¹ Kale atyanu babulaku musango abali mu Kristo Yesu. ² Kubanga eiteeka ery'Omwoyo gw'obulamu mu Kristo Yesu lyanfiire ow'eidembe okuntoola mu iteeka ly'ekibbiibi n'ery'okufa. ³ Kubanga amateeka kye gatayinza, kubanga manafu olw'omubiri, Katonda, bwe yatumire Omwana we iye mu kifaananyi ky'omubiri ogw'ekibbiibi era olw'ekibbiibi, n'asalira omusango ekibbiibi mu mubiri: ⁴ obutuukirivu bw'amateeka kaisi butuukirizibwe mu ife, abatatambula kusengererya mubiri, wabula omwoyo. ⁵ Kubanga abasengererya omubiri, balowooza by'omubiri: naye abasengererya omwoyo, byo mwoyo. ⁶ Kubanga okulowooza kw'omubiri niikwo kufa; naye okulowooza kw'omwoyo niibwo bulamu n'emirembe: ⁷ kubanga okulowooza kw'omubiri niibwo bulabe eri Katonda; kubanga tekufugibwa mateeka ga Katonda, kubanga n'okusobola tegakusobola: ⁸ n'abo abali mu mubiri tebasobola kusanyusia Katonda. ⁹ Naye imwe temuli mu mubiri, wabula mu mwoyo, oba ng'Omwoyo gwa Katonda atyama mu imwe. Naye omuntu bw'atabba na Mwoyo gwa Kristo, oyo ti wuwe. ¹⁰ Era oba nga Kristo ali mu imwe, omubiri nga gufiire olw'ekibbiibi; naye omwoyo niibwo bulamu olw'obutuukirivu. ¹¹ Naye oba nga Omwoyo gw'oyo eyazuukizirye Yesu mu bafu atyama mu imwe, oyo eyazuukizirye Kristo Yesu mu bafu, era n'emibiri gyanyu egifa aligifuula emiramu ku bw'Omwoyo gwe atyama mu imwe. ¹² Kale, ab'oluganda, tulina eibbanja: omubiri ti niigwo gutubanja, okusengereryanga omubiri: ¹³ kubanga bwe mwasengereryanga omubiri, mwaba kufa; naye bwe muwafiisianga ebikolwa by'omubiri olw'Omwoyo, mulibba balamu. ¹⁴ Kubanga bonabona abakulemberwa Omwoyo gwa Katonda, abo niibo abaana ba Katonda. ¹⁵ Kubanga temwaweweibwe ate mwoyo gw'obwidu okutya, naye mwaweweibwe Omwoyo ow'okufuuka abaana, atukungya nti Abba, Itawaisu. ¹⁶ Omwoyo mwene wamu n'omwoyo gwaisu ategeeza nga tuli baana ba Katonda: ¹⁷ naye bwe tuli abaana, era tuli basika: abasika ba Katonda, era abasikira awamu no Kristo; bwe tubonaabonera awamu, era kaisi tuweerwe wamu ekitiibwa. ¹⁸ Kubanga ng'era ng'okubonaabona okw'omu biseera bya atyanu nga tekutuuka kwenkanyaankanya n'ekitiibwa ekyaba okutubikulirwa ife. ¹⁹ Kubanga okulingirira einu okw'ebitonde kulindirira okubikulirwa kw'abaana ba Katonda. ²⁰ Kubanga ebitonde byateekeibwe okufugibwa obubulamu, ti lwo kutaka kwabyo wabula ku bw'oyo eyabifugisirye mu kusuubira nti ²¹ era n'ebitonde byeene byoona biriweebwa eidembe okuva mu kufugibwa okuvunda okuyingira mu idembe ery'ekitiibwa ky'abaana ba Katonda. ²² Kubanga tumaite ng'ebitonde byonabyona bisinda era birumirwa wamu okutuusia atyanu. ²³ Era ti niikyo ekyo kyonka, naye era naife, abalina ebibala ebiberyeberye eby'Omwoyo, era naife tusinda mukati mwaisu, nga tulindirira okufuuka abaana, niikwo kununulibwa kw'omubiri gwaisu. ²⁴ Kubanga twalokokere lwo kusuubira: naye ekisuubirwa okiboneka ti kusuubira: kubanga yani asuubira ky'abonaku? ²⁵ Naye bwe tusuubira kye tutabonaku, tukirindirira n'okugumiinkirizia. ²⁶ Era kityo Omwoyo atubbeera obunafu bwaisu: kubanga tetumaite kusaba nga bwe kitugwanira: naye Omwoyo mwene atuwozererya n'okusinda okutatumulikika; ²⁷ naye akebera emyoyo amaite okulowooza kw'Omwoyo bwe kuli, kubanga awozererya abatukuvu nga Katonda bw'ataka. ²⁸ Era tumaite nti eri abo abataka Katonda era abayeteibwe ng'okuteesia kwe bwe kuli, ebintu byonabyona abibakolera wamu olw'obusa. ²⁹ Kubanga bwe yamanyire eira, era yabaawiire ira okufaananyizibwa n'engeri y'Omwana we, abbenga omuberyeberye mu b'oluganda abangi: ³⁰ era be yayawiire eira, abo era yabetere: era be yayetere, yabawaire abo era obutuukirivu: era be yawaire obutuukirivu, yabawaire abo era ekitiibwa. ³¹ Kale twatumula tutya ku ebyo? Katonda bw'abba ku lwaisu, omulabe waisu yaani? ³² Ataagaine Mwana we iye, naye n'amuwaayo ku lwaisu feena, era talitugabira bintu byonabyona wamu naye? ³³ Yani aliroopa abalonde ba Katonda? Katonda abawa obutuukirivu: ³⁴ yani alibasalira omusango? Kristo Yesu eyafiire, oba okusinga eyazuukiire, ali ku mukono omuliiro ogwa Katonda, era atuwozererya. ³⁵ Yani alitwawukanya n'okutaka kwa Kristo? kubona naku, oba kulumwa, oba kuyiganyizibwa, oba njala, oba kubba bwereere, oba kabbiibi, oba kitala? ³⁶ Nga bwe kyawandiikiibwe nti Twitibwa obwire okuziba, okutulanga iwe: Twabaliibwe ng'entama egy'okusalibwa. ³⁷ Naye mu ebyo byonabyona tuwangwire n'okusingawo ku bw'oyo eyatutakire. ³⁸ Kubanga ntegereire kimu nga waire kufa, waire obulamu, waire bamalayika, waire abafuga, waire ebiriwo, waire ebyaba okubbaawo, waire amaani, ³⁹ waire obugulumivu, waire okwaba wansi, waire ekitonde kyonakyona ekindi, tebisobolenga kutwawukanya no kutaka kwa Katonda okuli mu Kristo Yesu Mukama waisu.