpitondra-tena toy, la hagnampy gnazy aho mba hahazoany rariny, mba tsy handreraky gnahy nohon'ny fivezivezeny lava atoy sasy ie."' ⁶ Bakeo nivola gny Tompo hoe: " Njanjigno zay ambaran'ny mpitsara tsy to. ⁷ Sady tsy hitondra rariny ho an'izay voafiliny zay mikaiky mafy Gnazy andro aman'aly koa va Ndranagnahary? Hangatak'andro lava amin-drozy va ie? ⁸ Ambarako agnaminareo fa handay rariny malaky amin-drozy ie. Manahaky izay koa, lafa avy gny Anak'Olo, hahajry finoa etoy an-tany tokoa va Ie?" ⁹ Bakeo koa Ie nivola zao fanohara zao tamin'ny sasany zay nahatoky gny vatan-drozy fa hoe to voho zay manevateva reo olo hafa: ¹⁰ " Nisy roe lahy niakatsy tao an-tempoly mba hivavaky _ gny raiky la Fariseo sady gny raiky hafa la mpamory hetra." ¹¹ Gny fariseo nitsanga sady nivavaky reto raha mikasin'ny vatany reto hoe: ' Ndranagnahary o, misaotsa Gnanao aho fa tsy mitovy amin'ny olo hafa _ mpangalatsy, olo tsy to, mpijangajanga - na manahaky toy mpamory hetra toy aza. ¹² Mifaly hany indreo isan-kerindro aho. Magnome gny ampahafolon'izay azoko iaby aho.' ¹³ Fa gny mpamory hetra, nitsanga tegny lavitsy, tsy nety nanandratsy gny fijeriny tegny amin'ny lagnitsy akory, fa niteha-tratra, nivola hoe: ' Ndranagnahary o, mamindra fo amiko, mpanota.' Mivola agnaminareo Aho, io ljohary io la nimpoly nizotso tagny an-tragnony voamarina noho gny raiky, fotony zay iaby manandra-tena la hahetry, fa zay iaby manetri-tena ro hasandratsa." ¹⁵ Gny olo koa la nanday gny anany kelikely teo Aminy, mba hikasihany gnan-drozy fa lafa nahajery izay reo mpianatsy, la nivola mare gnan-drozy. ¹⁶ Fa Jesosy nikaiky gnan-drozy hamonjy Gnazy, nivola hoe: " Engao gny aja hamonjy Gnahy, sady ka rara rozy. Fa gny manahaky gnan-drozy gny fanjakan-Dranagnahary. ¹⁷ Ambarako to agnaminareo, na ia na ia tsy handray gny fanjakan-Dranagnahary manahaky gny aja la tsy hilitsy ao amin'izay mihintsy." ¹⁸ Sady nisy mpanapaky raiky nagnontany Gnazy, nanao ro tsy maintsy hataoko mba handovako gny fiaigna mandrakizay?" ¹⁹ Jesosy nivola taminy hoe: " Nagnino Aho ro kaihinao hoe soa? Tsy misy olo soa, afa-tsy Ndranagnahary regny avao. ²⁰ Hainao reo didy _ ka mijangajanga, ka mamono olo, ka mangalatsy, ka mijoro vavolombelo mavandy, manja gny babanao voho gny reninao." ²¹ Nivola gny mpanapaky hoe: '' Izay iaby izay la fa nankatoaviko hatry gny fony zaho tanora." ²² Lafa nahajanjy izay Jesosy, la nivola tagnaminy hoe: " raha raiky ro tsy ampy agnaminao. Tsy maintsy mivarotsy zay iaby anagnanao iha sady mizara izay amin'ny mahantra, sady hana hanagna agny an-dagnitsy iha _ sady avia, magnaraha Gnahy." ²³ Fa lafa nahajanjy reo raha reo gny mpanapaky, la nanjary nalahelo mare, fa nanan-kanagna maro ie. ²⁴ Sady Jesosy, nahajery gnazy, nanjary nalahelo mafy [ Fanamariha: Reo manam-pahaiza la misaraky hevitsy laha tokony ho ampiliry eto gny teny hoe: [ Ie] la nanjary nalahelo mafy. Ampitahao gny And 23] sady nivola hoe: " Manao akory gny fahasarotan'ny filira ao amin'ny fanjakan-Dranagnahary ho gnan'ireo zay mpanan-kanagna! ²⁵ Fa moramora kokoa ho gnan'ny rameva gny hilitsy amin'ny volim-jaitsy, nohon'ny hiliran'ny olo mpanan-kanagna raiky ao amin'ny fanjakan-Dranagnahary." ²⁶ Reo zay nahanjanjy izay la nivola hoe: " Ia ary ro afaky ho voanjea? " ²⁷ Jesosy namaly hoe: " Reo raha zay tsy hain'olo la hain-Dranagnahary." ²⁸ Petera nivola hoe: " Ingo, nagnenga gny raha iaby zay gnanay rahay sady nanaraky Gnanao." ²⁹ Sady Jesosy nivola tamin-drozy hoe: " Ambarako marina agnaminareo, fa tsy misy olo zay nahafoy tragno, na valy, na rahalahy, na ray aman-dreny, na anaky, nohon'ny fanjakan-Dranagnahary, ³⁰ izay tsy hahazo bebe kokoa amin'ny toy zao tontolo zao toy sady amin'ny andro ho avy la fiaigna mandrakizay. ³¹ Lafa avy nanango gny roe ambin'ny folo lahy teo Aminy Ie, la hoy ie tamin-drozy hoe: " Ingo, miakatsy ho agny Jerosalema tsika, ka reo raha iaby zay voasorats'ireo mpaminany mikasikin'ny Anak'Olo la ho tanteraky. ³² Fa hatolotsy eo amin'ireo Jentelisa Ie, ka hihomeheza, voho hala baraky, sady ho rorana. ³³ Afaran'ny hikapoha Gnazy, la ho vonoin-drozy Ie sady amin'ny andro fahatelo la hitsanga ndraiky Ie." ³⁴ Tsy nahatakatsy ndra ino ndra ino tamin'ireo raha reo rozy, voho navony an-drozy zay safa zay,voho tsy azon-drozy gny raha ze voaresaky. ³⁵ Sady laha nagnarikitsy gnan'i Jeriko i Jesosy,la nisy johary jiky raiky nifitaky tan-tsisin-dala teo nangataky, ³⁶ ka laha nahare gny vahoaky nandalo,la nanontany gny raha niseho ie. ³⁷ Nivola tagnaminy rozy hoe nandalo teo Jesosy baka Nazareta. ³⁸ Ka nikaikymare johary jiky iny nanao hoe:"Jesosy,anakin'i Davida,mamindra fo agnamiko". ³⁹ Fa ze nandeha aloha la nivola mare gnan'ny johary jiky iny,ka nivola gnazy mba hiegny tsy hivola.Fa ie la vo maiky nikaikaiky mare hoe:"Gnanakin'i Davida,mamindra fo amiko." ⁴⁰ Jesosy nijano voho nibaiko gny mba hagnandesa johary jiky igny ho agnamin'eo.La nagnontany azy Jesosy manao hoe: ⁴¹ "Ino ro teanao hataoko anao?"Nivola ie hoe:"Tompo, ta-hahita zaho." ⁴² Jesosy nivola tagnaminy hoe:"Mahirata.Gny finoanao ro nahanjanga gnanao." ⁴³ La nahita teo noho eo ie voho nagnaraky Gnazy,nagnome voninahitsy gnan-Dranagnahary.Gn'olo iaby,lafa nahita gnan'izay,la nanolotsy fandrengea ho gnan-Dranagnahary.