¹ Ka lafa baka nivavaky Solomona, la nisy bolo nidrotso baka an-dagnitsy agny voho nandrava gny reo fanday horoa ndraiky gny reo soro, voho nagnantsika gny tragno gny voninahits'i Yaveh. ² Tsy afaky nilitsy tan-tragnon'i Yaveh ao reo mpisoro, fotony heniky gny voninahiny gny tragnony. ³ Nijery iaby gny vahoakan'Israely lafa nilatsaky gny bolo voho ami-gny tragno eo gny voninahits'i Yaveh. Nagnohoky gny tarehiny tami-gny tany ami-gny rarivato eo rozy, nivavaky, voho nagnomea fisaora gnan'i Yaveh. Hoy rozy hoe: " Fa soa ie, fa naharitsy zisiky amparany gny famalozam-pony." ⁴ Ka nagnomea saro ho gnan'i Yaveh gny mpanjaka ndraiky gny vahoaky iaby. ⁵ Nagnomea saro aomby roa arivo ndraiky roa aly ndraiky aondry voho aosy 120.000 i Solomona mpanjaka. Ka notokagnany gny mpanjaka ndraiky gny vahoaky iaby gny tragnon'i Yaveh. ⁶ Nitsanga gny reo mpisoro, nijoro ami-gny ze nanompoany tegny iaby rozy iaby, reo Levita avao koa niaraky tami-gny reo raha magnenon'i Yaveh, nataon'i Davida mpanjaka mba hagnomeza fisaora gnan'i Yaveh tami-gny hira manao hoe: " Fa maharitsy zisiky amparany gny fagnenkeany maharoky." Nampagneno gny antsiva tagnatrehan-drozy iaby reo mpisoro iaby, voho nitsanga iaby gny Israely iaby. ⁷ Nanoka gn'agnivony gny kianja tagnatrehany gny tragnon'i Yaveh i Solomona. Teo ro nagnomezany gny fagnatitsy horoa ndraiky gny taviny gny fagnati-pilongoa, fotony gny alitara saba nataony la tsy hay hitandrana gny fanday horoa, gny fagnatitsy hohany, voho gny sabora. ⁸ Nataon'i Solomona zisiky gny hafitoa gny firavoravoa taminy zay fotoa zay, voho gny Israely iaby miaraky tagnaminy, la fiangona bavata vatany, zisiky a Lebo Hamata ka la magnagny ami-gny lohasahan-driak'i Egypta. ⁹ Tami-gniandro fahavalo la nanao fivavaha mametriketirky rozy, fotony nihazo gny fanokagna gny alitara, ndraiky gny firavoravoa la zisiky gny hafitoa rozy. ¹⁰ Tamign'andro faha roapolo telo ambiny gny vola fahafito, la nagnampoly gny vahoaky ami-gny tragnony tagny tan-kafalia ndraiky tami-gny fo ravoravo i Solomona nohony gny hasoa natoron'i Yaveh tamin'i Davida, Solomona, voho gny Israely olony. ¹¹ Manahaky gnany zay ro nahavitan'i Solomona gny tragnon'i Yaveh ndraiky gny tragnony manoka. Gny raha iaby bakami-gny feon'i Solomona hatao an-tragnon'i Yaveh ao ndraiky an-tragnony ao, la nitanterahiny soa aman-tsara. ¹² Niataro tamin'i Solomona i Yaveh gny haly voho nivola tagnaminy hoe: " Fa njanjiko gny vavakao, voho fa nifily gnany toy toera toy ho gnany gny vatako ho tragnony gny soro Zaho. ¹³ Laha atao hoe magnily gnany reo lagnitsy mba hampisy gn'ora Zaho, na laha magnily gnany reo valala handrava gny tany, na laha mandefa arety ami-gny oloko Zaho, ¹⁴ voho laha gny oloko, kaihy ami-gnagnarako, ro hanetry gny vatany, ndraiky hivavaky, hila gny tarehiko, voho hiala ami-gny fomba ratin-drozy, la ahare an-dagnitsy agny zaho, hagnenga gny fahotan-drozy, voho hagnanjanga gny taminy. ¹⁵ Androany la hivola gny masoko voho gny sofiko hijanjy soa gnany reo vavaky atao ami-toy toera toy eto. ¹⁶ Fa androany la nifily ndraiky nanoka gnany toy tragno toy zaho mba ho eo zisiky amparany gn'agnarako. Gny fijeriko ndraiky gny foko la ho eo isan'andro. ¹⁷ Laha gny agnaminao, laha mandeha agnatrehako eo manahaky gny nandehanan'i Davida rainao Iha, mankato ze iaby nibaikoako gn'anao voho mitandry gnany reo lily voho gny lalagnako, ¹⁸ la hametraky gny seza fiandrianan'ny fanjakanao zaho, araky gny nivolagninao ami-gny fagnenkea raiky tami-gny Davida rainao tao, lafa nivola Zaho hoe: ' Tsy ho rava ami-gny taranakao gny ho mpamaky amin'Israely.' ¹⁹ Fa laha mivaliky Iha, ka mahafoy gnany reo lalagnako ndraiky gnany reo liliko napetrako tagnatrehanao, voho laha manompo Ndranagnahary hafa ndraiky miankohoky ami-regny iha, ²⁰ la ho fongoriko hiala amin'ny taniko zay nomeako gnazy reo ireny. Toy tragno zay natokako ho amin'ny agnarako toy, la hariako tsy ho eto agnatrehako, sady hataoko ho ahabola voho vazivazy eo amin'ireo soa tarehy vatany aza toy tempoly toy zao, la ho meloky vo hisioky zay iaby manavasava zay. Hagnotany rozy hoe: ' Nagnino Yaveh ro nanao zao tamin'itoy' ²² Gny hafa hamaly hoe: ' Fotony rozy nahafoy gnan'i Yaveh, Ndranagnaharin-drozy, zay nanday gny razamben-drozy reo hiala bakamin'ny tany Egypta, sady nitanjaky reo Ndragnahary hafa vo niankohoky tamin-drozy vo nanompo an-drozy. Zany ro antony nandaisan'i Yaveh zao loza iaby zao eo amin-drozy."'