¹ Roapolo limy amby tao i Amazia laha nanomboky nanjaka: nanjaka roapolo sivy amby tao ta-Jerosalema tao ie. Joadana ro agnanan-drainy, baka a Jerosalema ao. ² Nanao gny to tamason'i Yaveh teo ie, fe tsy tami-gny fony iabiaby. ³ Voho lafa tafapetraky soa gny fanjany, la namono gnany reo mpanompo namono gny babany, mpanjaka ie. ⁴ Kanefa tsy namono gnany reo gnanaky reo mpanompo ie, fa nanao araky ze voasoratsy tami-gny lalagna ao, tami-gny bokin'i Mosesy ao, araky gny nibaikon'i Yaveh hoe: " Ao gny ray tsy ho maty nohony gn'anaky, na gny anaky maty nohony gny ray. Fa koa, tokony ho maty nohony gny otany avao gny gny olo kiraidraiky. ⁵ Ka la, navorin'i Amazia niaraky gny Joda, voho nandramby ao-tsoratsy gnagnaran-drozy araky gny taratasy gny razambeny iaby, tambaniny reo mpifehy gny arivo ndraiky mpifehy gny zato__Joda ndraiky Benjamina iaby. Nisafiny nanomboky tami-gny roapolo tao ro miakatsy rozy, voho 300 000 gny reo johary voanfatina, afaky mandeha agn'aly, ze afaky mitandraky lefo ndraiky apinga. ⁶ Nagnarama johary mpialy 100 000 bakami-gny Israely avao koa ie tami-gny talenta volafoty zato. ⁷ Fa nisy joharin-Dranagnahary raiky niavy tagnaminy teo voho nanao hoe: " Ry mpanjaka, ka enga hiaraky agnaminao gny tafik'Israely, fotony Yaveh tsy momba gny Israely__na gny vahoakan'i Efraima. ⁸ Kanefa na la mandeha ndraiky mahery fo nndraiky mahery agn'aly aza iha, la handavo gnanao agnatrehany gny fahavalonao Ndranagnahary, fotony Ndranagnahary la mana hafefa hagnampy, ndraiky fahefa handavo." ⁹ La hoy Amazia tami-gny joharin-Dranagnahary hoe: " Ka ino ro ataonay momba gnany reo talenta zato fa nameaako ho agnany gny tafik'Israely?" Joharin-Dranagnahary namaly hoe: " Yaveh la afaky magnomea gnanao maro mandilatsy noho zay." ¹⁰ Ka la nisinarak'i Amazia gny tafiky baka agnaminy ndraiky gny baka amin'i Efraima; voho nivinolany noly baka agnaminy ndraiky gny baka amin'i Efraima; voho nivinolany noly ndraiky rozy la nirehitsy mare tamin'i Joda gny siakin-drozy, voho la noly tan-kasiaha mare rozy. ¹¹ Voho Amazia nana herim-po voho nitariky gny vahoakany niboaky gny Lohasahan-tsira; tao ro nandreseany gny reo johary ray aly baka Seira agny. ¹² Nanamboatsy velo gnany reo ray aly hafa gny tafik'i Joda. Nandesin-drozy tam-tampony gny haram-bato tagny rozy voha navariny bakegny, mba hamotipoteha gnan-drazy iaby. ¹³ Fa gny reo johariny gny tafiky nampolin'i Amazia, mba tsy handehanan-drozy miaraky agnaminy agnaly agny, la nanafiky gnany reo tanan'i Joda a Samaria tagny ka la zisiky a Beti-horona. Nandavo telo arivo ndraiky nangala babo maro rozy. ¹⁴ Voho lafa tafapoly baka ami-gny famonoa gny Edomita i Amazia, la nanday gnany reo Ndranagnariny gny vahoakan'i Seira, ndraiky nametraky gnan-drozy mba ho Ndranagnahariny manoka ie. Niankohoky tagnatrehany reo ie voho nagnoro ditin-kazo magnitsy ho gnany reo. ¹⁵ Nohony zay la nirehitsy tamin'i Amazia gny nakin'i Yaveh. Nandefa mpagnambara hafatsy ho agnaminy agny Ie, nanao hoe: " Nagnino iha ro nila gnany reo Ndranagnahariny gny vahoaky tsy nahalomba gnany reo vahoakany tan-tagnanao teo aza?" ¹⁶ Voho laha mbo nisafa tagnaminy gny mpagnambara hafatsy, la hoy gny mpanjaka tagnaminy hoe: ' Moa va rahay fa nanao gnanao ho mpanolo-tsay gny mpanjaka? Ao zay! Nagnino iha ro tokony ho vonoy?" voho la nijano gny mpagnambara hafatsy voho nanao hoe: " Haiko fa nanapakevitsy gny handrava gnanao Ndranagnahary fotony nanao gnany zay asa zay iha voho tsy nijanjy gny torohevitsiko." ¹⁷ Voho la nila hevitsy tagnaminy reo mpanolon-tsay i Amazia, mpanjakan'i Joda voho nagniraky mpanday hafatsy tamin'i Joasy gnanaky lahin'i Jeho tagny, mpanjakan'Israely, nanao hoe: " Avia, ao tsika hifagnatin-tarehy ami-gny aly." ¹⁸ Kanefa i Joasy mpanjakan'Israely nagnampoly gnany reo mpanday hafatsy ka amin'i Amazia mpanjakan'i Joda agny, nanao hoe: " Tsilo raiky ta Libanona tagny nandefa hafatsy tami Sedera raiky ta Libanona tagny, nanao hoe;" Ameo ho valiny gn'anako lahy gn'anakao ampela, kanefa nisy biby dia raiky baka Libanona tagny nandeha teo voho nagnosihosy gny fatiky. ¹⁹ Iha fa nanao hoe: " Ingo, fa nandavo gnan'i Edoma zaho,' Voho gny fonao ro nampirehareha gnanao. Mirehareha ami-gny fandresenao, fa mifitaha an-tragno agny avao, fa nagnino iha ro tokony hiteraky korontaky ndraiky halava, ho gnany gny vatanao ndraiky Joda miaraky agnaminao?" ²⁰ Fe tsy ninjanjy Amazia, fotony baka amin-Dranagnahary zay tranga zay, mba ahafahany magnomea gny vahoakan'i Joda ho an-tagnany reo fahavalony eo, fotony fa nila hevitsy baka ami-gny reo Ndranagnaharin'i Edoma rozy. ²¹ Ka la nanafiky i Joasy, mpanjakan'Israely; ie ndraiky Amazia, mpanjakan'i Joda, la nifagnatri-tarehy ta- Beti-semesy tao, gnan'i Joda. ²² Tonta tagnatrehan'Israely gny Joda, voho nilay noly gny johary iaby. ²³ Joasy, mpanjakan'Israely, la nanamboatsy gnan'i Amazia gnanaky lahin'i Joasy gnanaky lahin'i Ahazia, mpanjakan'i Joda, ta Beti-semesy tao. Nandesiny ta Jerosalema tagny ie voho nandrotiky gny valan'i Jerosalema zisiky ami-gny vavahady Efraima ka la zisiky ami-gny vavahady an-jorony, nielagnela efajato hakiho. ²⁴ Nalany iaby gny volamena ndraiky gny volafoty iaby, gny raha nanan-danja tan-tragnony gny mpanjaka tao, miaraky tagnaminy reo takalon'ay avao koa, voho la nimpoly ta Samaria tagny. ²⁵ Amazia gnanaky lahin'i Joasy, mpanjakan'i Joda, la nivelo folo limy amby tao tafarany gny nahafatezan'i Joasy, gnanaky lahin'i Joahaza, mpanjakan'Israely. ²⁶ Laha gny agnaminy reo raharaha hafa mikasiky gnan'i Amazia, gny vaalohany ndraiky gny farany, Ingo moa va rozy tsy fa voasoratsy tagnany gny bokiny reo mpanjakan'i Joda ndraiky Israely ao va? ²⁷ Voho nanomboky tami-gny fotoa niviognan'i Amazia tami-gny fagnaraha gnan'i Yaveh, la nanomboky nanao tetiky hanohera gnazy ta Jerosalema tagny rozy. Nilay ta Lakisy tagny ie, kanefa rozy nagniraky johary nagnaraky gnazy ta Lakisy tagny voho namono gnazy tagny. ²⁸ Nandesin-drozy nimpoly tami-gny sovaly ie voho nandevy gnazy miaraky tagnaminy reo razambeny tan-tanan'i Joda tao.