¹ Kiggwaniire okwenyumiriza, niwankubaire nga tikusaana, naye kannyabe omukwolekyebwa n'okuswekuurwa kwa Mukama waiswe. ² Mmaite omuntu omu Kristo, emyaka eikumi n'enai(14) ejakaairewo eyatwaliibwe omwigguru erya kasatu, oba omububiri, oba timububiri ttimaani Okanca niye maani. ³ Era tiimaani otti omuntu oyo mu bubiri oba ti mu bubiri ttimaani Okanca niye maani. ⁴ Niyatwaliibwa omulusuku lwa Kanca, nawaliire ebigambo ebitabazika, ebitasaanire muntu kubyatula. ⁵ Ku lwa omunt oyo nneenyumirizanga, naye okubwange tinkyenyumirizamu wazira omubyabanaki bwange. ⁶ Kuba singa nayenderye okwenyumirizanga, ttinandibaire musirusiru kubbanga mba nkubaza mazima, naye mbireka omuntu yenna aleke okulowooza kunje okusinga kyakubonamu oba kyakuwuura gyendi. ⁷ Naye olwo okunziyiza okwegulumiza omuno olw'ebyo ebyanswekuliirwe, nikyo nazwiire mpeebwa eiwa mu bubiri, omukwenda wa sitaani okumbonyabonya, ndemenge okugulumiza emuno. ⁸ Emirundi esatu nkwegaayira Mukama ekigambo ekyo kinzweku. ⁹ Nagamba nti '' Ekisa kyange kikumala kubbanga amaani gange gaikiira omu bunaku.'' Nikyo nazwiire n'ennyumiirya n'obusagaruki obwingi olwabyabunaki bwange, amaani ga Kristo galyoke gasiisire ku nje. ¹⁰ Kale ola Kristo niikyonzwa nsayukira obunaki okwiziriiranga ekyejjo, okwendyanga okwigibwanga okugadanga okulangibwanga nk'Okristo kubbanga nimba omunaki nimwo mba owamaani. ¹¹ Mbaire musirusiru ni nywe mwa mraliriize kibanga nagwaniire nywe okutendereza, kubbanga niwankubaire nje tindina kintu naye abatume abo abakulu omuno, tibasinga mu kigambo kyonna. ¹² Mazima obulaangi bwabakwenga bwakorwanga amwe omukwikiriza kwinna mu bubonero n'ebyamagero n'ebyamaani. ¹³ Kubbanga kiki ekanisa eziindi zabasinganga, okwiyaku nje njenkai obutalemeerwa? Munsasiire ekibbi ekyo. ¹⁴ Bona omulundi ogwakasatu atti nneeteketeekere okwiza gye muli, so tindibalemeerya, kubbanga tinkutoolya byanywe, wazira nywe kubbanga tizigwaniire baana okubikiiranga abakaire wazira abakaire okubikaanga abaana. ¹⁵ Ndiwaayo ebyange nanje ndyewerayo kimwei ku lwanywe, nga ndi musanyuki. Kale nimbendya omuno ninywe esaana okuyendya atti? ¹⁶ Mukwikiriza nti nje tinabalemeraire, naye ni naali omugerengetanya, nabatega omu lukwe ni mbakwatisya. ¹⁷ Wabwo amagoba gi nnatunire okuzwa gye muli okwakala omwabo benabatumiire? ¹⁸ Neegayirire tito okwaba, era ni ntuma ow'aluganda rea owoondi amwei naye tito yafunire amagoba gonna okuzwa gye muli? Ye nanje tetwakoleire mu mwooyo gumwei? Tetwatambuliire mu kisiinde kimwei? ¹⁹ Obwairai tuloowize nkaiswe twewozeera omu maiso gamwei? Omu maiso ga Kanca tubazira mu Kristo. Naye byonna abamukago, tubaza bya kubomboka nywe. ²⁰ Kubbanga ntiniire ni ndiiza nkaazi okubasanga nga mukwisana bwe ntakwendya, njena nywe mulimwe okusanga nga nkwisaana nga nkwisana nka bwe mutakwendya kanda ni wabaawo okulwanna, obwiiya, obusungu, empaka, olukabwe, okugeeta, okweimuula, n'okajeema. ²¹ Era nkutiina nindiiza era, Okanca wange alintowaaza omu maiso ganywe nanje ni nakuwaara abaingi abasiisiire eirai ni bateenenya obugwagwa n'obusyani n'okusyana ni bakoore.