¹ Awo mu naku egyo, ebibiina bwe byayingire obungi ate, ne batabba na mere, n'ayeta abayigirizwa be n'abakoba nti ² Nsaasira ebibiina, kubanga atyanu enaku isatu nga bali nanze, so babula mere; ³ bwe mbasiibula okwirayo nga basiibire enjala, bazirikira mu ngira; n’abandi bava wala. ⁴ Abayigiriwa be ne bamwiramu nti Omuntu yasobola atya okwikutya abantu bano emigaati wano mu idungu? ⁵ N'ababuulya nti Mulina emigaati imeka? Ne bamukoba nti Musanvu. ⁶ N'alagira ebibiina okutyama wansi: n'akwata emigaati omuanvu, ne yeebalya, n'amenyamu, n’awa abayigirizwa be, okugiteeka mu maiso gaabwe; ne bagiteeka mu maiso g'ekibiina. ⁷ Era babbaire balina obw'enyanza butono: n'abwebalya, n’alagira n'obwo okubuteeka mu maiso gaabwe. ⁸ Ne balya ne baikuta, ne bakuŋaanya obukunkumuka bwasigairewo ebiibo musanvu. ⁹ Babbaire ng'enkumi ina: n'abasiibula. ¹⁰ Amangu ago n'asaabala mu lyato n'abayigirizwa be, n'aiza ku njuyi egy'e Dalumanusa. ¹¹ Abafalisaayo ne bafuluma ne baiza, ne batanula okumusokaasoka, nga basagira gy'ali akabonero akava mu igulu, nga bamukema. ¹² N'asinda inu mu mwoyo gwe, n’akoba nti ab'Emirembe gino basagira ki akabonero? mazima mbakoba nti ab'Emirembe gino tebaliweebwa kabonero. ¹³ N'abaleka, n'asaabala ate n'agenda emitala w'edi. ¹⁴ Awo ne beerabira okutwala emigaati, so tebabbaire nagyo mu lyato wabula omugaati gumu. ¹⁵ N'aakuutira ng'abakoba nti Mugume, mwekuume ekizimbulukusya eky'Abafalisaayo n’ekizimbulukusya kya Kerode. ¹⁶ Ne beebuulagana bonka na bonka, ne bakoba nti mubula migaati. ¹⁷ Yesu bwe yategeire n'abakoba nti Kiki ekibeebuulyaganya olw'obutabba na migaati? Mukaali, so temutegeera? emyoyo gyanyu mikakayavu? ¹⁸ Mulina amaiso, temubona? mulina amatu, temuwulira? temwijukira? ¹⁹ Bwe nameyeire enkumi eitaanu emigaati etaano, ebiibo bimeka ebyaizwire obukunkumuka bye mwakuŋanyirye? Ne bamukoba nti Ikumi na bibiri. ²⁰ Era bwe namenyeire omusanvu enkumi eina, mwakuŋaanyire ebisero bimeka ebyaizwire obukunkumuka? Ne bamukoba nti Musanvu. ²¹ N'abakoba nti Mukaali kutegeera? ²² Ne baiza ne batuuka mu Besusayida ne bamuleetera omuduka w'amaiso, ne bamwegayirira okumukwataku. ²³ N'akwata omuduka w'amaiso ku mukono, n'amufulumya ewanza w'embuga; awo bwe yafujire amatanta ku maiso ge, n'amuteeka engalo, n'amubuulya nti Oliku ky'obona? ²⁴ N'alinga waigulu, n'akoba nti Bbe abantu, kubanga mbona bafaanana ng'emisaale nga batambula. ²⁵ Ate n'amuteeka engalo ku maiso ge n'akodola okubona, n'awona, n'abona byonabyona kusa. ²⁶ N'amusindika ewuwe, ng'amukoba nti Toyingiranga mu mbuga muno. ²⁷ Yesu n'asitula n'ayaba n'abayigirizwa be mu mbuga gy'e Kayisaliya ekya Firipo. Bwe baatuukire mu ngira n'abuulya abayigirizwa be, n'abakoba nti Abantu banjeta yani? ²⁸ Ne bamukoba nti Yokaana Omubatiza: n'abandi nti Eriya: naye abandi nti Omumu ku banabbi. ²⁹ Iye n'ababuulya nti Naye imwe munjeita yani? Peetero n'airamu n'amukoba nti niiwe Kristo. ³⁰ N'abakomaku baleke okubuuliraku omuntu ebigambo bye. ³¹ N'atandika okubegeresya nti kimugwanira Omwana w'omuntu okubonyaabonyezebwa ebingi, n'okugaanibwa abakaire, na bakabona abakulu, n'abawandiiki, n'okwitibwa, n'okubitawo enaku isatu okuzuukira. ³² N'atumula ekigambo ekyo mu lwatu. Peetero n'amutwala, n'atandika okumuneya. ³³ Naye n'akyuka, n'abona abayigirizwa be, n'anenya Peetero, ng'akoba nti ira enyuma wange, Setaani: kubanga tolowooza bya Katonda, wabula eby'abantu. ³⁴ N'ayeta ebibiina n'abayigirizwa be, n'abakoba nti Omuntu bw'ataka okunsengererya, yeefiirize yenka, yeetikke omusalaba gwe, ansengererye. ³⁵ Kubanga buli ataka okulokola obulamu bwe alibugotya; na buli aligotya obulamu bwe ku lwange n'olw'enjiri alibulokola. ³⁶ Kubanga kimugasa ki omuntu okulya ensi gyonagyona, n'okufiirwa obulamu bwe? ³⁷ Kubanga omuntu yandiwaireyo ki okununula obulamu bwe? ³⁸ Kubanga buli ankwatirwa ensoni nze n'ebigambo byange mu mirembe gino egy'obwenzi era emibbiibi, n'Omwana w'omuntu alimukwatirwa ensoni oyo lw'aliizira mu kitiibwa kya Iitaaye na bamalayika abatukuvu.