¹ Abasaiza abaluganda nabasebo, muwuure ensonga gye mbalowoozera naati: ² Nebawuliire nga abalize omululimi olwebbulaniya nebeyongera okusirikira nabakabaka nti, ³ Nje ndi Muyudaaya eyabyaliibwe omu Ttaluso ekya Kerukiya, naye eyaleerwe mu kibugga Mukyangabugga muni okumagulu ga Gamalyeri eyayegeseeibwe muno empisa za mateeka ga bajjejja, ⁴ nembanga nobwiiya bwa Nnyamwanga nka nywe ni muli ereero: nenjaguzaanga omwanda guni nokubaita, nga mbasiba era nokubateeka omunkomyo abasaiza na bakali, ⁵ era nakoba Akira niye mujuurwa wanga amwei nabakaire boona: Era boona nebampa e bbaluwa eddi abaluganda ni batambula okwaaba e'Damasiko ababbeireyo bbaletibwe mu Yerusaalemi nka abasibe okubonerezebwa. ⁶ Awoo olwaikire ninaali nkutambula nga ndampi okwiika e'Damasiko omukaiyaangwe amangu ago akanyango akaingi kazwiire omwiguru ne kayaka era ne kanetooloola: ⁷ Ningwa ansi, nempuura e doboozi nga rikunkoba nti Sawulo, onyiganyiryaki? ⁸ Nje ninyiramu nti niiwe naani, mukama wange? Nankoba nti ninje Yesu omunazaleesi gwoyigganya we. ⁹ Abaali amwei nanje ne babona eisana, naye nebatawura eiraka ryooyo abaza nanje. ¹⁰ Nenkoba nti nakola ntyai, mukama wange? Mukama waiswe nakoba nti imuka, oyabe e Damasiko, wakoberwaayo ebigambo ebyo byoona bye walagiirwe okukola. ¹¹ Bbwe ntasoboire kubona olwa kitinisya kyaisana liddi, nekwatibwa oku mukono abo abaali nanje nenyika omu Damasiko. ¹² Omuntu omwei eibara ryamwe Ananiya atiina o'Nnyamwanga amateeka, ayasimiibwe Abayudaaya abaikala eyo. ¹³ Naiza gyendi nayemeera weendi nankoba nti waluganda Sawulo, lubulya. Mukiseera ekyo nimboniya okumuola. ¹⁴ Nakoba nti Nnyamwanga wa baziiza baiswe yakomerye wetejje ebyo byakweendya, era obona omwiiri oddi, era owure eiraka erikuzwa omumunwa gwaamwe. ¹⁵ kubba wabbanga mujuurwa wamwwe eddi abantu boona olwa bigambo bbyoboine ne byowuliire. ¹⁶ Kale naatii ekikulwiisya kiki? ¹⁷ Awoo olwaikire ninaire e Yerusaalemi, ninaali nkusaba omuyeekalu omwoyo gwange negwinduka. ¹⁸ nimubona nankoba nti yanguwa ozwe mangu omu Yerusaalemi, kubba tebalikiriza we kubategeeza ku nje. ¹⁹ Nanje nimukoba nti mukama wange, bbo bbenyini bamaite nti ninje nabatekaanga omu nkomyo era nga nabakubiranga mu buli inkumbaniro abakwikiriza; ²⁰ era nga nomusayi gwa mujuurwa waamu o Sitefano ni gwasensekere, njena kenyini naali nga inyemereeire awo,nga nsimiire, nga nkuuma ebizwaalo bbya bamwitire. ²¹ Nankoba nti yaba: kubba nje nkwaaba kutuma alai amawanga. ²² Nebamuliirya okwiicca oku kigambo kini ne baimucca amaraka gaabwe nga bakoba nti ayiibwe ayisana atyo. kubba tikise abbe mwoomi. ²³ Bwebaali nga bakubaliza aiguru no kasuka engoye zaabwe, era nga bakududumula occuucu iguru. ²⁴ Omusaiza omukulu nalagira okumuleeta omu kiggo, nakoba okumukemerya ne miiggo alyooke ategeere ensonga gye bamujunainiye okubaliza aiguru oku ye atyo. ²⁵ Nibaali bamaare okumusiba enkobba, o'Pawulo nakoba omusaiza eyaali ayemereeire ampi nti tikya muziro nnywe okubba omuruumi akyaali kusaarwa musango. ²⁶ Omusaiza niyawuliire nakobera omusaiza omukulu, namukoba nti okwaaba kolaki?Kubba omuntu oni muruumi. ²⁷ Omusaiza omukulu nayaba gyaali, namukoba nti nkobera, we oli muruumi? nakoba nti mananu. ²⁸ Omusaiza omukulu nairamu nti nje nafunire oburuumi bbuni ne biintu binyamwingi. O'Pawulo nakoba nti naye nje nimwo nabyaliirwe. ²⁹ Awoo amangu ago ni bamuleka abaali bakwaaba oku mukemerya eera no musaiza omukulu natiina niyamaare okutegeera nti muruumi, kubba yaali amusibire. ³⁰ Naye oku kiro kya kabiri, nimwo yenderye okumanya amazima ensonga Abayudaaya gye bamulagiire okumuloopa, ne bamusindabula nalagira abakabona abakulu nolukiiko lwoona okumabbana, naleeta o'Pawulo namuteeka omu maiso gaabwe.