¹ Dala dala mbakoba nti Atabita mu mulyango ng'ayingira mu kisibo ky'entama, naye n'aniinirira awabona, oyo niiye mwibbi era omunyagi. ² Naye abita mu mulyango, niiye musumba w'entama. ³ Oyo omwigali amwigulirawo; n'entama gimuwulira eidoboozi: agyeta entama gye amaina; agifulumya ewanza. ⁴ Bw'amala okufulumya ejije gyonagyona, agitangira, n'entama gimusengererya: kubanga gimumaite eidoboozi. ⁵ Ogondi tegimusengererya, naye girimwiruka bwiruki: kubanga tegimaite idoboozi lya bandi. ⁶ Yesu n'abagerera olugero luno, naye ibo tebaategeire bigambo bwe biri bye yabakobere. ⁷ Awo Yesu n'abakoba ate nti Dala dala mbagamba nti Niinze mulyango gw'entama. ⁸ Bonnabona abansookere babbaire babbiibi era abanyagi: naye entama tegyabawuliire. ⁹ Niinze mulyango: omuntu bw'ayingirira mu nze alirokoka, aliyingira, alifuluma, alibona eirundiro. ¹⁰ Omubbiibi taiza wabula okwibba, n'okwita, n'okuzikirizya. Nze naizire gibbe n'obulamu, era gibbe nabwo obungi. ¹¹ Niinze omusumba omusa: omusumba omusa awaayo obulamu bwe olw'entama. ¹² Alisirya empeera, tali musumba, entama nga ti gigye iye, bw'abona omusege nga gwiza, aleka entama n'airuka, n'omusege gugisikula gugisaansaanya. ¹³ Airuka kubanga we mpeera, so entama tagiteekaku mwoyo. ¹⁴ Niinze omusumba omusa: era ntegeera egyange, n'egyange gintegeera ¹⁵ nga Itange bw'antegeera, nzeena mpaayo obulamu bwange olw'entama. ¹⁶ Era ndina n'entama egindi egitali gyo mu lugo luno: gyona kingwanira okugireeta, giriwulira eidoboozi lyange; era iriba ekisibo kimu, omusumba omumu. ¹⁷ Itawange kyava antaka, kubanga nze mpaayo obulamu bwange, kaisi mbutwale ate. ¹⁸ Wabula abuntolaku, naye nze nzenka mbuwaayo. Ndina obuyinza obw'okubuwaayo, era ndina obuyinza obw'okubutwala ate. Ekiragiro ekyo nakiweebwa Itawange. ¹⁹ Ne wabbaawo ate okwawukana mu Bayudaaya olw'ebigambo ebyo. ²⁰ Abamu ku ibo bangi ne baaba nti Aliko dayimooni era alalukire; mumuwulirira ki? ²¹ Abandi ne bakoba nti Ebigambo bino ti bya muntu aliko dayimooni. Dayimooni ayinza okuzibula amaiso ga bamuzibe? ²² Yabbaire mbaga ey'okutukuza mu Yerusaalemi; byabbaire biseera bye mpewo; ²³ Yesu n'atambulira mu yeekaalu mu kisasi kya Sulemaani. ²⁴ Awo Abayudaaya ne bamwetooloola, ne bamukoba nti Olituusia di okutubuusisiabuusisia? Oba nga niiwe Kristo, tukobere dala. ²⁵ Yesu n'abairamu nti Nabakobere, naye temwikirirya: emirimu gye nkola mu liina lya Itawange, gye gintegeeza nze. ²⁶ Naye imwe temwikirirya kubanga temuli ba mu ntama gyange. ²⁷ Entama gyange giwulira eidoboozi lyange, nzena ngitegeera, era ginsengererya; ²⁸ nzeena ngiwa obulamu obutawaawo; so tegirigota emirembe n'emirembe, so wabula aligisikula mu mukono gwange. ²⁹ Itawange eyagimpaire niiye omukulu okusinga bonabona, so wabula asobola okugisikula mu mukono gwa Itawange. ³⁰ Nze ni Itawange tuli mumu. ³¹ Abayudaaya ne bakwata ate amabbale okumukubba. ³² Yesu n'abairamu nti Emirimu mingi emirungi egyaviire eri Itawange nagibalagire imwe; mulimu guliwa mu egyo ogubankubbisya amabbale? ³³ Abayudaaya ne bamwiramu nti Olw'omulimu omusa tetukukubba mabbaale, naye olw'okuvoola; era kubanga iwe oli muntu ne weefuula Katonda. ³⁴ Yesu n'abairamu nti Tekyawandiikiibwe mu mateeka ganyu nti Nze nabakobere nti Muli bakatonda? ³⁵ Oba nga yabetere abo bakatonda, abaiziirwe ekigambo kya Katonda, (so n'ebyawandiikiibwe tebisobola kudiba), ³⁶ imwe mumukobera ki iye, Itaaye gwe yatukuzirye n'amutuma mu nsi, nti Ovoire; kubanga nkobere nti Ndi Mwana wa Katonda? ³⁷ Bwe ntakola mirimu gya Itawange, temunjikirirya. ³⁸ Naye bwe njikola, waire nga temunjikirirya nze, naye mwikirirye emirimu: mumanye mutegeere nga Itawange ali mu ninze nzeena mu Itawange. ³⁹ Ne basala amagezi ate okumukwata: n'ava mu mikono gyabwe. ⁴⁰ N'ayaba ate eitale wa Yoludaani mu kifo Yokaana gye yabbaire oluberyeberye ng'abatiza; n'abba eyo. ⁴¹ Abantu bangi ne baiza gy'ali; ne bakoba nti Yokaana teyakolere kabonero: naye byonabyona Yokaana bye yatumwire ku ono byabbaire bya mazima. ⁴² Ne bamwikirirya eyo bangi.