¹ Omu biro ebyo omukama Kerode yagooloire emikono okola okubbi abamwei abamukanisa. ² Naitta ne mpirima o'Yakobo omuganda wa Yokkaana. ³ Awoo niyaboine nga Abayudaaya nga bakisiimire, niyeyongera okukwaata n'oPeetero nizo ennaku aza migaatti ezitazimbulukusiibwe. ⁴ Niyamaare okumukwaata, namuteeka omu nkomyo namuwaayo eddi abaseruukale eikumi n'omukaaga okumukuuma kinnabane nga akweendya oku mutwaala omu maiso ga baantu okuyaku nga kuweeire. ⁵ Awoo o'Peetero nakumibwa omu nkomyo, naye aba kanijsa ni bekaamba okumuwoya eddi o'Nnyamwanga. ⁶ Okulunaku o'Kerode lwe yabbaire akwendya okumutwaalayo, omu kiro ekyo o'Peetero yabbaire nga abbasibrye akati omu basirikale bbabiri nga asibiibwe ne njegere ibiri, babbaire ku lwiige nga bakuuma enkomyo. ⁷ Bbona omalaika wa mukama nayemeera ggyali, akutangaala ne kwizula e kiseenge, nakubba o'Peetero omu mbiriizi namwimula nga akoba nti imuka mangu. enjegere ne zizwwa oku mukono ne zigwa. ⁸ Omalaika namukoba nti ni wesibe ozwaale enkaito zaamu nakola atyo. Namukoba nti ni zwaala ekizwaalo kyaamu onsengeerye. ⁹ Nawuluka, namuseengerya, nolwekyo tiyamanyanga mananu o malaika byaakore, naye yaloweeze nti ni yabweeine okwolesebwa. ¹⁰ Nebayakaire oku bakuumi abasookeirweku nabakabiri ne baika oku lwiige lwa kyooma nilwakalwaaku okwiika omu kyangabuga, nilwiguka lwonkai; nibawuluka ne bakala omu nzira amwe amangu ago omalaika namuleka. ¹¹ O'Peetero nairamu nakoba nti ni ati ni ntegeeire amananu nga omukama waiswe atumire omalaika nanyiya omu mukono gwa Kerode nokusubira kwoonakwona okwaiyanga lya Bayudaaya. ¹² Niyalowoozere naiza omu nyumba eya malyaamu eyali omaama wa Yokaana eiibara ryamwe eryakabiri Mako, mwebabbaire bbakumbaniire abaingi nga bbakuramya. ¹³ O'Peetero niyakonkoine oku lwiige lwa mulyaango omuzaana naiza okwetebuka, eyibara ryamwe niye Looda. ¹⁴ Niyategeeire eiraka rya Peetero nataigulawo lwiige olwa sanyu, naye nangira mbiro nakoba nti ni o'Peetero ayemereeire enzai oku lwiige. ¹⁵ Nibamukoba nti ni olalukire. yeena nakatiriza nti nimwo. nibamukoba nti ni niye malaika waamwe. ¹⁶ Naye o'Peetero niyeyoongera okonkona, awo nibaigwiirewo nibamubona ni basamaalirira. ¹⁷ Naye niyasimire nomukono oku sirika, namukoba omukama waiswe namwiyiire omu nkomyo. Namukoba nti ni imukobere ebyo o'Yakobo nabaluganda nazwaayo nayaba omu kifo ekiindi. ¹⁸ Awoo nibwaakaire emaambya, abasirikale nibeegugumula muno nti o'Peetero abbaire ki? ¹⁹ O'Kerode ni yamutolereeirye natamubona nabuulya abakuumi nalagira okubataaisya. Nazwa omu Buyudaaya okubba e Kaisaaliya naikaara eyo ²⁰ Nasunguwala muno aba Ttuulo naba Sidoni; nebaiza jjaali nomwooyo gumwe nebakwanagana na Bulasito omukulu wa mu nyumba ya mukama, nibasaba okubawa bya munsi ya mukama. ²¹ Awoo oku lunaku olwalaganisiibwe O'Kerode nazwaala e bizwaalo bya bukama naikaara oku ntebe, nabaza ebigambo. ²² Abantu boona nibabazira aiguru nti ni eryo iraka rya mukama, ti rya muntu. ²³ Amangu omalaika wa mukama namukubba kubba tawaaire Nnyamwanga kitinisya naliibwa abagino naffa. ²⁴ Naye ekigambo kya Nnyamwanga ne kikula nekyeyongeranga. ²⁵ Balunabba no Sawulo nebaira okuzwa e Yerusaalemi, ne bamaare okwikiirya okuweereza kwaabwe, ne baleeta o'Yokaana eibara ryamwe e ryakabiri nga niye Mako.