¹ Lafa nahalasa gny lazan'i Solomona gny mpanjaka ampelan'i Sheba, la nandeha nagna Jerosalema ie mba hitsapa gnazy ami-gny fagnontania sarotsy. Nandeha niaraky tami-gny mpanao rodobe lava la lava, ndraiky rameva nampilanja raha magnitsy, volamena maro be, voho vatosoa lafo vily maro ie. Lafa avy tamin'i Solomona tagny ie, la namboarany tagnaminy iaby ze iaby tam-pony ao. ² Nivinalin'i Solomona iaby gny reo fagnontaniany iaby; tsy la nisy sarotsy loatsy ho gnan'i Solomona; tsy nisy fagnontania tsy voavaliny. ³ Lafa hitany gny mpanjaka ampelan'i Sheba gny fahendrean'i Solomona ndraiky gny lapa fa namboariny, ⁴ gny hany tagnabony latababony, gny fipetrakiny reo mpanompony, gn'asany reo mpanompony voho gny fisikinan-drozy, mpanday kapoakiny reo ndraiky gny fisikinany avao koa, voho gny fomba nagnomezany gny fagnatitsy horoa tan-tragnon'i Yaveh tao, la tsy nisy fagnahy sasy tagnaminy ao. ⁵ La hoy ie tami-gny mpanjaka hoe: " To vatany, gny tatitsy reko tami-gny taniko tagny momba gnany reo safanao ndraiky gny fahendrenao. ⁶ Tsy nino gnany ze reko zaho zisiky niaviako teto, voho androany la jeriny gny masoko zay. Tsy antsasany aza ro nivolagny tagnamiko mikasiky gny fahendrenao ndraiky gny hanagnanao! Nahotsao gny laza reko. ⁷ Oho, sambatsy gny vahoakinao, voho sambatsy gny reo mpanomponao ze fa tagnatrehanao avao, fotony mahare gny fahendrenao rozy. ⁸ Isaora anie Yaveh Ndranagnaharinao, faly nandramby gnanao, nametraky gnanao tami-gny seza fiandrianany, mba ho mpanjaka ho gnan'i Yaveh Ndranagnaharinao. Fotony gny Ndranagnaharinao fa nitea gnan'Israely, mbahametraky gnazy reo mandrakizay, la nataony ho mpanjaka teo amin-drozy iha, mba hanovanao gny rariny ndraiky hato!" ⁹ Nameany talenta volamena 120 gny mpanjaka voho raha magnitsy ndraiky vato lafo vily maro. Tsy nisy fatsin-draha-magnitsy maro nohony reo nameany gny mpanjaka ampelan'i Seba ho gnani'i Solomona mbo namea ho gnazy ndraiky. ¹⁰ Reo mpanompon'i Hirama ndraiky gny reo mpanompon'i Solomona, nanday volamena baka Ofira tagny, la nanday hazo almoga ndraiky vato lafovily avao koa. ¹¹ Tami-gny hazo almoga, la nanao dinga ho gnany gny tragnon-Dranagnahary ndraiky gny tragnony gny mpanjaka, voho harpa ndraiky lokanga ho gnany reo mpitendry reo. Mbo tsy nisy hazo manahaky gnany zay ka hita tan-taniny gny Joda tagny aloha. ¹² La namean'i Solomona mpanjaka raha niriny gny mpanjaka ampelan'i Sheba reo, ndra ino ndra ino nangatahany, ho fagnampiny zay fa nandesiny tami-gny mpanjaka. Ka la roso nimpoly ami-gny taniny tagny, ie ndraiky gny reo mpanompony. ¹³ Voho gny lanjambolamena niavy amin'i Solomona tagny tagnany gny herintao la talenta volamena 666, ¹⁴ ankoatsy gny volamena nandesiny reo mpisreasera ndraiky gny reo mpandrato. Reo mpanjakan'i Arabia iaby ndraiky gny reo governora ami-gny firenena tao avao koa la nanday volamena ndraiky volafoty ho gnan'i Solomona. ¹⁵ Namboatsy apinga volamena voafantina bevata roanjato i Solomona mpanjaka. Sekely volamena enin-jato namea ho gnany gny kiraidraiky. ¹⁶ Namboatsy apinga volamena voafantina telonjato avao koa ie. Mina volamena telo ro nanarogno gny apinga kiraidraiky; nenga gny mpanjaka ami-gny Lapany gny Alan'i Libanona tao reo. ¹⁷ Bakeo gny mpanjaka nagnamboatsy seza fiandriana ivoara bevata voho mipetrahany takelam-bolamena la vatany manify mare zay. ¹⁸ Dinga eny ro nagneo ami-gny seza fiandriana, voho boribory gny afarany gny tampony gny seza fiandriana ao. Nisy fitehegnan-tagna eo ami-gny andaniny gny fipetraha kiraidraiky, voho nisy liona roa nijoro ami-gny reo andaniny gny fitehegnan-tagna. ¹⁹ Liona folo roa amby ro nijoro ami-gny reo dinga reo, araky isaky gny andaniny gny isaky gny dinga eny. Mbo tsy nisy seza fiandriana manahaky gnany toy ami-gny fanjakana hafa tagny. ²⁰ Volamena iaby kapoaky finoman'i Solomona Mpanjaka reo, voho gny kapoaky finoma iaby ami-gny tragnony gny Alan'i Libanona ao la volamena tsy mitampoky iaby. Tsy misy volafoty fotony tsy nidiniky ho lafovily gny volafoty tami-gn'andron'i Solomona. ²¹ Gny mpanjaka la mana sambo mpandeha an-driaky, niaraky tami-gny reo sambon'i Hirama. Indraiky mandeha isakiny telo tao ro nandesany gny sambo volamena, volafoty, voho ivoara, mbami-gny reo rajako ndraiky gidro. ²² Nohony zay la nandilatsy gny reo mpanjaka iaby eran'izao tontolo izao tamin'ny hanagna vo fahendrea i Solomona Mpanjaka. ²³ Zao tontolo zao la nila gny fagnatrehan'i Solomona mba handre gny fahendreany, fa napetrakin-Dranagnahary am-po ao. ²⁴ Reo namangy la nanday rakitry, fanaky volafoty ndraiky volamena, siky fiarova, voho raha-magnitsy, voho sovaly ndraiky apondra, isan-tao ²⁵ Nana fihinanan'aomby efatsy arivo ho an'ireo soavaly vo reo kalesy i Solomona, voho mpitikitsy sovaly roa arivo ndraiky ray aly, natobiny ami-gny tanany gny kalesy ndraiky niaraky tagnaminy tagny Jerosalema tagny. ²⁶ Nanapaky ami-gny reo mpanjaka iaby reo zisiky agny ami-gny Ony Eofrata ka la zisiky agny ami-gny taniny gny Filistina ie, voho zisiky agny ami-gny sisin-tanin'i Egypta. ²⁷ Nana volafoty tagny Jerosalema gny mpanjaka, maro nohony reo vatosoa tegny ami-gny tany. Nagnamboatsy hazo sedera maro nohony reo hazo amontana aviavy tami-gny tany lemaky tao ie. ²⁸ Nanday sovaly ho gnan'i Solomona baka Egypta agny ndraiky baka ami-gny tany iaby agny rozy. ²⁹ Gny ami-gny reo raharaha hafa mikasiky gnan'i Solomona, voalohany sady farany, tsy fa voasoratsy tami-gny tantaran'i Natana mpagnambara hafatsy ao, tami-gny Faminanian'i Ahija Silonita, ndraiky tami-gny Fahitan'Ido mpahita mikasiky gnan'i Jeboana gnanaky lahin'i Nebata va zay? ³⁰ Nanjaka tami-gn' Israely iaby tagnaminy efapolo tao i Solomona. ³¹ Nimaty niaraky tami-gny reo razambeny ie voho gny vahoaky nandesiny gnazy tami-gny tanan'i Davida rainy tagny. Rehoboana, gnanaky lahiny, ro lasa mpanjaka nanolo gny polasiny.