¹ Tagny am-boalohany, Ndranagnahary nahary gny lagnitsy voho gny tany. ² Tsy nisy endriky voho tsy nisy raha gny tany. Nandrakotry gny rano laliky gny mahiky. Sady nikarikarioky teo agnabon-gny rano gny fagnahy Ndranagnahary. ³ Hoy Ndranagnahary hoe: " Misia gny mazava", la nisy gny mazava. ⁴ Jeriny Ndranagnahary gny fahazava, sady hitany fa soa zay. La nampihataky gny hazava voho gny mahiky Ie. ⁵ Ndranagnahary nikaiky gny mazava hoe: " Andro", sady nikaiky gny mahiky hoe: " haliky". La nisy hariva voho gny maray, andro volohany zay. ⁶ Hoy Ndranagnahary hoe: " Misia habakabaka eo agnelagnelany gny rano, sady ao zao hagnasaraky gny rano amy gny rano." ⁷ Ndranagnahary nanao gny habakabaky voho nagnasaraky gny rano zay tambanin-gny habakabaky tamy gny rano ze teo agnabon-gny habakabaky. La nisy zay. ⁸ Sady nikahin- Dranagnahary hoe: " Lagnitsy" gny habakabaky. La nisy hariva voho maray, zay gny andro faharoe. ⁹ Hoy Ndranagnahary hoe: " Ao ze rano ambanin-gny lagnitsy hivory amy gny toera raiky, sady ao hiboaky gny tany maiky." La natao zay. ¹⁰ Nikahinin-Dranagnahary hoe: " tany" gny tany maiky, sady gny rano mivory nataony hoe: " riaky". Hitany fa soa zay. ¹¹ Hoy Ndranagnahary hoe: " Ao gny tany hitiry akata-maitso: raha tomiry misy voa sady hazo hamoaky vokatry ze misy voa gny hazo hamoa, isankarazany. " La nisy" ¹² Namokatry akata-maitso gny tany, gny zava-maniry misy voa isan-karazany, sady gny hazo mamokatry voankazo ze ao amy gny voany, isankarazany. La hitan-Dranagnahary fa soa zay. ¹³ La nisy hariva voho maray, gny andro fahatelo. ¹⁴ Hoy Ndranagnahary hoe; " Misia gny mazava eo amy gny lagnitsy mba hagnasaraky gny andro amy gny haly sady ao rozy hanahaky gny famantara, ho gnan-gny vanin'andro, voho gnan'ireo andro sady reo taona. ¹⁵ Ao reo ho mazava eo amy gny lagnitsy mba hagnome hazava egny amy gny tany. ' La nisy " ¹⁶ Ndranagnahary nanao reo hazava roa bevata, la hazava bevata vatany mba hagnamariky gny andro, sady gny hazava kelikely vatany mba hagnamariky gny haly. Nanao gny kinta koa Ie. ¹⁷ Nandefa safa amy gny lagnitsy Ndranagnahary mba hagnome hazava gny tany, ¹⁸ mba hanapaky gny andro voho gny haly, sady mba hagnasaraky gny hazava amy gny hiky. Jery Ndranagnahary fa soa. ¹⁹ La nisy hariva voho maray, gny andro faha efatry. ²⁰ Hoy Ndranagnahary hoe: " Ao ho feno zava-managnay maro samby karazany gny rano, sady koa gny voro koa hitily agnabon-gny tany egny amy gny habakabaky gny lagnitsy." ²¹ Ndranagnahary namoro reo bibin-driaky bevata, sady reo karazandraha managnay iaby, reo zava managnay mihetsiky voho ze mameno gny rano iaby, sady reo karazany voro managnelatsy iaby. Jery Ndranagnahary fa soa. ²² Nitso-drano an-drozy Ndranagnahary, nanao hoe: " Miteraha maro sady mihamaroa, ka mamenoa gny rano ao amin-gny riaky. Aoka hihamaro egny agnabonin-gny tany reo vorona". ²³ La nisy hariva voho maray, gny andro fahaliny. ²⁴ Hoy Ndranagnahary hoe: " Ao gny tany hamokatry zava-managnay, isankarazany, reo biby fiompy, zava-mandady, voho bibi-diany gny tany, isankarazany." La nisy." ²⁵ Nataon-Dranagnahary isan-karazany iaby reo bibi-diany gny tany reo biby fiompy isan-karazany, sady reo raha iaby zay mikisaky amy gny tany isan-karazany. Jeriny fa soa. ²⁶ Hoy Ndranagnahary hoe; " Andeha tsika hamoro olo amy gny endrikitsika, manahaky antsika. Ao rozy hanjaka eo amin'ireo hazan-driaky, eo amin'ireo vorony gny lagnitsy, eo amin'ireo biby fiompy, manera gny tany iaby, sady eo amin'ireo raha mikisaky iaby ze mandaly egny agnabony gny tany. ²⁷ " Ndranagnahary namoro gn'olo mitovy agnaminy. Tamy gny endriny ro namorognany gnazy. Lahy voho ampela ro namorognany an-drozy. ²⁸ Nitso-drano an-drozy Ndranagnahary ka nisafa tamin-drozy hoe; " Miteraha maro, sady mihamaroa. Mamenoa gny tany, sady manjaka. Managna fanjaka eo amin'ireo hazan-driaky, eo amireo voron-gny habakabaky, sady eo amireo zava-managnay iaby ze mihetsiky egny agnabon-gny tany." ²⁹ Hoy Ndranagnahary hoe: " Ingo, fa nameako anareo gny zava-maitso iaby mamoa voa ze eto agnabony gny tany iaby, sady gny hazo iaby ze mamokatry voa ao aminy. Ho haninareo regny. ³⁰ Ho gnan-gny bibi-diany gny tany, ho gnan'ireo voron-gny habakabaky, voho gnan'ireo raha iaby ze mikisaky amy gny tany, sady ho gnan'ireo zava-managnay ze maro gnay eto an-tany ro nagnomezako gny zava-maintso iaby ho fihany". La nisy . ³¹ Jeri-Ndranagnahary reo raha iaby ze nataony. Ingo, tena soa. La nisy hariva voho maray, gny andro faheny.