¹ Awo bwe gyabbaire nga gisigaireyo enaku mukaaga okutuuka ku Kubitaku, Yesu n'aiza e Besaniya, eyabbaire Lazaalo, Yesu gwe yazuukizirye mu bafu. ² Awo ne bamufumbirayo emere ey'ekyeigulo: no Maliza n'aweereza; naye Lazaalo n'abba mumu ku ibo abbbaire batyaime naye ku mere. ³ Awo Malyamu n'akwata laatiri ey'amafuta ag'omugomusita ag'omuwendo omungi einu, n'agisiiga ku bigere bya Yesu, n'ataanya ebigere bye n'enziiri gye: enyumba n'eizula akaloosa ak'amafuta. ⁴ Naye Yuda Isukalyoti, omumu ku bayigirizwa be, ayaba okumulyamu olukwe, n'akoba nti ⁵ Kiki ekirobeire okutunda amafuta gano okugatoolamu edinaali ebikumi bisatu, okugabira abaavu? ⁶ Kale yatumwire atyo, ti lwo kwijukira abaavu; naye kubanga yabbaire mwibbi, ye yayambaliranga ensawo, n'atwalanga bye baateekangamu. ⁷ Awo Yesu n'akoba nti Mumuleke agagisire olunaku lw'okuziikibwa kwange. ⁸ Kubanga abaavu niibo be muli nabo enaku gyonagyona; naye nze temuli nanze enaku gyonagyonna. ⁹ Awo abakopi ab'omu Bayudaaya ne bategeera nti aliyo: ne baiza ti ku lwa Yesu yenka, era naye babone no Lazaalo, gwe yazuukizirye mu bafu. ¹⁰ Naye bakabona abakulu ne basala amagezi bamwite no Lazaalo; ¹¹ kubanga ku lulwe bangi ku Bayudaaya abayabire, ne baikirirya Yesu. ¹² Olunaku olw'okubiri ekibiina kinene abbbaire baizire ku mbaga, bwe bawuliire nga Yesu aiza e Yerusaalemi, ¹³ ne batwala ensansa egy'enkindu ne baaba okumusisinkana, ne batumulira waigulu nti Ozaana: aweweibwe omukisa aiza mu liina lya Mukama, niiye Kabaka wa Isiraeri. ¹⁴ Naye Yesu bwe yaboine enyana y'endogoyi, n'agyebereka; nga bwe kyawandiikiibwe nti ¹⁵ Totya, muwala wa Sayuuni: Bona, Kabaka wo aiza, nga yeeberekere omwana gw'endogoyi. ¹⁶ Ebyo abayigirizwa be tebaabitegeire oluberyeberye: naye Yesu bwe yamalire okugulumizibwa, kaisi ne baijukira ng'ebyo byamuwandiikweku, era nga baamukolere batyo. ¹⁷ Awo ekibiina ekyabbaire naye bwe yayetere Lazaalo okuva mu ntaana n'amuzuukizia mu bafu, ne kitegeeza. ¹⁸ Era ekibiina kyekyaviire kyaba okumusisinkana, kubanga bawuliire nti yakolere akabonero ako. ¹⁹ Awo Abafalisaayo ne batumuliragana nti Mubone bwe mubula kye mugasirye; bona, ensi gyonagyona gimusengere. ²⁰ Naye wabbairewo Abayonaani abandi mu abo abaiza ku mbaga okusinza: ²¹ awo badi ne baiza eri Firipo, eyaviire e Besusayida eky'omu Ggaliraaya, ne bamubulya, nga bamukoba nti Sebo, tutaka kubona Yesu. ²² Firipo n'aiza n'akobera Andereya; Andereya n'aiza, no Firipo, ne bakobera Yesu. ²³ Yesu n'abairamu, n'akoba nti Obwire butuukire, Omwana w'omuntu agulumizibwe. ²⁴ Dala dala mbagamba nti Empeke y'eŋaanu bw'etegwa mu itakali n'efa, ebbeerera awo yonka; naye bw'efa, ebala emere nyingi. ²⁵ Ataka obulamu bwe bumugota; naye akyawa obulamu bwe mu nsi eno alibusigalya okutuuka ku bulamu obutawaawo. ²⁶ Omuntu bw'ampeererya, ansengereryenga; nzeena gye ndi, eyo omuweereza wange naye gy'eyabbanga: omuntu bw'ampeereza, Itawange alimuteekamu ekitiibwa. ²⁷ Atyanu omwoyo gwange gweraliikiriire; era ntumule ntya? Itawange, ndokola okuntoola mu kiseera kino. Naye kyenava ntuuka mu kiseera kino. ²⁸ Itawange, gulumizia eriina lyo. Awo eidoboozi ne liva mu igulu, nti Naligulumizia, era ndirigulumizia ate: ²⁹ Awo ekibiina ekyabbaire kyemereirewo, bwe kyaliwuliire, ne kikoba nti Kubbaire kubwatuka: abandi ne bakoba nti Malayika atumwire. ³⁰ Yesu n'airamu n'akoba nti Eidoboozi lino tirizire ku bwange, naye ku bwanyu. ³¹ Atyanu ensi eno esalirwa omusango; atyanu omukulu w'ensi eno yabbingibwa ewanza. ³² Nange bwe ndiwanikibwa ku nsi ndiwalulira gye ndi bonabona. ³³ Naye yatumuliire atyo, ng'alaga okufa bwe kudi kw'ayaba okufa. ³⁴ Awo ekibiina ne kimwiramu nti Tetwawuliire mu mateeka nti Kristo abbeerera awo emirembe n'emirembe: weena kiki ekikukobesya nti Omwana w'omuntu kimugwanira okuwanikibwa? Ono Omwana w'omuntu niiye ani? ³⁵ Mutambule nga mukaali mulina omusana, endikirirya ereke okubakwatira mu ngira: atambulira mu ndikirirya tamanya gy'ayaba. ³⁶ Bwe mukaali mulina omusana mwikirirye omusana, mufuuke abaana b'omusana. Yesu bwe yamalire okutumula ebyo, n'ayaba, n'abeegisa. ³⁷ Naye waire nga yakolere obubonero bungi obwenkaniire awo mu maiso gaabwe, tebamwikirirye: ³⁸ ekigambo kya nabbi Isaaya kituukirire, kye yatumwire nti Mukama, yani eyaikirirye ebigambo byaisu? Era omukono gwa Mukama gubikkuliirwe yani? ³⁹ Kyenaviire baleka okusobola okwikirirya, kubanga Isaaya yatumwire ate nti ⁴⁰ Yabazibire amaiso, n'abakakanyalya omwoyo; Baleke okubona n'amaiso n'okutegeera n'omwoyo, Bakyuke, Kaisi mbawonye. ⁴¹ Ebyo bye yatumwire Isaaya, kubanga yaboine ekitiibwa kye: n'atumula ku iye. ⁴² Naye mu bakulu bangi abamwikiriirye, naye olw'Abafalisaayo tibaayatwiire, baleke okubbingibwa mu ikuŋaaniro: ⁴³ kubanga batakire ekitiibwa ky'abantu okusinga ekitiibwa kya Katonda. ⁴⁴ Yesu n'atumulira waigulu n'akoba nti Anjikirirya, taikirirya nze, wabula odi eyantumire. ⁴⁵ Era abona nze ng'aboine odi eyantumire. ⁴⁶ Nze ngizire kubba musana mu nsi, buli muntu anjikirirya aleke okutyamanga mu ndikirirya. ⁴⁷ Naye awulira ebigambo byange, n'atabikwata, nze timusalira musango: kubanga tinaizire kusalira nsi musango, wabula okulokola ensi. ⁴⁸ Agaana nze, n'ataikirirya bigambo byange, alina amusalira omusango: ekigambo kye natumwire niikyo ekirimusalira omusango ku lunaku olw'enkomerero. ⁴⁹ Kubanga tinatumulanga nze ku bwange; naye Itawange eyantumire, niiye yandagiire bwe nkoba, era bwe ntumula. ⁵⁰ Nzeena maite ekiragiro kye niibwo bulamu obutawaawo: kale nze bye ntumula, nga Itawange bwe yankobere, ntyo bwe ntumula.