¹ Sady tao afaran'ireo raha reo Paoly la niala tao Atena sady nagnagny Korinto. ² Nihaona tamina Jiosy nikaiky hoe Akoila tao ie, tera-tany Ponto, zay vo avy bakagny Italia niaraky tamin'i Prisla valiny, fotony i Klaodio nandidy gny Jiosy iaby hiala tao Roma. Paoly nagneo amin-drozy, ³ sady fotony varotsy mitovy avao ro hiasany, la niara-nipetraky tamin-drozy ie sady niasa, fa gny manao lay ro asan-drozy. ⁴ Ka nialy hevitsy tao amin'ny synagoga isaky gny Sabata i Paoly. Nandresy lahatsy reo Jiosy voho Grika ie. ⁵ Fa lafa nizotso avy tagny Makedonia i Silasy voho Timoty, la niteren'ny Fagnahy hagnambara amin'ireo Jiosy fa Jesosy ro Kristy i Paoly . ⁶ Lafa nanohitsy voho nanesoeso an-drozy Jiosy, la nanofaofa gny lambany tany amin-drozy i Paoly ka nanao hoe: " Ho eo amin'ny loholonareo anie gny lionareo; tsy manan-tsiny zaho. Fa manomboky zao la ho agny amin'ny Jentilisa aho." ⁷ La niala teo ie bakeo sady nandeha nagnagny an-tragnon'i Timosy Josto, johary zay manompo gnan-Dranagnahary. Gny tragnony la marikitsin'ny Synagoga. ⁸ Krispo, mpitarika gny synagoga, nino gny Tompo, niaraky tamin'ireo iaby ze nipetraky tao amin'ny tragnony; sady maro tamin'ireo Korintiana zay nahaja mikasiky izay ro nino voho natao batisa ⁹ Gny Tompo nivola tamin'i Paoly tamin'ny fahita gny haliky hoe: " Ka matahotsy, sady ka mitsy fa mivolagna. ¹⁰ Fa Zaho miaro gnanao, sady tsy hisy olo hahazo hanao raty gnanao, fa mana olo maro amy toy tana toy Zaho." ¹¹ Nipetraky tao herintao voho enim-bola i Paoly sady nampianatsy gny safan-Dranagnahary teo amin-drozy. ¹² Fa lafa najary governoran'ny Akaia i Galio, la niara-nitsanga reo Jiosy hanohitsy gnan'i Paoly ka nanday gnazy teo agnatrehan'ny toeram-pitsara; ¹³ nivola rozy hoe: " Io johary io la mandresy lahatsy gny vahoaky mba hanompo an-Dranagnahary zay mifanohitsy amin'ny lalagna." ¹⁴ Sady laha handeha hivola Paoly, la nivola tamin'ny Jiosy i Galio hoe: " Nareo Jiosy, laha ohatsy ka resaky raha-raty na heloky izay, la mbo azo eretrerety gny fifampiraharaha agnaminareo." ¹⁵ Fa nanomboky nisian'ireo fanontania mikasiky reo safa voho agnara sady lalanareo manoka reo, alaminonareo izay. Zaho tsy magniry gny ho mpitsara izay raharaha izay." ¹⁶ Galio nangalaky gnan-drozy teo amin'ny sezam-pitsara. ¹⁷ Ka nisambotsy gnan'i Sostena rozy iaby, gny mpanampaky gny synagoga, sady namango gnazy teo agnatrehan'ny toeram-pitsara. Fa Galio tsy niraharaha zay nataon-drozy. ¹⁸ Paoly, lafa baka nipetraky tao tagnatiny gny andro maromaro, la nagnenga reo rahalahy ka nindra an-tsambo ho agny Syria niaraky tamin'i Prisila voho Akolia. Talohan'ny nialany teo amin'ny seranan-tsambo la nihetezany tao Kenkrea gny volony noho gny voady zay nataony. ¹⁹ Lafa avy tagny Efesosy rozy, la nengan'i Paoly teo i Prisila voho Akoila, fa ie vatany nilitsy tao amin'ny synagoga ka nialy hevitsy tamin'ireo Jiosy. ²⁰ Lafa nangataky gnan'i Paoly mba hijano elaela rozy, la nanda ie. ²¹ Fa nagnenga gnan-drozy ie, nivola hoe: " Mbo himpoly atoy aho laha sitrapon-Dranagnahary izay." La niondra an-tsambo niala tao Efesosy ie bakeo. ²² Lafa nikaiky tao Kaisaria i Paoly, la niakatsy ie ka niarahaba gny fiangonan'ny Jerosalema sady nizotso nagnagny Antioky bakeo. ²³ Lafa avy nitoetra ora maromaro tao ie, la niainga i Paoly ka nitety reo faritr'i Galatia voho Frygia sady nankahery gny mpianatsy iaby. ²⁴ Sady nisy Jiosy raiky nikaiky hoe Apostoly, teraky tagny Aleksandria, avy tao Efesosy. Ie la nahay nandaha-teny sady nahay soa gny Soratsy Masy. ²⁵ Apostoly la nampianary tamin'ny fampianaran'ny Tompo. Mazoto amin'ny fagnahy, ie nivola voho nampianatsy to reo raha gny batisan'i Jaona avao ro hainy. ²⁶ Apostoly nanomboky nivola am-pahasakia tao amin'ny synagoga. Fa lafa nahajanjy gnazy i Prisila voho Akoila, la nangalaky gnazy ho egny amin'ny sisiny sady nanazava taminy marina mare gny lalan-Dranagnahary. ²⁷ Lafa nagniry mba hamakivaky gnan'i Akaia ie, la nampahery an-drozy rahalahy sady nanoratsy ho gnan'ireo mpianatsy tao Akaia mba handramby gnazy. Lafa avy ie, la nagnampy maro reo zay nino tamin'ny fahasoava. ²⁸ Apolosy nanohitsy mare reo Jiosy tamin'ny aly hevitsy ampahibemaso, nampiseho tamin'ny alalan'ny Soratsy Masy fa Jesosy ro Kristy.