¹ Oluvanyuma ne mbona bamalayika bana nga bayemereire ku nsonda ina ej'ensi, nga bakwaite empewo ina ej'ensi, empewo yonayona ereke okufuwa ku nsi, waire ku nyanza, waire ku musaale gwonagwona. ² Ne mbona malayika ogondi ng'aniina okuva ebuvaisana, ng'alina akabonero ka Katonda omulamu: n'atumulira waggulu n'eiddoboozi inene ng'akoba bamalayika abana, abaaweeibwe okwonoona ensi n'enyanza, ³ ng'atumula nti Temwonoona nsi, waire enyanza, waire emisaale, okutuusia lwe tulimala okuteeka akabonero abaidu ba Katonda waisu ku byeni byabwe. ⁴ Ne mpulira omuwendo gwabwe abateekeibweku akabonero, babbaire kasiriivu mu obukumi buna mu nkumi ina, abateekeibweku akabonero mu buli kika ky'abaana ba Isiraeri. ⁵ Ab'omu kika kya Yuda abateekeibweku akabonero kakumi mu enkumi bbiri: Ab'omu kika kya Lewubeeni kakumi mu enkumi bbiri: Ab'omu kika kya Gaadi kakumi mu enkumi bbiri: ⁶ Ab'omu kika kya Aseri kakumi mu enkumi bbiri: Ab'omu kika kya Nafutaali kakumi mu enkumi bbiri: Ab'omu kika kya Manaase kakumi mu enkumi bbiri: ⁷ Ab'omu kika kya Simyoni kakumi mu enkumi bbiri: Ab'omu kika kya Leevi kakumi mu enkumi bbiri: Ab'omu kika kya Isakaali kakumi mu enkumi bbiri: ⁸ Ab'omu kika kya Zebbulooni kakumi mu enkumi bbiri: Ab'omu kika kya Yusufu kakumi mu enkumi bbiri: Ab'omu kika kya Benyamini abateekeibweku akabonero kakumi mu enkumi bbiri. ⁹ Oluvanyuma lw'ebyo ne mbona, era bona, ekibiina kinene omuntu yenayena ky'atasobola kubala, mu buli igwanga n'ebika n'abantu n'enimi, nga bemereire mu maiso g'entebe ne mu maiso g'Omwana gw'entama, nga bavaaire ebivaalo ebyeru, amasaga g'enkindu mu mikono gyabwe; ¹⁰ ne batumulira waigulu n’eidoboozi inene, nga batumula nti obulokozi bubba bwa Katonda waisu atyaime ku ntebe, n'eri Omwana gw'entama. ¹¹ Ne bamalayika bonabona babbaire bemereire nga beetooloire entebe n'abakaire n'ebiramu ebina; ne bafukamira amaiso gaabwe mu maiso g'entebe, ne basinzia Katonda, ¹² nga ngabatumula nti Amiina: omukisa n'ekitiibwa n'amagezi n'okwebalya n'eitendo n'amaani bibenga eri Katonda waisu emirembe n'emirembe. Amiina. ¹³ Omumu ku bakaire n'airamu, ng'ankoba nti Bano abavaire ebivaalo ebyo ebyeru, niibo baani, era bava waina? ¹⁴ Ne mukoba nti Mukama wange, niwe omaite N'ankoba nti Bano niibo baviire mu kubonaabona kudi okungi, ne bayozia ebivaalo byabwe, ne babitukulya mu musaayi gw'Omwana gw'entama. ¹⁵ Kyebaviire nibabba mu maiso g'entebe ya Katonda; ne bamuweerezianga emisana n'obwire mu yeekaalu ye: n'oyo atyaime ku ntebe alitimba eweema ye ku ibo. ¹⁶ Tebalirumibwa njala kabite, so Tebalirumibwa nyonta kabite, so eisana teriribokya, waire okwokya kwonakwona: ¹⁷ kubanga Omwana gw'entama ali wakati w'entebe niyeyabalisyanga, era alibaleeta eri ensulo ej'amaizi ag'obulamu: era Katonda alisangula buli iriga mu maiso gaabwe.