¹ Voho lafa vita zay iaby zay, la niboaky ho ami-gny tanan'i Joda reo agny gny vahoakin'Israely iaby tagny ka nanorotoro gny reo andriam-bato ndraiky nanapaky gny reo baon'Aseraha, voho nirinavan-drozy gny fitoera abo ndraiky gny reo alitara tamin'i Joda ndraiky Benjamina ao, ndraiky ta Efraima voho Manase iaby ao, zisiky aharavan-drozy gn'azy iaby. La mimpoly gny vahoakan'Israely iaby, gny kiraidraiky ami-gny fanagnany ndraiky gny tanany agny aby. ² Nitinendrin'i Hezekia gny fizarany reo mpisoro ndraiky gny reo Levita voalamy araky gny fizaran-drozy, gny johary kiraidraiky nitinendry tami-gny asany, la gny reo mpisoro ndraiky gny reo Levita. Nitinendriny rozy mba hanao gny fagnatitsy oroa ndraiky fagnati-pihombogna, mba hanompo, mba hagnomea fisaora, voho mba handrengy ami-gny reo vavahadiny gny tempolin'i Yaveh. ³ Nitinindriny avao koa gny anjarany gny mpanjaka ho gnany gny fagnatitsy oroa baka ami-gny fanagnany manoka, zay la ho gnany gny fagnatitsy oroa maray ndraiky fagnatitsy oroa hariva, voho gny fagnatitsy oroa ho ami-gny andro sabata, gny reo vola vaovao, ndraiky gn'andro firavoravoa voatendry, araky gny voasoratsy ami-gny lalagnan'i Yaveh. ⁴ Ankoatsiny, nibaiko gny vahoaky nipetraky ta Jerosalema tagny mba hagnomea anjara ho gnany reo mpisoro ndraiky gny reo Levita ie, mba ahafaky gnan-drozy mifantoky ami-gny fankatoava gny lalagnan'i Yaveh. ⁵ Vatany vo nalefa gny baibo, la nameany gny vahoakan'Israely tami-gny fahalalan-tagna gny reo voaloham-bokatsy gny vary, divay vaovao, diloilo, tantely, ndraiky gny baka ami-gny reo vokatry tam-baibo tagny. Nandesin-drozy gny ampahafolony gny raha iaby; bevata la vatany bevata. ⁶ Gny vahoakan'Israely ndraiky Joda nipetraky tami-gny tanan'i Joda tao avao koa la nanday gny ampahafolony gny biby fihany ndraiky aondry, voho gny ampahafolony reo raha misy navahy ho gnan'i Yaveh Ndranagnaharin-drozy, voho navonin-drozy ho antonta zay. ⁷ Tami-gny vola fahatelo ro nanombohan-drozy namory gny fandrambesa anjarany ho antontany ka nofaranan-drozy tamin'ny vola fahafito. ⁸ Lafa avy sady nagnenty reo antontany i Hezekia ndraiky gny reo mpitariky, la nisaotsy gnan'i Yaveh ndraiky gny Israely vahoakany rozy. ⁹ Bakeo Hezekia nagnontany gnany reo mpisoro ndraiky gny reo Levita momba gnany reo antontany. ¹⁰ Azaria, mpisoro, baka ami-gny fokon'i Zadoka, namaly gnazy voho nanao hoe: " Fotony gny reo vahoaky nanomboky nanday fagnatitsy tan-tragnon'i Yaveh tao, la nihina rahay ka vintsy, voho antsaky ambiny." La nibaiko gny hagnomana tragno fagnanjaria an-tragnon'i Yaveh eo i Hezekia, ka la nomagnin-drozy zay. ¹² Bakeo nandesin-drozy tam-patokia gny fagnatitsy, ka la nomagnin-drozy zay. Bakeo nandesin-drozy tam-patokia gny fagnatitsy, gny ampahafolony ndraiky gny reo raha gnan'i Yaveh. Konania, Levita, ro mpitanjaky nisaha gnany reo, voho Simey, rahalahiny, ro faharoa nagnampy gnazy. ¹³ Jehiela, Azazia, Nahata, Asahela, Jerimota, Jozabada, Eliala, Jismakia, Mahata, voho Benaia ro mpitanjaky tam-bony fahefan'i Konania ndraiky Sinay rahalahiny, tamin-gny fanendren'i Hezekia, mpanjaka, ndraiky Azaria, manam-boninahitsy tami-gny tragnon-Dranagnahary eo. ¹⁴ Kore gnanaky lahin'i Jimna Levita, mpamby varavara tan-tignanany gny vavahady, ro tami-gny fagnatitsy an-tsitsapo ho gnan-Drananagnahaty, nisaha gny fizara gny reo fagnatitsy ho gnan'i Yaveh ndraiky gny reo fagnatitsy masy mare. ¹⁵ Tam-bany fahefany ro nisy gnan'i Edena, Miamina, Jesoa, Samaia, Amaria, voho Sekania, tami-gny tanany reo mpisoro ao. Natsehin-drozy fatokia gny reo anjara fanompoa, mba hagnomeza gnany fagnatitsy reo ho gnany gny rahalahin-drozy isam-pizara, la gny manan-danja ndraiky gny tsy manan-danja. ¹⁶ Namean-drozy avao koa gny reo johary telo tao misondrotsy, voasiky tami-gny firaketa an-tsoratsy ao gny razambeny militsy tan-tragnon'i Yaveh ao, araky gny nitinakiny gny fanao andavanandro, mba hanao gn'asa tami-gny reo anjara fanompoany ao ndraiky fizaran-drozy. ¹⁷ Nizinaran-drozy ho gnany gny mpisoro araky gny firaketa an-tsoratsy gny reo razambeny, voho manahaky gnany zay koa ho gnany reo Levita roapolo tao mandilatsy, araky gn'asa fanompoany ndraiky fizaran-drozy. ¹⁸ Tafilitsy agnainy zay gn'anany maliniky, gny reo valiny, gny reo gnanany lahy, voho gny reo gnanany ampela, manera gny fiarahamony iabiaby, fotony rozy la natoky tami-gny fitandrema gny vatan-drozy ho masy. ¹⁹ Ho gnany reo mpisoro, la gny reo taranak'i Arona, tam-baibo tagny ami-gny reo gnan-bohitsy tan-tanan-drozy tao, na tami-gny tana iaby tagny, la nisy johary nitinendry tami-gny agnara mba hagnomea anjara ho gnany reo johary iaby tami-gny reo mpisoro, ndraiky ho gnany reo iaby voaisaky tami-gny firaketa an-tsoratsy gny reo razambeny ao tami-gny reo Levita. ²⁰ Nataon'i Hezekia nanera gnan'i Joda iaby zay. Nitanterahiny gny soa, to, voho matoky tamason'i Yaveh, Ndranagnahariny. ²¹ Isaky gny tetikasa natombony tami-gny fanompoa tan-tragnon-Dranagnahary, ao gny lalagna, voho gny reo lily, mba hila gny Ndranagnahariny, la nitanterahiny tami-gny fony iabiaby zay, ka nanjary ie.