¹ Tamin'izay andro izay, nisy olo sasany teo nivola tagnaminy gny mikasiky reo Galiliana zay gny lion-drozy reo ro nafangarin'i Pilato tamin'ny sorony manoka. ² Namaly Jesosy sady nivola tamin-drozy hoe: " Nareo va mieritreritsy fa reo Galiliana reo la mpanota mihoatsy noho reo Galiliana hafa iaby fotony nijaly manahaky izay? ³ Tsia, Zaho mivola gnanareo. Fa laha tsy mibebaky nareo, nareo iaby la ho maty manahaky izay. ⁴ Na regny olo valo ambin'ny folo tao Siloama zay nitontan'ny tilikambo ka nahafaty gnan-drozy , mieritreritsy va nareo fa tena mpanonta raty mihoatsy noho reo johary hafa tao Jerosalema regny? ⁵ Tsia, hoy Aho. Fa nareo laha tsy mibebaky, nareo iaby avao koa la ho maty." ⁶ Jesosy nanao zao fanohara zao hoe: " Nisy olo nana hazon'aviavy raiky namboleny teo amin'ny tanim-boalobony sady avy ie voho nagnenty voankazo teo aminy nefa tsy nahita na ino na ino. ⁷ Gny johary la nivola tamin'ny mpanao zariday hoe: ' Ingo teto aho tagnatiny gny telo tao sady niezaky nila tamy toy hazo aviavy toy nefa tsy nahita mihitsy. Tapaho io. Nagnino io ro enga manimba gny tany?' ⁸ Namaly gny mpanao zariday ka nivola hoe: ' Engao ho eo io aloha amy toy tao toy zisiky hihaliako magnodidy gnazy voho hanasiako zeziky eo aminy. ⁹ Laha mamoa ie amin'ny tao magnaraky, soa; fa laha tsy izay, la tapaho ie!"' ¹⁰ Sady Jesosy nampianatsy tao amin'ny raiky tamin'ny Synagoga tagnatiny gny Sabata. ¹¹ Ingo, nisy ampela raiky zay nana gny fagnahy ratin'ny fahalemea tagnatiny gny valo ambin'ny folo tao teo, sady ie la nivokoky voho tsy nahavita nitranga soa. ¹² Nony nahajery gnazy Jesosy, la nikaiky gnazy ka nivola hoe: " Ry vehivavy, afaky amin'ny fahalemenao iha." ¹³ Napetrany teo aminy gny tagnany, sady niaraky tamin'izay la nitraka gny vehivavy sady nihoby an-Dranagnahary. ¹⁴ Nefa gny mpanapaky gny Synagoga la meloky noho gny fanasitrana nataon'i Jesosy tamin'ny Sabata. Noho izay la namaly gny mpanapaky sady nivola tamin'ny vahoaky hoe: " Misy enign'androzay tokony iasa. Miavia ka hitrana, fa kosa tsy amin'ny andro Sabata." ¹⁵ Gny Tompo namaly gnazy ka nivola hoe: " Ry mpiatsaravelatsihy! Moa va tsy samby mamaha gny boriky na gny aombiny ao amin'ny valany nareo ka mitondra izay hino rano amin'ny Sabata? ¹⁶ Sady manahaky izay koa toy anak'ampelan'i Abrahama, zay voafatotr'i Satana tagnatiny gny valo ambin'ny folo tao toy, tsy tokony mba ho vaha va gny fehy amin'ny andro Sabata?" ¹⁷ Sady laha nivola izay raha iaby izay Ie, la megnatsy reo iaby zay nanohitsy Gnazy, fa gny vahoaky raiky manontolo la faly noho reo raha iaby malaza nataony. ¹⁸ Sady Jesosy nivola hoe: " Manao akory gny fanjakan-Dranagnahary, sady manahaky gny ino ro afaky anoharako izay?" ¹⁹ Izay la manahaky gny voatsinampy zay nala voho nafafin'ny johary raiky teo an-jaridainy, ka la najary hazo bevata raiky, sady gny voron'ny lagnitsy la nagnamboatsy gny tragnony teo amin'ireo rantsany." ²⁰ Mbo nivola avao Ie hoe: " Ino ro afaky hampitahako gny fanjakan-Dranagnahary? ²¹ Izay la manahaky gny masirasira zay nalan'ny ampela raiky ka nafangarony tamin'ny koba in-telon'ny famara mandra-piparitahany ao agnatin'ny koba iaby." ²² Jesosy la nandeha nitety gny tana voho gny vohitsy kiraidraiky tegny an-dala magnagny Jerosalema sady nampianatsy gnan-drozy. ²³ Nisy raiky nivola tagnaminy hoe: " Tompo, moa va vitsy gny olo ro ho vonje?" Sady hoy ie tamin-drozy hoe: ²⁴ " Mialia gny hilitsy gny varavara tery nareo, fotony, Zaho mivola agnaminareo, maro ro te-hitsofoky, fa tsy ho afaky gny hilitsy. ²⁵ Lafa injay mitsanga gny tompon-tragno sady manily gny varavara, la hitranga ao amonto eo nareo ka handodo gny varavara sady hivola hoe: ' Tompo, Tompo, ampiliro rahay.' Ie hamaly ka hivola agnaminareo hoe: ' Tsy haiko nareo na gny fiavinareo.' ²⁶ Sady hivola nareo hoe: ' Nihina voho nino teo agnatrehanao rahay, sady Iha fa nampianatsy teny an-dalambenay.' ²⁷ Fa Ie la hamaly hoe: ' Mivola agnaminareo aho, tsy haiko zay fiavianareo. Miala eto agnamiko, nareo mpanao raty!' ²⁸ Hisy fitomania voho fikitroha-nify lafa ingo nareo mahita gnan'i Abrahama, Isaka, Jakoba, voho gny mpaminany iaby ao amin'ny fanjakan-Dranagnahary, nefa voaroaky agny amonta nareo. ²⁹ Rozy la ho avy agny antignana, andrefa, avaratra, sady atimo ka hipetraky eo amin'ny latabatsy gny fanjakan-Dranagnahary. ³⁰ Haiko zao, reo zay tsy la manan-danja ro ho voalohany, sady reo zay tena manan-danja ro ho farany." ³¹ Tafara kelin'izay, nisy Fariseo sasany avy sady nivola taminy hoe: " Mandeha ialao gny eto fotony Heroda la te-hamono Gnanao." ³² Jesosy nivola hoe: " Mandeha sady ambarao izay amboahaolo izay hoe: ' Ingo, zaho mandroaky devoly voho manao fanasitragna henanio voho hamaray, sady amin'ny andro fahatelo la ho tratriko gny tanjoko.' ³³ Na ino na ino mitranga, raha-bevata agnamiko gny manohy henanio, hamaray, voho gny andro magnaraky, fotony tsy azo enke gny famonoa gny mpaminany lavitsy gnan'i Jerosalema. ³⁴ " Ry Jerosalema, ry Jerosalema, zay mamono gny mpaminany voho mitora-bato reo zay nirahy tagny agnaminareo. Impiry aho ro nagniry gny hamory gny anakareo manahaky gny akoho vavy mamory gny anany ambany elany, nefa tsy naniry izay nareo. ³⁵ Ingo, nenga gny tragnonareo. Zaho la mivola agnaminareo, tsy ho hitanareo Aho mandram-pivolagnanareo hoe: " Sambatsy zay avy amin'ny agnaran'ny Tompo."'