¹ Ne mbona eigulu eiyaaka n'ensi enjaaka: kubanga eigulu ery'oluberyeberye n'ensi ey'oluberyeberye nga byabire: n'enyanza nga ebulawo. ² Ne mbona ekibuga ekitukuvu, Yerusaalemi ekiyaaka, nga kiika okuva mu igulu ewa Katonda, nga kitegekeibwe ng'omugole ayonjeibwe ibaaye. ³ Ne mpulira eidoboozi einene eriva mu ntebe nga litumula nti Bona, eweema ya Katonda awamu n'abantu, era yatyamanga wamu nabo, boona babbanga bantu be, yeena Katonda mwene yabbaanga wamu nabo, Katonda waabwe: ⁴ naye alisangula buli, iriga mu maiso gaabwe; era okufa tekulibbaawo ate; so tewaabbengawo ate naku, waire okukunga waire okulumwa: eby'oluberyeberye biweirewo. ⁵ N'oyo atyama ku ntebe n'atumula nti Bona, byonabyona mbirirye buyaaka. N'atumula nti Wandiika: kubanga ebigambo ebyo byo bwesige era bya mazima. ⁶ N'ankoba nti Bituukiriire. Nze ndi Alufa ne Omega, okusooka n'enkomerero. Ndimuwa buwi alina enyonta okunywa mu nsulo eyamaizi ag'obulamu buwi. ⁷ Awangula alisikira ebyo: nzeena naabbanga Katonda we, yeena yabbanga mwana wange. ⁸ Naye abati, n'abataikirirya, n'abagwagwa, n’abaiti, n'abenzi, n'abalogo, n'abasinza ebifaananyi, n’ababbeyi bonabona, omugabo gwabwe gulibba mu nyanza eyaka n'omusyo n'ekibiriiti; niikwo kufa okw'okubiri. ⁹ Ne waiza omumu ow'oku bamalayika omusanvu abalina ebibya omusanvu, abaizwire ebibonyoobonyo omusanvu eby'enkomerero; n'atumula nanze, ng'akoba nti Iza, naakulaga omugole, omukali w'Omwana gw'entama. ¹⁰ N'antwala mu Mwoyo ku lusozi olunene oluwanvu, n'andaga ekibuga ekitukuvu Yerusaalemi nga kiika okuva mu igulu ewa Katonda, ¹¹ nga kirina ekitiibwa kya Katonda: okumasamasa kwakyo ng'eibbaale ery'omuwendo omungi einu, ng'eibbaale yasepi, eritangalija: ¹² nga kirina bugwe omunene omuwanvu: nga kirina emiryango ikumi n'aibiri, ne ku miryango bamalayika ikumi na babiri; n'amaina agawandiikiibweku, niigo g'ebika eikumi n'ebibiri eby'abaana ba Isiraeri: ¹³ ebuva isana emiryango isatu; era ebukiika bw'omugooda emiryango isatu; era obukiika bw'omuliiro emiryango isatu; era ebugwa isana emiryango isatu. ¹⁴ No bugwe w'ekibuga yabbaire emisingi ikumi n'aibiri, ne kubbaaku amaina ikumi n'amabiri ag'abatume eikumi n'ababiri ab'Omwana gw'entama. ¹⁵ Yeena etumula nanze yabbaire ekipimo olugada lwa zaabu okupima ekibuga, n'emiryango gyakyo, ne bugwe waakyo. ¹⁶ N'ekibuga kyekankanyizibwa enjuyi gyonagyona, n'obuwanvu bwakyo buli ng'obugazi, n'agera ekibuga n'olugada, amabbanga omutwalo gumu mu enkumi ibiri: obuwanvu n'obugazi n'obugulumivu bwakyo bwekankana. ¹⁷ Napima bugwe waakyo, emikono kikumi mu ana n'eina, ekigera ky'omuntu, niikyo kya malayika. ¹⁸ N'okuzimbibwa kwa bugwe waakyo kwa yasepi: n'ekibuga kye zaabu ensa, ng'endabirwamu ensa. ¹⁹ Emisingi gya bugwe w'ekibuga gyayonjeibwe na buli ibbaale ery'omuwendo omungi. Omusingi ogw'oluberyeberye yasepi; ogw'okubiri safiro; ogw'okusatu kalukedoni; ogw'okuna lya nawandagala; ²⁰ ogw'okutaano sadonukisi; ogw'omukaaga sadiyo; ogw'omusanvu kerusoliso; ogw'omunaana berulo; ogw'omwenda topazi; ogw'ekkumi kerusoperaso; ogw'eikumi n'ogumu kuwakinso; ogw'eikumi n'eibiri amesusito. ²¹ N'emiryango eikumi n'ebiri luulu ikumi na ibiri, buli gumu ku miryango gwabbaire gwa luulu imu: n'oluguudo olw'ekibuga zaabu ensa, ng'endabirwamu etangalija. ²² So tinaboinemu yeekaalu mu ikyo: kubanga Mukama Katonda Omuyinza w'ebintu byonabyona, n'Omwana gw'entama, niiye yeekaalu yaakyo. ²³ So ekibuga tekyetaaga isana waire omwezi, okukyakira: kubanga ekitiibwa kya Katonda kyakimulisirye, n'etabaaza yaakyo niiye Mwana gw'entama. ²⁴ N'amawanga gatambuliranga mu musana gwakyo: na bakabaka b'ensi baleeta ekitiibwa kyabwe mu kyo. ²⁵ N'emiryango gyakyo tigyaigalwenga n'akatono emisana (kubanga eyo obwire tibwabbengayo); ²⁶ era balireeta ekitiibwa n'eitendo ery'amawanga mu ikyo: ²⁷ so temuliyingira mu ikyo n'akatono ekintu kyonakyona ekitali kirongoofu waire akola eky'omuzizo n'obubbeyi: wabula abo bonka abawandiikiibwe mu kitabo eky'obulamu eky'Omwana gw'entama.