¹ Nibaika enseeri wa nnyaanja omunsi y'Abagerasene. ² Niyazzwire omutulo, amangu ago omuntu ayaluku o dayimooni ayazwiire omumbi namutangarana. ³ Eyasulanga omumbi nga ndoowo muntu akyasobola kumubbwa, newandibaire olujegere. ⁴ Kubba emirundi jiingi yatekeibweku omu masamba no munjegere, enjegere nazikutula na masamba nagamenyawo: ne watabbaawo muntu wamaani akumusobola. ⁵ Era buliizo, obwiire no mwiyangwe, yakungiranga omumbi no kunsozi niyeesala n'amabbaale. ⁶ Bwe yabweine o Yesu nga akyaali alai, nairuka munno okumuramya, nakuunga neirakka rikooto. ⁷ Nakoba nti "okundaaki, ali aiguru omunno? nkulaiyire Nnyamwanga, tomboneerya". ⁸ Obanga yamukobere nti Zwa oku muntu oni, we muzumu. ⁹ Namubuulya nti eibara ryamu niiwe nani? ngumukoba nti eibara ryange niinje Liigyoni; okubba tuli baingi. ¹⁰ Na mwesengeerya munno aleke kubappeka munsi eyo. ¹¹ Awo okulusozi waaluwo eigana lya mberege nga ziingi nga zikulya, ¹² namweseengerya nga akumukoba nti tusindike omu mberege twingire omwo. ¹³ Namwikiriza, o dayimooni nazzwa, naingira omumberege; eigana niribbubbuluuka nirisirituka mpaka omunnyaanja. Zaali nk'ebikumi bibiri, nezifweera omu nnyanja. ¹⁴ Awo abazirisyaanga nibairuka nibakobera abaali omukibuga, naabo omubyalo nebaiza okubona bibaireyo bwebibbaire. ¹⁵ Nebaikka awali o Yesu nebabona eyaliku o dayimooni nga aikaire nga azwaire nga alina amagezi, oyo ayaaluku Liigyoni ne batiina. ¹⁶ Abaabweine ni banyonyola ebimubaireku oyo eyaliku emizumu era ne byamberege. ¹⁷ Nibatandika okumwesengeerya okuzawa omunsaro zaabwe. ¹⁸ Awo niyaali nga akusomokka omu lyaato, oyo ayaluuku o dayimooni namweseengeerya abbe naye. ¹⁹ Natamwikiriza, namukoba nti yaba eka omwabo, obakobere nka nibiri ebikulu o Nnyamwanga bya kukoleire ne bwakusasiire. ²⁰ Nayaba nga akubaza omu Dekapoli nkanikiri kikulu o Yesu bye yamukoleire abantu boona nibeewuunya. ²¹ Awo Oyesu niyasaare ennyaanja naika enseeri omulyaato, abantu baingi inbakuumbanira weyaali, niyaali okulukeito lwa nyaanja. ²² Omwei okubakulu omukibiina ekye, eibara ryamwei Yairo naiza niyamuboine nafukamira okumagulu gaamwei. ²³ Namwesengeerya munno nga akumukoba nti omwano wange omutto alampi kuffa, nkwesengereirye oize omutekeku omikono gyaamu aire omumbeera zaamwei, ayimbooke. ²⁴ Nayaba naye; ekibiina ekikooto ne kimusengeerua nibamuninyigiirya. ²⁵ Awo omukali ayaali alwaire ekikulukuto enka musaayi emyaka ikumi naibiri. ²⁶ Yetolwere munno omubasawu baingi nawangaoy byoona byeyaalina, natajjunibwa naye niyeyongerangambe okulwala. ²⁷ Neyawuliire ebigambo bya Yesu naizira omukibiina emabega waamwei nakwaata okuciizwalo kyamwei. ²⁸ Kubba yakobere nti nebweyakwaata okukizwaalo kyamweimbe yawona. ²⁹ Amangu ago ensulo yamusaayi nekala, niyetejja omumubiri gwaamwei ng'awonere ekibonobono kyamwei. ³⁰ Amangu ago o Yesu bwetejerye omunda yamwei amaani agamuzwiiremu, nayinduka omukibiina nabakoba nti nani akwaite okukizwaalo kyange? ³¹ Abegesebwa bwaamwei nebamukoba nti boona ekibiina nekyikunyigiirya, n'okoba nti "Nani ankwaiteku?" ³² Niyerugurya amaiso okubona oyo akoore ekigambo ekyo. ³³ Naye omukali nga akutiina nga akukakana nga akumanya kyabbaire, naiza nakubba amajjwiomumaiso gaamwei, namukobera amannanu goona. ³⁴ Namukoba nti omwala, okwikiriza kwaamu kukuwonerye; weeyabire n'emirembe, owonere kimwei ekibonobono kyaamu ³⁵ Awo niyaali nga akyabaza, abazwiire ewamukulu waikumbaaniro nibaiza, nga bakukoba nti omwara waamu afwiire; okugaddiryaaki omwegesya? ³⁶ Naye oYesu natatekaku omwoyo okukigambo ekyabaziibwe, nakoba omukulu wa'ikumbaaniro nti "otatiina, we ikiriza". ³⁷ Nataikiriza muntu yeena kwaba naye okuyaku o Peteero, no Yakobbo, no Yokaana, muganda wa Yakobbo. ³⁸ Nibaika omunyumba ya mukulu wa'ikumbaaniro, nabona okulaajana, n'abakukuunga, n'abakukubba ebiboobo ebiingi. ³⁹ Awo niyaingire nabako nti kiki ekikubalaajania n'okubakuunja? omwala tafwiire, naye abbasiryeembe. ⁴⁰ Nebamusekeera munno. Naye niyabawulukyirye boona, natwala oite wamwaala n'onyinawaamwei naabo abaali naye, naingira omwala waali. ⁴¹ Awo nakwata omukono gwa mwaala, namukoba nti "Talusa kumi" ekimanyisya nti mwala, nkukoba nti "Imukka" ⁴² Amangu ago omwala naimukka, natambula; kubba yaali yakamala emyaka ikumi naibiri. Amangu ago nibawuniinkiira okuwuniinkiira okukooto. ⁴³ Nabakuutira munno buli muntu yeena atakyetejja ekyo; Nabalagira okumuwa ekyakulya.