¹ Awo e sabbiiti niyaweireku, o Malyamu Magudaleene no Malyamu onyina wa Yakobbo, no Saalome nibagula obuwoowo, baize bamusiige. ² Awo nibwakeire emaambya okulunaku olukwereera omusaande, nga eisana lyakazwayo nibaiza okumbi. ³ Awo baali nga bakwebuulya bonkai na bonkai, nti nani yatujuna okwiringitya eibbaale okuriiya okumulyango gwantaana? ⁴ Awo nibalolereire nibabona ebbaale nga riyiibwewo kumabbali, kubba ryaali rikooto muno. ⁵ Awo nibaingiire omuntaana, nibabona omwojjo nga aikaire okuludda lwa mukono gwa ddyo, nga azwaire ekizwalo ekyiikiiri. ⁶ Nabakoba nti muteewuunya muno; Mukutoolya Yesu, Omunazaaleesi, ayakomeereire: Awumbuukire; taluwo ani bbe: bona, ekiffo webamutaire. ⁷ Naye mwabe, mukobere abegesebwa baamwei no Peteero nti abakulembeiramu okwaaba eGgaliraaya. ⁸ Nibazwa omumbi nga bakwiruka mangu mangu; kubanga okukankana no okwewunaikya byaali nibibakaite: ate nibatakoberaku muntu kigambo kubanga batiinire. ⁹ Awo niyamaare okuyimbooka oku mambya mambya okuluniku olwekeera omu nnaku omusanju nasoka okubonekera oMalyamu Magudaleene gweyappekereku ezi dayimooni omusanju. ¹⁰ Oyo nayaba nakobera abantu abandi beyaakalanga nabo, nga banakuwaire nga bukukuunga. ¹¹ Awo bo, nibaawuliire nga mwomi, nga aboneibwe ye, nibataikiriza. ¹² Ebyo nibyaweire nabonekera abaira baamwei babiri omukifaananyi ekiindi, nga bakutambula nga bakwaba omukyaalo. ¹³ Awo abo nibaaba nibakobera baddi abandi naye nibataikiriza. ¹⁴ Oluvanyuka nabonekera eikumi nomwei nga baikaire okukyiobulo; nabannenya olwabutaikiriza n'obukakanyali bwa myoyo jaabwe, kubba tibaikiriize abamwei bona nga amaare okuzuukira; ¹⁵ nabakoba nti mwabe omunsi zoona mubuliire engiri eddi ebitoonde byoona. ¹⁶ Aliikiriza nabatizibwa, yalirokoka, naye okataliikiriza omusaango gwaliimusiinga ¹⁷ Era obumanyisyo buni bwakwaabanga naabo aibikiriza: bakwiza kuppekaanga emizumu omwibara ryange; bakwiza kubazaanga endimi eziyaaka; ¹⁸ baalikwata okunjoka, nibakunywaanga ekiintu ekyikwitta, tikyabaakolenge kabbi nakadooli; bakwiza kuteekangaku emikono abalaire nibawona. ¹⁹ Awo omukama waiswe oYesu niyamaare okubaza nabo, natwaalibwa omwigguru, naikaara okumukono ogwa ddyo oggwa Nyamwanga. ²⁰ Baddi nibawuluka, nibabakobera woona woona, omukama waiswe akukoora amwei nabo era nga akugumya ekigambo mu bumanyisyo obwakyiriiranga. Amiina.