¹ Awo amangu ago nibwaikire emambya abakabona abakulu n'abakaire n'abawandiiki bamulukiiko boona nibateesa, nibabbwa o Yesu, nibamutwa, nibamuwaayo eddi o Piraato. ² Awo o Piraato namubulya nti niiwe omukama w'Abayuddaaya? nairamu namukoba nti Niiwe obazire. ³ Awo abakabona nibamulooppa ebinyamwingi. ⁴ Awo oPiraato namubuulya, era nga akukoba nti tokwiramu nakadooli? bona ebigambo biingi byebakuloppere. ⁵ Naye oYesu natairamu kigambo; o Piraato niyeewuunya nokwewuunya. ⁶ Awo okubugenyi yabaataisiryanga obbwe omwei gwebabbanga basabire, ⁷ awo waaliiwo omwei ayeteebwaanga o Balaba, ayabbwebweibwe naabo abajeemu abaittire abantu omukujeema okwo. ⁸ Awo ekibiinja nekiiza nekitandika okukoba o Piraato nka niyabakooranga. ⁹ Awo o Piraato nabairamu nga akukoba nti Mukwendya mbataisirye omukama wa Bayuddaaya? ¹⁰ Olwakubba yategeire abakabona abakulu abamwiirye obuyaaka. ¹¹ Naye abakabona abakulu nibeeyayiira ekibiinja nti o Balaba niye gwebabbababataisirya. ¹² Awo o Piraato nairamu nabakoba, nti alle namukola ntyai gwemweeta omukama wa Bayuddaaya? ¹³ Awo nibabazira aiguru nti ''mumukomeere!'' ¹⁴ Awo o Piraato nakoba nti kibbi ki kyakoore? naye nibeeyoongerera kaakyimwei okubazira aiguru nti mumukomeere. ¹⁵ Awo o Piraato niyaali akwendya okusemeerya ekibiina, nabataisirya o Balaba, nawaayo o Yesu okumukomeere nga bamaare okumukubba. ¹⁶ Awo abasirikale nibamutwala omunda omulubuga olwatwa Pulayitoliyo; nibeeta ekitongole kyoona okukumbaana. ¹⁷ Nibamuzwalikisya ekizwalo kya ffulungu. Nibakamba engule yamawa nibagimutuuka. ¹⁸ nibatandika okumulamukya nti mirembe omukama wa Bayuddaaya ¹⁹ Nibamukubba olubiingo omumutwe, nibamucweera ebicwantai. Nibafukamire nibamuramya. ²⁰ Awo nibamaare okumuduura nibamwambula olugoye olwa Ffulungu, nibamuzwalikisya ebizwalo byamwei, nibamutwala nibamuwulukya omunkomyo. ²¹ Nibasindiikirya omuntu ayaali akwakala, Simooni owa Kuleene, nga akuzwa omukyaalo, oite wa Alegezanda no Luufo okwaaba nabo okweitiika omusalaba gwamwei. ²² Nibamuleeta omukifo Gologosa, ekilutegeeza ekifo kya kyangala. ²³ Nibamuweerya omwenge ogutabwirweemu envuumbo, naye nagaana okugunywa. ²⁴ Awo nibamukomeera, nibeegabira ebizwalo byamwei nga bakubikubbira obuluulu buli muntu kyeyatwala. ²⁵ Olwo esaawa nizaikire eisatu nibamukomeera. ²⁶ ebbalula yamusaango gwamwei newandiikibwa aiguru nti "Omukama wa Bayuddaaya" ²⁷ Era n'abaibbi babiri nibabakomeera amwei naye; omwei okumukono gwaamwei ogulyo nowondi okugumoso. ²⁸ Olwo ekyawandiikibwe nekiikiira ekikoba nti nabaliirye amwei nabaasiisire. ²⁹ Awo abayakalanga nibamizuma nga bakuteengetya emitwe jaabwe, nibakoba nti, niiwe okumenya e Yeekaalu nogyombokera ennaku issatu. ³⁰ Werokole, ozwe okumusaalaba. ³¹ Era abakabona abakulu n'ebamuduura batyo n'abawandiiki bonkai na bonkai nibakoba nti yalokoire bandi; tayiinza kwerokola yeenkai. ³² O Kristo omukama wa Isiraeri azwe ati okumussalaba leke tubone twikirize. N'abaali bakomeereirwe naye nibamuzuma ³³ Awo esaawa zaali mukaaga niwabba ekiiruma okunsi yoona okwikya esaawa mwenda. ³⁴ Awo omusaawa eya mweendai o Yeso nakuunga neirakka erikooto nti Eroi, Eroi, Lama sabakusaani? ekyikutegeeza nti Nyamwanga wange, Nyamwanga wange, kiki ekikundeserye? ³⁵ Awo abamwei okwaabo abaali bemeereire awo nibakoba nti akweeta Eriya. ³⁶ Awo omwei nairuka nainika ekisuumwa omu vviinyo egikaatuki, nakitta okulubiingo namuweerya okunywa nga akukoba nti Leka tubone oba Eriya yaiza okumwanula. ³⁷ Awo o Yesu nakuunga neiraka erikooto naweeryaayo obwomi. ³⁸ Awo olutiimbe olwa mu Yeekaalu nilwonokamu akati okuzwa aiguru okwika ansi. ³⁹ Awoo omwami wakitongole ayaali ayemeereire awo nga amuliraine niyabweine nga awaireyo obwomi atyo, nakoba nti amazima omuntu onni abbaire mwaana wa Nyamwanga. ⁴⁰ Era waaliwo alai ku abamukali nga bakulengera: omwaabo mwaliimu n'oMalyamu Magudaleene, no Malyamu omaama wa Yakobbo omutto mutto no Yose, no Saalome; ⁴¹ Abo nibaali omu Ggaliraaya nibo bayaabanga naye nga bakumweereza, n'abakali abandi baingi abaninire naye eYerusaalemi. ⁴² Awo nibwaswekere, kubanga lwali lunaku lwa kuteekateeka ,nilwo lunaku olwekeera e Sabbiiti, ⁴³ oYusufu owa Alimasaya, omukulu ateesa owa kitiinisya, era yasuubiranga ye omwenyini obukama bwa Nyamwanga; naguma naingira ewa Piraato nga takutiina, nasaba omutuumbi gwa Yesu. ⁴⁴ Awo o Piraato niyeewunya nafwiire amangu, nayeta omwami wa kitongole namubuulya oba ekiseera kyakaaireku nga fiire ⁴⁵ Awo niyakiwuliire okuzwa eddiomwami, naweerya o Yusufu omutuumbi. ⁴⁶ Nagula olugoye olwa kitaani, namuyayo, namuziinga omulugoye olwo olwa kitaani, namutta omumbi eyasakirye omwandaara, nairingitya eibbaale okumulyango gwa mbi. ⁴⁷ Malyamu Magudaleene no Malyamu omaama wa Yose nibabona weyateirwe.