¹ Awoo niwali nga wakubulaku ebiro bbibiri, omukolo ogwokwakalaku nemigaati egitazimbulukukibwa ereke eikke; abakabona abakulu n'abawandiiki nibasala amagezi nkanibamukwaatamu omulukwe n'okumwitta. ² Kubanga bakobere nti tikulunaku lwa mbaga, leke watabbaawo kweikyaaka omubantu. ³ Awo niyaali omu Bessaniya omuntumba ya Simooni omugenge, nga aikire okummere, omukali eyaali ne kyuppa yamafutta aga musutai agabeei naiza, nayatya ekyuppa, amafutta nagasuka okumutwe gwaamwei. ⁴ Naye waliwo omwaabo abagongeire nga bakukoba nti amafutta gaffiire gatyai otyo? ⁵ Kubba amafutta gani bakusobwoire okugatuunda emppiiya ebikumi bisatu nokusingawo nokugabira abooro. Nibemulugunya. ⁶ Naye oYesu nabakoba nti mumuzweku, mukumunakuwaliza ki? ankoleire ekikolwa ekisai. ⁷ Kubba abaseegi mulinabo buliizo; buli nimyeendya musobila okubakola okusai: naye nje temuli naanje buliizo. ⁸ Akoore nkabwakusobola; asokere okusuka amafutta okumubiri gwange nga mukyaali kunziika. ⁹ Mazima nkubakoba nti engiri buli jiyabuulirwanga omunsi toona, neekyo omukali oni kyakoore kiribazibwangaku okumwizukira. ¹⁰ Awo o YudaIsukaliyoti, eyaali omwei oku ikumi nababiri, nayaba eddi abakabona abakulu; okumuwaayo gyebali. ¹¹ Awo nibawuuliire, tibasanyukire, nibamusuubiza okumuwa effeeza. Nasala amagezi nka niyabona ekiseera kya kumuwaayo. ¹² Awo okulunaku olwekereereire olwa migaata egitazimbisibwa, lwebetere Okwakalaku, abasengeeri bwamwei nibamukoba nti okwendya twabe ayii okutegeka jeewaalira okwakalaku? ¹³ Natuma abo okubaseengeeri baamwei babiri, nabakoba nti mwabe omukibugga, mwatangatangarana omusaiza nga yeetikire ensuwa y'amaize: mumuseengeerye. ¹⁴ Yoona yoona jiyaingira mukobe omukama wanyubba nti omwegesya akobere nti enyubba eriruddaki mwenaliira Okwakalaku n'ebegesebwa baange? ¹⁵ Akwiza okubalaanga ye omwenyini enyubba egikooto eyaiguru eyaliriirwe etegekeibwe: mututegekere omwo. ¹⁶ Awo abegesebwa nibaaba nibaiza omukibuga, nebabona nka niyabakobere: nebategeka Okwakalaku. ¹⁷ Awo nibwaswekere naiza ne ikumi nababiri. ¹⁸ Awo nibaali nga baikaire okummere, o Yesu nakoba nti mazuma nkubakoba nti omwei okunywe abakulya naanje yandyaamu olukwe; ¹⁹ nibaboneka okunakuwala n'okumukoba kyinoomwei ntiniinje? ²⁰ Nabakoba nti omwei eikumi nababiri akukozya naanje omulucuba niyoyo. ²¹ kubba omwana wamuntu akwaba nka nikyamuwandiikiibweku: naye zaalimusanga omuntu oyo alyamu olukwe omwaana wamuntu! kyakubbaire kisai eddi oyo singa tiyabyaaliibwe omuntu oyo. ²² Awo nibaali nga bakulya, nafuna omugaati, awo niyamaare okwebalya nagumenyamu, nabawa, nakoba nti Mukwaate; guno nigwo mubiri gwange. ²³ Nakwaata ekikoompe, awoo niyamaare okwebalya nabawa; nibakinywaaku boona. ²⁴ Nabakoba nti guni nigwo omusaayi gwange ogwa ndagaano, ogukuseenseka okulwa baingi. ²⁵ Mazima nkubakoba nti tinaalinywa te kubibala bya mizabbibi, okwikya okulunaku luddi lwendigunywa oguyaaka omubukama bwa Nyamwanga. ²⁶ Awo nibamaare okwemba olwembo, nibawuluka inbaaba okulusozi lwa Zeyituuni. ²⁷ Awo o Yesu nabakoba nti mukwakwesiittala nyweena: kubanga kyawandiikibwe nti Nalikubba omuliisya, n/entaama zaalisaasaana. ²⁸ Naye ninalimala omuwumbuukibwa, nalibebeembera okwaaba omu Ggaliraaya. ²⁹ Naye oPetero namukoba nti nebwekyabba nti boona bakwaba kwesittala, naye tininje. ³⁰ O Yesu namukoba nti Mazuma nkukoba nti we eleero, obwiire buni, onkoko yaabba nakyaalikukooka emirundi ebiri, okwa kuneegaana emirubi esatu. ³¹ Naye nayongera okubazza nti nebwekyabba nga kyikusaana okufweera amwei naawe, tinakweegaane nakadooli. Era boona nibakoba batyo. ³² Awo nibaiza omukifo eibara lyaakyo Gesusemane: nakoba abegesebwa baamwei nti mwikaare anni mmale okusaba. ³³ Natwaala o Peetero, no Yakobbo, no Yokaana naye, natandika okwewunaikya n'okutuntura omuno. ³⁴ Nakoba nti omwoyo gwange guluku enaku jiingi, ekwakunyitta; mube ani mubonie. ³⁵ Natambulaku kadooli nafukamira nasaba, oba nga kikusoboka ekiseera kimwakaleku. ³⁶ nakoba nti Aba, taata, byoona bikusoboka gyooli; nyiyaku ekikoompe kini; naye tinkaanje nekwendya naye we nka nokwendya. ³⁷ Awo naiza, nabasanga nga babbasirye, nakoba o Peetero, nti Simooni obbasirye? nabbaire namaani gakubonia na saawa emwei etii? ³⁸ Mubonie, musaba, muleke okwingira mukukemebwa: omwoyo gwo gukweendya naye omubiri gwo gunaki. ³⁹ Nairayo te, nasaba, nabaza ebigambo bimwei nabiddi. ⁴⁰ Nairate, nabasanga nga babbasirye, kubanga amaiso gaabwe gaali gakulemeera muno: tibamaite nka nibamwiiramu. ⁴¹ Naiza omulundi ogwakasatu, nabakoba nti mubbasirye kimwei ati muwumule: kyamala; ekiseerakyikire; bona, omwaana wa muntu akuwebwaayo omumikono gy'abalina ebibbi. ⁴² Mwimuke, twabe, bona, akundyamu olukwe alampi okwiika. ⁴³ Awo amangu ago, niyaali nga akyabazza, o Yuda, omwei okwikumi nababiri, naiza n'ekibiina amwei naye abaalina ebuso amwei n'emiigo, nga bakuzwa eddi abakabona abakulu, nabawandiiki n'abakaire. ⁴⁴ Era oyo ayamuliiremu olukwe yaali nabawaire akamanyisyo nti Gwenanywegera, nga niye oyo; mumukwaate, mumutwale nga mumugumirye. ⁴⁵ Awo niyaikire, amangu ago naiza jaali nakoba nti Labi; namunywegera muno. ⁴⁶ Nebamutekaku emikono gyaabwe, nibamukwaata. ⁴⁷ Naye omwei ku abo abaali bemeereire awo nayayo ekiso, natema omwiru wakabona okusiinga obukulu namusalaku okutwi. ⁴⁸ Awo o Yesu nairamu nabakoba nti munyiziire nka nimwiziira omwibbi; n'ebisso, n'emiigo okunkwaata? ⁴⁹ Buliizo naabbaanga nanywe omu Yeekaalo nga nkwegesya, kamuttakwaite: naye kyini kikoleibwe ebyawaandiikibwe biikiire. ⁵⁰ Awo boona nibamuzwaku nibairuka. ⁵¹ Awo omwojo omutto namuseengeerya, ayaali yeswekereirye olugoye olwa Kitaani lwonkai okumubiri: nibamukwaata; ⁵² naye nabalekera olugoye lwa Kitiini ,nairuka bwerere. ⁵³ Awo nibatwala o Yesu eddi okabona akusiinga obukulu: naibamukuumbaniraku abakabona abakulu boona n'abakaire n'abawandiiki. ⁵⁴ Awo o Pteteero namusengeererya alai, okwika omuluboga lwa kabona akusiinga obukulu; yaali naikaliire na beereza nga akwotta omuuro. ⁵⁵ Awo abakabona abakulu n'abamulukiiko boona nibatolererya oYesu abajuurwa abakumwitisya naye nibatabona; ⁵⁶ kubanga abamuwamgiriirye ebyabubeyegi baingi, ate n'okuwangiirya kwaabwe tikwaali kumwei. ⁵⁷ Awo abamwei nibaika nibamuwanggirya, nga bakukoba nti; ⁵⁸ swe twamuwuliire nga akukoba nti nje nalimenya e Yeekaalo eni eyakoleibwe nemikono, n'omunaku isatu nalyomboka egiindi etaalikolebwa namikono. ⁵⁹ ate n'okuwangiirya kwabwe okwo tikwwaali kumwei. ⁶⁰ Awo okabona akusinga obukulu ayemeera akati, nabuulya o Yesu, nga akukoba nti We tokwanukula nakadooli? kiki kyebakulumiirya bani? ⁶¹ Naye nasirikambe, natairamu nakadooli. Era okabona akusiinga obukulu namukoba nti We Kristo, omwaana woyo aya weirwe omukisa? ⁶² o Yesu namukoba Ninji oni; namwe mulibona omwana wa muntu nga aikaire okumukono ogwa ddyo ogwamaani nga akwiiza n'ebiiguru byaiguru. ⁶³ Awookabona akusiinga obukulu nayonola ebizwaalo byamwei, nakoba nti tukwenderyaki abajuurwa? ⁶⁴ Muwuliire obuvvoozi bwamwei: mukulowooza mutyai? boona nibamusaara omusango nga asaine kuffa. ⁶⁵ Awo abamwei nibatandika omucweera ebicwantai, n'okumusweeka omumaiso, nokumukubba ebikoonde, n'okumukoba lagula: abeereza nibamutwa nga bakumukubba emppi. ⁶⁶ Awo o Peteero niyaali ansi omulubuga, omwei okubakali bakabona okusiinga obukulu naiza; ⁶⁷ Awo niyabweine o Peteero nga akwoota omuuro, namuloleera, nakoba nti Naawe waali n'omunazaalesi, o Yesu. ⁶⁸ Naye ye niyeegaana nga akukoba nti timaite, ate tenkumanya kyokubazaku: nayaba enzai omu kusasi; onkoko nakooka. ⁶⁹ Awo omukali namubona, natandika te okubakoba abaali nibeemeereire awo nti oni yeena waabwe. ⁷⁰ Naye niyeegaana era. Awo niwayakairewo ekiseera kidooli, abaali nibeemereire awo nibakoba o Peteero era nti Mazuma oli waawabwe kubanga oli muGgaliraaya. ⁷¹ Naye natandika okuceena n'okulayira nti Temumaite omuntu oni gwe mukubazaku. ⁷² Amanga ago onkoko nakooka omulundi ogwa kabiri. Awo o Peteero naizukira ekigambo o Yesu kyeyamukobere nti Onkokoyaabba nga akyali kukooka emirundi ebiri, okwakunegaana emirundi esatu. Kale niyalowoize nakuunga amaliga.