¹ Nabakoba nti mananu nkubakoba nti kubani abemereire nai waliwo abamwei abataalirooza ku kuffa nakadooli okwikya bwebalibona obukama bwa Nyamwanga nga bukwiiza namaani. ² Awo ebiro omukaaga nibyayakairewo o Yesu natwaala o Peteero, no Yakobbo, no Yokaana, nayaba nabo oku lusozi olulai bonkai omukyaama: nayindulwa omu maiso gaabwe. ³ Ebizwalo byaamwei nebipirikita nibyeera munno; nga ndoowo omwozi okunsi ayinza okubyeeryaatyo. ⁴ Awoo Eriya no Musa ne bababonekera; era baali bakubaza n'oYesu. ⁵ OPeteero nairamu, nakoba oYesu nti Labbi, nikyo kisai iswe okubba anni; ale lekatwomboke obusiisira bussatu; akamwei kaamu, akandi ka Musa nakandi k'Eriya. ⁶ Kubba yaali tamaite kyakubairamu; kubba baali batiinire munno. ⁷ Awoo eciiguru nekyiiza ne kyikingiirya; eirakka neliwuluka omu cciguru ngarikkoba "oyo niye mwana wange omugaanzi. Mumuwuliirye" ⁸ Bwe baakengere amangu ago nibatabona muntu yadde wabula o Yesu yenkai nabo. ⁹ A woo bwe balibakusirimuka okulusozi, nabalumirya battakoberaku muntu byebabeine, okwikya omwana wamuntu lwaliyiimbooka omubafful. ¹⁰ Nibakyekuuma ekigambo ekyo nga bakwebulyangana bonkai na bonkai nti okuyimbooka omubaffu kuliba kutyai? ¹¹ Ne bamubulya nga abakoba nti Abawandiiki bakubaza nti kyigwaniire Eriya okusooka okwiza. ¹² Nabakoba nti Eriya niye yalisooka okwiiza, nasayiira byoona byoona; era kyawandiikiibwe kyityai omwana wamuntu okwasaisainibwa omuno n'okunyoomebwa. ¹³ Naye nabakoba nti Eriya yamare okwiza, era bamukoore bulikyebayeendyanga, nka nikyamuwandiikirwe. ¹⁴ Awoo bwe baikire eddi abegesebwabaamwei, nibabona ekyibiina nga kikooto nga kyibeetooloire n'abawandiiki nga bakubakemeerya. ¹⁵ Amangu ago ekibiina kyoona nikyamubwoine, nibeewuunya munno, ne bairuka gyaali nibanulabusa. ¹⁶ Nababuulya nti mukubakemeerya naki? ¹⁷ Omwei omukibiin namwiramu nti omwegesya, nkuleteire omwana wange, aluku o dayimooni atakubazza; ¹⁸ buli jenkumutwala, amukubba ebiggwo; akwiiza eifuro, nannenna amaino, akoozimba; nkobere abegesebwwa baamu bamuppeke; ne batayinza. ¹⁹ Nairamu nabakoba ntiNywe abamirembe egitaikiriza, ndikyaai okubba naanywe? ndikyaai okubagumiinkirya? Mumundetere. ²⁰ Ne bamuleete gyaali; awo bweyamubweine, amangu ago o dayimooni namwonoloyonola munno; nagwa ansi, niyeekulungula, nga akwiza eiffuro. ²¹ Nabuulya oite waamwei nti obulwaire buni kasokeranga bumukwata ibbanga kii? Nabakoba nti kuzwa mubuto bwamwei. ²² Emirundi jiingi nga akumunagga omuuro nomumaizi okumwitta: naye obanga okusobola, tusasire, obenaiswe. ²³ O Yesu namukoba nti niwabbanga okusobola! byoona bisoboka eddi akwikiriza. ²⁴ Amangu ago oite waamwei nabazira aiguru, nakoba nti nyikiriize; ganyira obujeemu bwange. ²⁵ Awoo o Yesu niyabweire ekibiina ekikumbaana mubwingi, nabwoiggoora o dayimooni nakoba nti "Wwe o dayimooni atakubaza, era omwigali wamatwi, nje nkkuduumira nti, Muzweeku, ate Ttomwirangaku wadde nolumwei". ²⁶ Awoo nakuunga, namutaagula munno, namuzwaku; naisan affwiire, nokukoba abandi baingi nibakoba nti afwiire. ²⁷ Naye o Yesu namukwata okumukono, namwimukya nayemeera. ²⁸ Awoo niyaingire omunyumba, abegesebwa baamwei nibamubuulya omu kaama nti Iswe katutasobwoire kumuppeka? ²⁹ Nakoba nti engeri jini tekusobola kuzwaku olwa kigambo wabula olwakusaba. ³⁰ Nibazwayo nibakala omu Ggaliraaaya, natendya muntu yeena kumumanya. ³¹ kubba yegeeserye abegesebwa baamwei nakoba nti Omwana wamuntu akuweebwayo omumikonom gy'abantu, balimwiitta; kale bwalimala okwitibwa, era waalyakalawo enaku issatu nayimbooka. ³² Naye tibeeteegyerye kigambo ekyo, nibatiina okumubuulya. ³³ Nibaika e Kaperunawumu; Awo niyaali nga ali munyumba nababulya nti mubaire mukuwakaniraki omunzira? ³⁴ Naye nibasirika; kubba baali bakuwakana bonkai na bonkai omuzira nti naani omukulu. ³⁵ Naikaara, nayeta eikumi nababiri, nabakoba nti omuntu bwayendya okuba akwekeera, akwiza kubbaanga akusembayo mubyoona, era omweereza waboona. ³⁶ Nabona omwana omutto namwemeerya akati waabwe; awoo namuvumbatira nabakoba nti, ³⁷ Buli ayakwikkirizanga omwei okubaana abatto abakwisana oni omwibara lyange, ng'akwikiriize ninje, nabuli muntu yeena aikiriza nje, takwikiriza ninje, wabula oddi ayantumire. ³⁸ Awo o Yokaana namukoba nti Omwegesya, twabwoine omutto nga akuppeka o dayimooni omwibara ryamu; netugaana olwokubba tiyaakaire naiswe. ³⁹ Naye o Yesu nabakoba nti temumulemeesyanga; kubba ndoowo muntu yakolaanga kyamagero mwibara ryange ate amangu ago nanzuma. ⁴⁰ Kubba atali muzuggu waiswe alibba naiswe. ⁴¹ Kubba buli muntu yabanyweesyanga nywe ekikoompe eky'amaizi kuba muli ba Kristo, mananu nkubakoba nti talibulya mpeera nakadooli. ⁴² Nabuli muntu ayesittalanga omwei okwaba abatto ayanyikiriize, waakiri oyo okubbwebwa emeengo omwikoti anagibwe omunyyanja. ⁴³ Omukono gwaamu bwegukwesittalaanga, oguteemangaku; waakiri wee okwingira omubwomi, ng'obuureku ekibajju, okusiinga okwaba omugeyeena ng'olina emikono gyoona, omumuuro ogutakulikira; ⁴⁴ Eiggino lyaabwe gyeritafwiira, n'omuuro ogutalikira. ⁴⁵ Nakugulu kwamu bwe kukwesittalya, okutemangaku; waakiri we okwingira ongo obuuryeku okugulu, okusiinga okunagibwa omugeyeena, ng'olina amagulu goona; ⁴⁶ Eiggino lyaabwe gyeritafwiira, n'omuuro ogutalikira. ⁴⁷ Neriiso lyamu bwerikweisitalya, oriyangaamu; waakiri we okwingira omukama bwa Nyamwanga ng'oli wa riiso limwei, okusinga okunagibwa omugeyeena nga olina amaiso goona. ⁴⁸ Eiggino lyaabwe gyeritafwiira, n'omuuro ogutalikira. ⁴⁹ Kubba buli muntu alirungibwamu muuro. ⁵⁰ Omunyu gusai; naye omunyu niguwaamu ensai muliryamu ki? Nywe mubbe n'omunyu omunda yanywe, mwirirenganemu nywenkai na nywenakai.