¹ Ntumula amazima mu Kristo timbeeya, omwoyo gwange nga guntegezerya mu Mwoyo Omutuukuvu, ² nga nina enaku nyingi n'okulumwa okutamala mu mwoyo gwange. ³ Kubanga nanditakire nze mwene okukolimirwa Kristo olwa bagande bange, ab'ekika kyange mu mubiri: ⁴ niibo Baisiraeri abaweebwa okufuuka abaana, n'ekitiibwa, n'endagaanu, n'okuteekerwa amateeka, n'okuweerezanga Katonda, n'ebyasuubiziibwe; ⁵ abalina bazeiza abo, era omwaviire Kristo mu mubiri, afuga byonabyona, Katonda atenderezebwa emirembe gyonagyona. Amiina. ⁶ Naye ti kubbanga ekigambo kya Katonda kyaviirewo. Kubanga abava mu Isiraeri, ti ba Baisiraeri bonabona: ⁷ so ti kubbanga niilyo eizaire lya Ibulayimu, kyebaviire babba abaana bonabona: naye, mu Isaaka eizaire lyo mwe ryayeterwanga. ⁸ Niikwo kukoba nti abaana ab'omubiri, abo ti niibo abaana ba Katonda; naye abaana b'okusuubiza niibo ababalibwa okubba eizaire. ⁹ Kubanga ekigambo kino niikyo eky'okusuubiza, nti Ng'ebiseera ebyo bwe biri ndiiza, no Saala alibba n'omwana. ¹⁰ Naye ti n'ekyo kyonka; era naye no Lebbeeka bwe yabbaire ekida ky'omumu, Isaaka zeiza waisu ¹¹ kubanga nga akaali kuzaalibwa, so nga bakaali kukola kisa oba kibbiibi, okuteesia kwa Katonda mu kulonda kaisi kugume, ti lw'ebikolwa, wabula ku bw'oyo ayeta, ¹² n'akobebwa nti Omukulu alibba mwidu wo mutomuto. ¹³ Nga bwe kyawandiikiibwe no Yakobo n'amutakire, naye Esawu n'amukyawire. ¹⁴ Kale twatumula tutya? Obutali butuukirivu buli eri Katonda? Kitalo. ¹⁵ Kubanga akoba Musa nti Ndisaasira gwe ndisaasira, gwe ndikwatirwa ekisa gwe ndikwatirwa ekisa. ¹⁶ Kale kityo ti ky'oyo ataka waire airuka, wabula kya Katonda asaasira. ¹⁷ Kubanga ebyawandiikibwa bikoba Falaawo nti Kyenaviire nkwemererya, kaisi ndage amaani gange mu iwe, era eriina lyange kaisi libuulirwe mu nsi gonagyona. ¹⁸ Kale kityo asaasira gw'ataka okusaasira, era akakanyalya gw'ataka okukakanyalya. ¹⁹ Kale wankoba nti Kiki ekimunenyesia ate? Kubanga yani aziyiza by'ataka? ²⁰ Naye ekisinga, iwe omuntu, niiwe ani awakana no Katonda? Ekibumbe kirikoba eyakibumbire nti Kiki ekyakunkolerye oti? ²¹ Oba omubumbi obula buyinza ku ibbumba, mu kitole kimu okukola ekibya uekimu eky'ekitiibwa, n'ekindi eky'ensoni? ²² Kiki, oba nga Katonda bwe yatakire okulaga obusungu bwe, n'okumanyisia obuyinza bwe, yagumiinkirizirie n'okulindirira einu ebibya eby'obusungu ebyateekeirweteekeirwe okuzikirira: ²³ kaisi amanyisie obugaiga obw'ekitiibwa kye ku bibya eby'okusaasirwa, bye yateekeireteekeire eira ekitiibwa, ²⁴ niiye ife, n'okweta be yayetere, ti mu Bayudaaya bonka, era naye no mu b'amawanga? ²⁵ Era nga bw'atumula mu Koseya nti Ndibeeta abantu bange, abatali bantu bange; Era atatakiibwe, atakiibwe. ²⁶ Awo mu kifo kye bakobeirwemu nti Imwe timuli bantu bange, Mwe balyeterwa abaana ba Katonda omulamu. ²⁷ Era Isaaya atumulira waigulu ebya Isiraeri nti Omuwendo gw'abaana ba Isiraeri oba gulibba ng'omusenyu gw'enyanza, ekitundu ekirisigalawo niikyo ekirirokoka: ²⁸ kubanga Mukama alikola ekigambo kye ku nsi, ng'akituukirirya era ng'akisalaku. ²⁹ Era nga Isaaya bwe yasookere okutumula nti Singa Mukama Ow'eigye teyatulekeirewo eizaire, Twandifuukire nga Sodomu, era twandifaanayiziibwe nga Gomola. ³⁰ Kale twatumula tutya? Nti ab'amawanga, abatasengereryanga butuukirivu, baatuuka ku butuukivu, niibwo butuukirivu obuva mu kwikiriya; ³¹ naye Isiraeri, mu kusengereryanga amateeka ag'obutuukirivu, teyatuukire ku mateeka gadi. ³² Lwaki? Kubanga tebabusengereryanga nga beema mu kwikirirya, wabula nga mu bikolwa. Beesittala ku ibbaale eryo eryesitalwaku: ³³ nga bwe kyawandiikiibwe nti Bona, nteeka mu Sayuuni eibbaale eryesitalwaku n'olwazi olugwisia: Era aikirirya oyo talikwatibwa nsoni.