¹ Sady Petera voho i Jaona niakatsy tegny amy gny tempoly tamy gny orany gny fivavaha, gny ora faha sivy. ² Sady nisy johary raiky nalemy fa hatragny am-piteraha nandesiny isan'andro tegny amy gny Vavahady soa endriky gny tragnon-Dranagnahary, mba hangataky fanomeza ara-bola agny agnamin'ireo olo zay magnegny amy gny tranon-Dranagnahary. ³ Lafa nahajery gnan'i Petera voho i Jaona zay handeha hilitsy gny tempoly, la nangataky fanomeza ara-bola tamin-drozy. ⁴ Nandiniky gny fijeriny niaraky tagnamin'i Jaona i Petera la nivola hoe he: " Henteo zahay". ⁵ Gny johary malemy nijery gnazy reo, nanantena gny handray raha bakagny amin-drozy. ⁶ Nefa i Petera nivola hoe he: " Volafoty voho volamena ro tsy agnanarako, nefa zay agnarako, ro homeko gnanao. Amy gny agnaran'i Jesosy Kristy Bakagny Nazareta, mandeha." ⁷ Nandramby gnazy tamy gny tagnany ankavana, i Petera nananga gnazy, sady lavy hatrany la nandrary natanjaky gny tombokiny gny johary voho gny kitrokeliny. ⁸ Nitsamboko, gny johary malemy la nitsanga ka nanomboky nandeha; sady niaraky nilitsy tamin'i Petera voho i Jaona tao am-piangona ie, nandeha, nitsamboko, voho nandrengy an-Dranagnahary. ⁹ Gny olo iaby la nahajery gnazy nandeha voho nandrengy an-Dranagnahary. ¹⁰ Hain-drozy fa ie gny johary nangataky fanomeza ara-bola tamin'ireo olo teo amy gny Vavahady soany gny fiangona; sady tena gaga voho treriky rozy noho gny raha nitranga tagnaminy. ¹¹ Sady noho ie nitandraky gnan'i Petera voho Jaona, gny olo iaby la nandeha nagnegny amin-drozy tegny amy gny fialofa zay nikaihy hoe he fialofan'i Solomona gny olo iaby, sady tena treriky. ¹² Lafa nahajery zay i Petera la namaly gny olo hoe he: " Nareo ry vahoakan'Israely, nagnino ro treriky nareo? Nagnino gny fijerinareo ro mandiniky gnanay, manahaky goe herinay na fahamasignanay manoka ro nampandeha gnazy? ¹³ Gny Ndranagnahariny Abrahama, voho gnan'Isaka, voho gnan'i Jakoba, gny Ndranagnaharinareo babantsika, nagnome voninahitsy gnan'i Jesosy mpanompony. Ie gny natolotrareo voho nolavinareo teo agnatrehan'i Pilato, tamin'ie nanapa-kevitsy gny handefa gnazy. ¹⁴ Nolavinareo Gny raiky zay Masy voho to sady naleonareo nangataky gny mpamono olo mba ho alefa ho gnanareo. ¹⁵ Nivinononareo gny Mpanory gny fiaigna, zay natsangan-Dranagnahary tamy gny maty_sady vavolombelon'izay rahay. ¹⁶ Henanizao, noho gny finoa amy gny agnarany_gny johary zay jerinareo voho hainareo_igny agnara igny avao ro nahavy gnazy hahery. Gny finoa baka agnamin'i Jesosy ro nagnome zao fahasitragna feno zao ho gnazy teo agnatrehanareo iaby. ¹⁷ Henanizao, ry rahalahy, haiko fa nanao zay nareo noho gny tsy fahaianareo, manahaky gny nataon'ireo mpitondra gnanareo avao koa. ¹⁸ Fa reo raha zay voalan-Dranagnahary mialoha tamy gny tsihovin'ireo mpaminany iaby, hoe he tokony hijaly gny Kristiny, fa tanteraky henanizao. ¹⁹ Mibebaha, noho zay, sady mimpolia, mba ho voavono gny fahotanareo, mba ho avy gny fotoa mahavelombelo eo agnatrehany gny Tompo; ²⁰ sady mba handefa gnany Kristy zay voatendry ho gnanao ie, la i Jesosy. ²¹ Ie gny tsy maintsy ho raisiny gny Lagnitsy ambara-pahaviny gny ora fameregna amy gny pilasiny gny raha iaby, mikasiky zay nambaran-Dranagnahary taloha tamy gny tsihovin'ireo mpaminany masy. ²² Nivola vatany i Mosesy hoe he: ' Gny Tompo Ndranagnahary la hananga mpaminany manahaky gnahy aby agnamin'ireo rahalahinareo. Nareo hijanjy gny raha iaby zay ho ambarany agnaminareo. ²³ Hitranga gny hoe zay olo iaby tsy minjanjy zay mpaminany zay la ho rava tanteraky tsy ho ao agnamin'olo.' ²⁴ Eny, sady reo mpaminany iaby nanomboky teo agnamin'i Samoela voho reo zay avy tafarany, la nivola mare voho nagnambara reo andro reo. ²⁵ Nareo ro gnanak'ireo mpaminany voho gny fagnekea zay nataon-Dranagnahary tamin'ireo razambe, araky gny nambarany tagnamin'i Abrahama hoe he: ' Ao amy gny avorohotanao la ho tahy reo fianakavia iaby eran-tany'. ²⁶ Tafarany gny nananganan-Dranagnahary gny mpanompony, la nandefa gnazy ho gnanareo aloha ie, mba hitahy gnanareo amy gny fialanareo amy gny faharatianareo."