¹ Ab'oluganda, kye ntaka mu mwoyo gwange era kye nsaba Katonda ku lwabwe niikyo kino, balokoke. ² Kubanga mbategeezia nga balina okunyiikiririra Katonda, naye ti mu kutegeera. ³ Kubanga bwe batamanya butuukirivu bwa Katonda, era bwe bageziaku okutereezia obutuukirivu bwabwe ibo beene, tebasengererya butuukirivu bwa Katonda. ⁴ Kubanga Kristo niiye nkomerero y'amateeka olw'okuweesia obutuukirivu buli kwikirirya. ⁵ Kubanga Musa awandiika obutuukirivu obuva mu mateeka nti abukola niiye alibba omulamu mu ibwo. ⁶ Naye obutuukirivu obuva mu kwikiriya butumula buti nti Totumulanga mu mwoyo gwo nti Yani aliniina mu igulu? (niikwo kuleeta Kristo wansi;) ⁷ waire nti Yani aliika emagombe? (niikwo kuniinisia Kristo okuva mu bafu.) ⁸ Naye butumula butya? Nti, Ekigambo kiri kumpi naiwe, mu munwa gwo, ne mu mwoyo gwo: niikyo ekigambo eky'okwikirirya kye tubuulira: ⁹ kubanga bw'oyatula Yesu nga niiye Mukama n'omunwa gwo, n'oikirirya mu mwoyo gwo nti Katonda yamuzuukizirye mu bafu, olirokoka: ¹⁰ kubanga omuntu aikirirya no mwoyo okuweebwa obutuukirivu, era ayatula no munwa okulokoka. ¹¹ Kubanga ebyawandiikiibwa bitumula nti Buli amwikirirya talikwatibwa nsoni. ¹² Kubanga wabula njawulo y'oMuyudaaya n'oMuyonaani: kubanga omumu niiye Mukama waabwe bonabona, niiye mugaiga eri abo bonabona abamukungirira: ¹³ kubanga, Buli alikungirira eriina lya Mukama alirokoka. ¹⁴ Kale balikungirira batya gwe bakaali kwikirirya? era baliikirirya batya gwe bakaali kuwuliraku? era baliwulira batya awabula abuulira? ¹⁵ era balibuulira batya nga tebatumiibwe? nga bwe kyawandiikiibwe nti Ebigere byabwe nga bisa inu ababuulira enjiri ey'ebisa! ¹⁶ Naye tebagondeire njiri bonabona. Kubanga Isaaya atumula nti Mukama, yani Eyaikirirye ekigambo kyaisu? ¹⁷ Kale okwikirirya kuva mu kuwulira, n'okuwulira mu kigambo kya Kristo. ¹⁸ Naye ntumula nti Tebawuliranga? Niiwo awo, dala, Eidoboozi lyabyo lyabunire mu nsi gyonagyona, N'ebigambo byabyo okutuuka ku nkomerero gy'ensi. ¹⁹ Naye ntumula nti Isiraeri tamanyanga? Musa niiye yasookere okutumula nti Ndibakwatisia eyali eri abatali beigwanga, Eri eigwanga eribula magezi ndibasunguwalya. ²⁰ Era Isaaya aguma inu n'atumula nti Navumbuliibwe abo abatansagiranga, Nalagiibwe eri abo abatambuuliriryangaku. ²¹ Naye eri Isiraeri atumula nti Obwire okuziba nagololeire emikono gyange abantu abatawulira era abagaine.