¹ Nibakuumbaana awli Abafalisaayo n'Abawandiiki abamwi abaligiire eYerusaalemi nibeekumbanirya jeyaali. ² Era abandi nibabona abegesebwa baamwei abamwei nga bakulya emmere yaabwe nengalo ezitali zinaabe. ³ okubba Abafalisaayo, n'Abayudaaya, nibataanabire munno mungalo zaabwe, tibaalyanga, kubanga bakwaata emikiirokiiro zabakaire. ⁴ Era nibaazwa omukatale, nibatanaaba, tibalya: era waliwo nebindi bingi bibaweebweibwe okukwaata, okunaabyanga ekikompe; nebibya, nebinaga ebya bikomo. ⁵ Abafalisaayo n'abawandiiki nibamubuulya nti kiki abegesebwa baamu ekibalemeserye okutambuura omu mikiirokiiro obwabakaire, naye bagumya galya mmere n'engalo ezikwiiragura? ⁶ Nabakoba ntini "o Isaaya yalagwiire kusai eddinywe abannankwe, nkebwe kyaawandikiibwe nti abantu bani bateekamu ekitiinisya kyakuminwa, naye emitima zaabwe zindi alai" ⁷ Yeni bansinzira bwere nga bakwegesya amateeka gabantu byebaakwatanga ⁸ muleeka eitteeka lya Nyamwanga, nimukwaata emikiirokiiro jabantu. ⁹ Nabakoba ntini mugaanira kakyaarumyei kusai eitteeka lya Nyamwanga, era mukwaata emikiirokiiro zanywe! ¹⁰ Kubba oMussa yabazire nti attangamu oiteewo ekitiinisya n'omaawo; era nti eyalizumanga oite waamwei oba omaamwei, bamwittangambe. ¹¹ Yeni nywe mubaza nti omuntu nakoba oite wamwei, oba onyina wamwei nti kyoona kyenandikuwairye okkugassa nijo Kolubaani, ekimnyisibwa nti kitone kya Nyamwanga. ¹² Timukyamuganya okukoora ekintu oitaamwei obundi omawamwei. ¹³ Mudibya ekigambo kya Nnyamwanga olwabukiirokiiro bwaanywe, bwe mwayegeserye; era mukkola ebigaambo ebiindi bingi nke'ebyo. ¹⁴ Ate nayetta ebibiina, nabakoba nti mumpuure nyweena, mwetejje. ¹⁵ ndoowo kintu kiri enzai wamuntu nikiingira omunda mwamwei, kiyyinza okumusiisa, naye ebyo ebimuzwaamu ye, ebyo nibyo bisiisa omuntu. ¹⁶ Buli ayina amatwi agakuura, awure. ¹⁷ Awo niyaingire omunyumba nga azwiire ombibiina, abegesebwa baamwei nibamubuulya olugero olwo. ¹⁸ Nabakoba nti "nimwo mutyo nyweena timulina magezi? temwetejje nti kyona ekiri enzai nikiingira omuntu, tikisobola kumusiisa. ¹⁹ Kubanga tikiingira mumutima gwaamwei: naye omunda yaamwei, nicakalla nikyaaba omukiigo? yaizire atyo nga akusaayirya ebiriibwa byoona. ²⁰ Nabakoba nti ekizwa omumuntu; nikyo kisiisa omuntu. ²¹ Olwakubba omunda, Omumitima jabantu, muzwaamu ebirowoozo ebibbi, obwenzi, ²² okwiibba, okwiitta, obweenzi, okwegomba; obubbi, obulyaaki, omwoloonko, erriso eribbi, okusekeeteera, amawoole, obusurru. ²³ Ebibbi ebyo byoona bizzwa munda nibisiisa omuntu. ²⁴ Nagalabbuka, nazwaayo nayaba mu mbibi eza Ttuulo ne Sidoni, nayingira omu nnyumba natayendya muntu kweteja, ateni natasobola kweibbisa. ²⁵ Era amangu ago omukali eyalina omwara aliku o dayimooni, yamuwulire naiza nafukamira okumagulu gaamwei. ²⁶ Omukali yaali Muyonaani eiyanga lyaamwei Musulofoyiniiki namwesengeerya okuppeka o dayimooni okumwara waamwei. ²⁷ Namukoba ntini leka abaana bamaliirye okwikutta kulwakubba tikisai kwiriira mmere yabaana kujjinagira mbweene. ²⁸ Yenite nairamu ng'akoba nti nimwo otyo mukama wange n'embweene ziriira nsi wameenza obukunkumuka obwabaana. ²⁹ Namukoba nti okulwakigambo ekyaamu, weirireyo; o dayimooni azwiire okumwaara waamu. ³⁰ Nairayo munyumba yaamwei, nayajja omwara ngabamugalamirye oku kitanda, n'odayimooni ng'amuzwiireko ³¹ Ate nazwa omu mbibi eza Ttuulo, naiza nayakala omu Sidoni n'akati omu mbibi eza Dekapoli naika okunnyaanja eya Ggaliraaya. ³² Nibaleeta okiigara, ate nga takubaza kusai nebamwesengeerya okumutaaku omukono gwaamwei. ³³ Namuiya omu kibiina mukyaama, namuttaaku emikono namatwi gamwei, nacwa ebicwantai namwikya okululumi. ³⁴ Narola aiguru omwiguru, natinda namukoba nti Efasa, nikwo okukoba nti ziguluka. ³⁵ Amatwi gaamwei nigaiguka nentandikwa yalulimi lwaamwei nelusandabuka nabaza kusai. ³⁶ Nabakimirya baleme okukobera omuntu: naye nkebweyeyongeire okuumirya, nibeeyongere omunno okukibunisya. ³⁷ Nibaiwunaaca munno ni kini kakitalo nga bakkoba nti byoona akoore bisai; aiggula abaiggali bamatwi, era abazisya abakibbubu.