¹ Lafa vita gny asa iaby nataon'i Solomona ho gnany gny tragnon'i Yaveh, la nampilirin'i Solomona gny reo raha fa natokan'i Davida, rainy, ho gnany zay fikasa zay, agnisany zay gny volafoty, gny volamena, voho gny reo fanaky iaby__napetrakiny ami-gny fagnajaria an-tragnon-Dranagnahary ao reo. ² La nampivorian'i Solomona, tagny Jerosalema tagny reo loholon'Israely, gny reo mpitariky gny foko iaby, voho gny reo mpitariky gny longony gny vahoakin' Israely, mba hampiakatsy gny fiarany gny fagnenkean'i Yaveh bakao ami-gny tanan'i Davida ao i Ziona. ³ Nivory tagnatrehany gny mpanjaka tami-gn'andro firavoravoa, tami-gny vola fahafito gny olon'Israely iaby. ⁴ Avy gny loholon'Israely iaby, ka la nampiakatsy gny fiara reo Levita. ⁵ Nampiakarin-drozy gny fiara, gny tragnolay fihaogna, voho gny famaky masy iaby tan-day tao. Reo mpisoro baka ami-gny fokon'i Levy ro nampiakatsy gny reo raha reo. ⁶ Nindry-avy tagnatrehany gny fiara i Solomona mpanjaka ndraiky gny fiangonan'Israely iaby, nanao soro aondry ndraiky aomby tsy tombo isaky. ⁷ Reo mpisoro la nampiakatsy gny fiarany gny fagnenken'i Yaveh ho ami-gny fipetrahany ao, tami-gny efitsy agnainy gny tragno ao, tami-gny polasy nasy mare ao, ambaniny reo alatsy gny kerobima. ⁸ Fotony gny kerobima la namelatsy gny elatsin-drozy ami-gny fipetraha gny fiara ao, ka nandomboky gny fiara ndraiky gny reo bao hilanja gnany zay reo. ⁹ Reo bao la lava vatany ka la hita baka ami-gny fipetraha masy ao agnatrehany gny efitsy agnainy gny reo fiafarany, fe tsy hita baka ambaliky agny zay. Ao mandrak'androany reo. ¹⁰ Tsy misy ndra ino ndra ino ami-gny fiara ao laha tsy reo vato pisaky roa napetran'i Mosesy tagny Horeba tagny, tamin'i Yaveh nanao fagnenkea tami-gny vahoakan'Israely, lafa niboaky tagny Egypta agny rozy. ¹¹ Sady niboaky tao amin'ny fipetraha masy reo mpisoro. Reo mpisoro avy iaby la nagnoka-tena ho an'i Yaveh, tsy nandaha-tena araky gny fivolan-drozy. ¹² Reo Levita zay mpihira avao ko, ie iaby, agnatin'izay i Asafa, Hemana, ledotona, dady reo anaky lahy voho rahalahin-drozy, niakanjo rongony foty maliniky sady nitendry kipantso, harpa, voho lonkanga, la nijoro teo amin'ny farany antignanan'ny alitara. Nisy mpisoro 120 nitsoky tropetra niaraky tamin-drozy. ¹³ Sady nampiara-peo reo mpitsoky tropetra vo reo mpihira nanao feo toka mba ho re ho fandrengea vo fisaora gnan'i Yaveh. Nanandratsy gny feony tamin'ny tropetra vo kipantso sady raha magneno hafa rozy, ka nandrengy gnan'i Yaveh. Nihira rozy hoe: " Fa soa Ie, fotony maharitsy la traky farany gny tsy fivadiham-pagnekeny."Sady gny tragno, lay tragnon'i Yaveh, la feno raho . ¹⁴ Tsy afaky nijoro mba hanompo reo mpisoro nohon'ny raho, fotony nagneno gny tragnony gny voninahitr'i Yaveh.