¹ Naye eri Isiraeri atumula nti Obwire okuziba nagololera emikono gyange abantu abatawulira era abagaana. ² Katonda teyabbingire bantu be, be yamanyire eira. Oba temumaite ebya Eriya ebyawandiikiibwe bwe kitumula? bwe yasabire Katonda ng'atumula ku Baisiraeri nti ³ Mukama, baita banabbi bo, ne basuula ebyoto byo: nzeena nfikirewo nzenka, era basagira obulamu bwange. ⁴ Naye okwiramu kwa Katonda kumukoba kutya? Nti Nze neefiikiriiryewo Abasaiza kasanvu, abatafukaamiriranga Baali. ⁵ Kale kityo era ne mu biseera bino waliwo ekitundu ekyafiikirewo mu kulonda okw'ekisa. ⁶ Naye oba nga lwe kisa, ti lwe bikolwa ate: oba nga ti kityo, ekisa ti kisa ate. ⁷ Kale tukole tutya? Isiraeri kye yasaagiire, teyaboine; naye abaalondeibwe baakibona, abandi ne bakakanyalibwa: ⁸ nga bwe kyawandiikiibwe nti Katonda yabawaire omwoyo ogw'okuwongera, amaiso ag'obutabona, n'amatu ag'obutawulira, okutuusya ku lunaku lwa atyanu. ⁹ Era Dawudi atumula nti Emeeza yaabwe ebafuukire akakunizo n'ekigu, N'enkonge, n'empeera gye bali: ¹⁰ Amaiso gaabwe gasiikiriziibwe obutabona, Era obakutamyenga omugongo gwabwe buliijo. ¹¹ Kale ntumula nti Kyebaaviire beesitala kaisi bagwe? Kitalo: naye olw'okwonoona kwabwe obulokozi kyebwaviire bwiza eri ab'amawanga, okubakwatisya eyali. ¹² Naye oba ng'okwonoona kwabwe niibwo bugaiga bw'ensi, n'okuweebuuka kwabwe bwe bugaiga bw'ab'amawanga; okutuukirira kwabwe tekusinga inu? ¹³ Naye mbakoba imwe ab'amawanga. Kale kubanga nze ndi mutume wa b'amawanga, ngulumizia okuweereza kwange: ¹⁴ bwe ndibona ekigambo kyonakyona kye ndikwatisia eiyali ab'omubiri gwange, ne ndokola abamu mu ibo. ¹⁵ Kuba oba ng'okubbingibwa kwabwe niikwo kutabaganya ensi, okusembezebwa kwabwe kiki, wabula obulamu mu bafu? ¹⁶ Era ebibala ebiberyeberye bwe bibba ebitukuvu, era n'ekitole kitukuvu: era ekikolo bwe kibba ekitukuvu, era n'amatabi matukuvu. ¹⁷ Naye oba ng'amatabi agandi gaawogoleibwe, weena, eyabbaire omuzeyituuni ogw'omu nsiko, wasimbiibwe mu igo, n'ogaita wamu nago ekikolo eky'obugeivu obw'omuzeyituuni; ¹⁸ teweenyumiririzianga ku matabi: naye bwe weenyumirizianga, ti niiwe weetiikire ekikolo, naye ekikolo kye kyetiikire niiwe. ¹⁹ Kale watumula nti Amatabi kyegaava gawogolwa nze nsimbibweku. ²⁰ Niiwo awo; gaawogolwa lw'obutaikirirya, weena ogume lwo kwikiriya. Tewegulumizianga, naye tyanga: ²¹ kuba oba nga Katonda teyasaasiire matabi ga buzaaliranwa, era weena talikusaasira. ²² Kale bona obusa n'obukambwe bwa Katonda: eri abagwire, bukambwe; naye eri iwe busa bwa Katonda, bw'ewabbanga mu busa bwe: bw'otabbenga, weena oliwogolwa. ²³ Era boona, bwe bataabbenga mu butaikirirya bwabwe balisimbwawo: kubanga Katonda asobola okubasimbawo ate. ²⁴ Kuba oba nga iwe wawogoleibwe ku muzeyituuni ogwabbaire ogw'omu nsiko mu buzaaliranwa, n'osimbibwa mu muzeyituuni omusa obutasengererya buzaaliranwa, abo, ab'obuzaaliranwa; tebalisinga inu kusimbibwa mu muzeyituuni gwabwe ibo? ²⁵ Kubanga tintaka imwe, ab'oluganda, obutamanya kyama kino, mulekenga okubba ab'amagezi mu maiso ganyu mwenka, ng'obukakanyali bwabbaire ku Baisiraeri mu kitundu, okutuusya okutuukirira kw'ab'amawanga lwe kulituuka; ²⁶ era kityo Abaisiraeri bonabona balirokoka: nga bwe kyawandiikiibwe nti Muliva mu Sayuuni Awonya; Alitoolawo obutatya Katonda mu Yakobo: ²⁷ Era eno niiyo endagaano yange eri ibo, bwe ndibatoolaku ebibbiibi byabwe. ²⁸ Mu njiri, niibo abalabe ku lwanyu: naye mu kulondebwa, batakibwa ku lwa bazeiza. ²⁹ Kubanga ebirabo n'okweeta kwa Katonda tibyeijusibwa. ³⁰ Kuba nga imwe eira bwe mutaawuliire Katonda, naye atyanu musaasiirwe olw'obutawulira bw'abo, ³¹ kityo boona atyanu tebawuliire, olw'okusaasirwa kwanyu atyanu boona kaisi basaasirwe. ³² Kubanga Katonda yasibire bonabona mu butawulira, kaisi asaasire bonabona. ³³ Obuliba bw'obugaiga obw'amagezi n'obw'okumanya kwa Katonda tomaite bwe buli! emisango gye nga tegikeberekeka, n'amangira ge nga tigekaanyizika! ³⁴ Kubanga yani eyabbaire amaite ebirowoozo bya Mukama? oba yani eyabbaire amuwaire amagezi? ³⁵ oba yani eyabbaire asookere okumuwa ekintu, era aliiriribwa ate? ³⁶ Kubanga byonabyona biva gy'ali, era bibita gy'ali, era bituuka gy'ali. Ekitiibwa kibbenga gy'ali emirembe gyonagyona Amiina.