¹ Oba temumaite, ab'oluganda (kubanga nkoba abategeera amateeka), ng'amateeka gafuga omuntu ng'akaali mulamu? ² Kubanga omukali afugibwa ibaaye ng'akyali mulamu; naye ibaaye bw'afa, ng'asumulwiirwe mu mateeka ga ibaaye. ³ Kale kityo ibaaye bw'abba ng'akaali mulamu bweyabbanga n'omusaiza ogondi, yayetebwanga mwenzi: naye ibaaye bw'afa, nga w'obwereere eri amateeka, obutabba mwenzi bw'abba n'omusaiza ogondi. ⁴ Kityo bagande bange, era mweena mwafiire ku mateeka olw'omubiri gwa Kristo, mubbe n'ogondi, niiye oyo eyazuukiziibwe mu bafu, kaisi tubalirenga Katonda ebibala. ⁵ Kubanga bwe twabbanga mu mubiri, okwegomba okubbiibi, okuliwo olw'amateeka, kwakolanga mu bitundu byaisu okubaliranga okufa ebibala. ⁶ Naye Atyanu twasumulwirwe mu mateeka, bwe twafiire ku ekyo ekyabbanga kitufuga, ife tubbenga abaidu mu iyali obw'omwoyo, so ti mu nyukuta egy'eira. ⁷ Kale twatumula tutya? Amateeka niikyo kibbiibi? Kitalo. Naye tinanditegeire kibbiibi, wabula mu mateeka: kubanga tinandimanyire kwegomba, singa amateeka tegatumwire nti Teweegombanga: ⁸ naye ekibbiibi bwe kyaboine we kyeema, ne kikolanga mu nze olw'amateeka okwegomba kwonakwona: kubanga awatabba mateeka ekibbiibi nga kifuukire. ⁹ Nzena eira nabbanga mulamu awabula mateeka: naye ekiragiro bwe kyaizire, ekibbiibi ne kizuukira, nzena ne nfa; ¹⁰ n'ekiragiro ekyabbaire eky'okuleeta obulamu, ekyo ne kiboneka gye ndi eky'okuleeta okufa: ¹¹ kubanga ekibbiibi, bwe kyaboine we kyeema olw'ekiragiro, ne kimbeya, ne kingita olw'ekyo. ¹² Kityo amateeka matukuvu, n'ekiragiro kitukuvu, kituukirivu, kisa. ¹³ Kale ekisa kyafuukire kufa gye ndi? Kitalo. Naye ekibbiibi kibonekere okubba ekibbiibi, kubanga niikyo kyandeeteire okufa olw'ekisa; ekibi kaisi kyeyongerenga okubba ekibbiibi olw'ekiragiro. ¹⁴ Kubanga tumaite ng'amateeka niigo g'omwoyo: naye nze ndi w'omubiri, natundiibwe okufugibwanga ekibbiibi. ¹⁵ 15 Kubanga kye nkola, tikimaite, kubanga kye ntaka ti niikyo kye nkola; naye kye nkyawa niikyo kye nkola. ¹⁶ Naye oba nga kye ntataka kye nkola, ngikirirya amateeka nga masa. ¹⁷ Kale atyanu ti ninze nkikola ate, wabula ekibbiibi ekityama mu nze. ¹⁸ Kubanga maite nga mu nze, niigwo mubiri gwange, temutyama kisa: kubanga okutaka kumba kumpi, naye okukola ekisa wabula. ¹⁹ Kubanga kye ntaka ekisa tinkikola: naye kye ntataka ekibbiibi kye nkola. ²⁰ Naye oba nga kye ntataka kye nkola, ti niinze nkikola ate, wabula ekibbiibi ekityama mu nze. ²¹ Kityo mbona eiteeka nti nze bwe ntaka okukola ekisa, ekibbiibi kimba kumpi. ²² Kubanga nsanyukira amateeka ga Katonda mu muntu ow'omukati: ²³ naye mbona eiteeka erindi mu bitundu byange nga lirwana n'eiteeka ly'amagezi gange, era nga lindeeta mu bufuge wansi w'eiteeka ly'ekibbiibi eriri mu bitundu byange. ²⁴ Nze nga ndi muntu munaku! yani alindokola mu mubiri ogw'okufa kuno? ²⁵ Neebalya Katonda ku bwa Yesu Kristo Mukama waisu. Kale kityo nze nzeka mu magezi ndi mwidu wa mateeka ga Katonda, naye mu mubiri w'eiteeka lye kibbiibi.