¹ Waliwo omuntu omu Kayisaliya, lyamwei Kaluneeriro, omwami wa kitongole ekyayetebwaanga Ekitaliano, ² Omwetejeerya atiina o'Nnyamwanga amwei n'enyumba yamwe yoona, eyagabaanga ebintu ebinyamwiingi omu bantu naramyanga o'Nnyamwanga ebiro byoona. ³ Oyo nabona omu kubonekerwa okwa lwaatu nk'omusaawa omweenda eza misana, omalaika wa Nnyamwanga nga akumwingiriira nga akumukoba nti Koloneeriyo, ⁴ namwegendereza n;amaiso gaamwe natiina, namukoba nti kiki mukama wange? okuramya kwaamu n'okwewaayo kwaamu bbininire olwakwizukirya amaiso ga Nnyamwanga. ⁵ Era atti ttuma omuntu e Yopa, oyeteyo omuntu o'Simooni eibara ryamwe erya kabiri Peetero. ⁶ Yo yakyaliibwe omuntu o'Simooni omubaagi wa bisaato ne nyumba yamwe eriraine oku nyanja. ⁷ Omalaika yabazire naye niyaabire, nayeta abiru baamwe babiri abamunyumba n'omusirikale akutiina o'Nnyamwanga omw'abo abamuwerezanga bbuli kiro; ⁸ niyamaare okubakobera ebigambo byoona, nabatuma e Yopa. ⁹ Awo omu kiro ekya kabiri, nibaali nga bakutambula bbo nga bbalyampi okwiika oku kibugga, o'Peetero naniina aiguru oku nyumba okuramya omu ssaawa omukaaga. ¹⁰ Nalumwa enzala nayendya okulya, naye ni baali ba kwibula, omwoyo gwamwe ne guyindulwa, ¹¹ nabona eiguru nga lyeswekwiire, ekitundu nikimuninukira nga kikwisana eisukka erikooto nga likwatiibwen oku bireenge binai okuninuka, ndi ninuka ansi. ¹² Omwaali ebisolo byoona ebirina amagulu annai ni byekuruundya ebya kunsi nebinyonyi ebyamwiibbanga. ¹³ Eiraka neriiza eddi jaali nti imuka, Peetero osale oolye. ¹⁴ Naye o'Peetero nakoba bbe mukama wange; kubba tendyanga kya muziro kaabbe ekibbi. ¹⁵ Eiraka ate neriza jaali omulundi gwa kabiri nti o'Nnyamwanga bye yasayiriirrye tobifuulanga kubba bya miziro. ¹⁶ Nikyibba kityo emirundi esaata; amangu ago ekintu ne kitwalibwa omwiguru. ¹⁷ Awo o'Peetero niyebwiirye bwiirye omunda yaamwe amakulu gakubonekerwa kwaboine ne kuli, bbona, abantu abatumiibwe o Koluneeriyo, nibamaare okubuulya enyumba ya simooni, ni bemeera oku lwiige, ¹⁸ nibeete ni babuulyanga o Simooni neibara ryamwe aryakabiri Peetero, yakyalisiibwe omwo. ¹⁹ Awo o'Peetero niyaali nga akulowooza okukubonekebwa, omwoyo namukoba nti, bona abantu bassatu bbakuswaagana. ²⁰ Naye imuka oninuke oyabe nabo nga nga tokwebuulyabuulya kubba ninje mbasindikire. ²¹ o'Peetero naninukka eddi abantu nabakoba ntibona ninje gwe mukutoolya; kiki ekibaletere? ²² Nebakoba nti o'Koloneeriyo omwami, omuntu omwikiiri, atiina o'Nnyamwanga eyasimirwe omwiyanga ryoona ery Bayudaaya yalabwiirwe omalaika omweruki okukutumira okukwiiza omu nyumba yamwe, owure egambo ebikuzwa omu we. ²³ Awo nabaingirya nabaaniriza. Awo oku kiro kya kabiri OPeetero naimuka naimula omwei nabo nabaluganga abaamwe aba mu Yopa ne baaba naye. ²⁴ Awo ekiro kya lwa kabiri nibaingira omu Kaisaliya oKoloneeriyo yaali nga akubalindiirya nga akumbainiye abakika kyaamwe nabaali abnwaani baamwe omuno. ²⁵ Awo o'Peetero niyaali alaampi okwingira, o'Koloneeriyo namwaaja, namufukaamiira oku magulu namusiinza. ²⁶ Naye o'Peetero namwimukya nga akoba nti yemeera; nanje ndi muntu buuntu. ²⁷ Nga akubaza naye naingira nayajja baingi nga bakumbaine, ²⁸ nabakoba nti mumaite nga tikise omuntu o'Muyudaaya okweegaita noweiyanga erindi oba okwiiza gyaali; era o'Nnyamwanga yandangire ndemenge okweeta omuntu yeena owa muziro oba omubbi. ²⁹ Nikyo nzwiire nnyiza ni ntagaana ni neteeibwe. Nikyo nzwa mbuulya nti kiki ekinyeteserye? ³⁰ Awo o'Koloneeriyo nakoba nti ati wakakalawo ebiro binnainaali nga nkuramya, okwiicca omu ssaawa eya mweenda omunyumba yaange; bbona, omuntu nayemeera omu maiso gaange nga ayina engoye ezikupirikita. ³¹ Nakoba nti, Koloneeriyo, okuramya kwaamu kwawuliirwe, okweweryaayo kwamu ni kwizukirya amaiso ga Nnyamwanga. ³² Ale tuma e Yopa oyete oSimooni eibara ryamwe eryakabiri Peetero; eya kyalisiibwe omu nyumba ya Simooni omubaagi wa bisaato eddi ampi ne nnyanja; ³³ Awo amangu ago ni nkwetesya nokola kusai noizire. kale ati tulyaani isweena omu maiso ga Nnyamwanga tuwuliire bbyoona byolagiirwe omukama. ³⁴ Awo o'Peetero nayasamya omwoyo gwaamwe nakoba nti mazima ntegaire nga o'Nnamwanga tasoroora mu baantu; ³⁵ Naye omwiyanga ryoona ryoona amutiina nakola obwikiiri amwikiriza. ³⁶ Ekigambo kye yatumiire abaana ba Israeri nga akubuuliira emirembe omu Yesu kurisito [niye omukama wa bintu byoona]. ³⁷ Nywe mukimaite, ekyabaziibwe ekyaali omu Buyudaayabwoona, ekyasookeire omu Ggaliraaya oluzwanyuma lwakubatiza kwe yakobeeire o'Yokaana, ³⁸ O'Yesu omu Nazaleesi o'Nyamwanga ni yamusukireku amafuta nomwoyo akweera namaani; eyatambulaanga nga akukola kusai.Nga akuwonya boona abajjogwaanga o sitani, kubba o'Nnyamwanga yaali naye. ³⁹ Naiswe tuli bajuurwa ababigambo byona bye yakoore omu nsi ya ba Yudaaya nomu Yerusaalemi; oyo nibamwiita ni bamuwanikire oku musaale. ⁴⁰ O'Nnyamwanga namuyiimboola oku kiro ekya kassatu namukoba mu lwaatu, ⁴¹ ti buli muntu nti yeena abba mujuurwa, o'Nnyamwanga be yakomerye oku lwekereeirye, niiswe abaliire ni tunywa naye ni yamaare okuyiimbooka omu bafu ⁴² Natulagira okukobera abantu nokutegeeza nka oyo o'Nnyamwanga gwe yalagiire okubba omusali wa musango ogwa boomi nabaffu. ⁴³ Oyo abba mulangi, boona bamulangirireku nga bbuli akumwikiriza akwiyibwaku ekibbi olwaibara ryamwe. ⁴⁴ Awo o'Peetero niyaali akyabaza ebigambo ebyo omwoyo akweera nabagwaaku boona abawuliire ekigambo. ⁴⁵ Ne basamaalirira abaikiriza abakomole, boona abaizire noPeetero, kubba nomumawaanga ekisembo kya mwoyo ogwikiiri kisukiibwe. ⁴⁶ Kubba abawuliire nga bakubaza endimi ne bagulumiza o'Nnyamwanga. Awo o'Peetero nairamu nti, ⁴⁷ omuntu ayiinza kugaana amaizzi bbai ni batabatizibwa, bbani bbawereibwe omwoyo akweera nkaiswe? ⁴⁸ Nalagira ababatiziibwe okwingira omwibara rya Yesu okurisito. Oluzwanyuma nibamwegayiira okumalayo ebiro biingi.