¹ Abatakibwa, atyanu eno niiyo ebbaluwa ey'okubiri gye mbawandiikira; mu egyo gyombiri mbakubbirirya amagezi ganyu agabulamu bukuusa nga mbaijukirya; ² okwijukiranga ebigambo ebyatumwirwe eira banabbi abatukuvu, n'ekiragiro ky'abatume baanyu ekya Mukama waisu era Omulokozi: ³ nga mumalire okusooka okutegeera kino, nga mu naku egy'oluvannyuma abasekereri baliiza n'okusekerera, nga batambula okusengereryanga okwegomba kwabwe ibo ⁴ ne batumula nti Okusuubiza kw'okwiza kwe kuli waina? Kubanga, bazeiza baisu kasookeire bagona, byonabyona bibba bityo bityo nga bwe byabbanga okuva ku kutondebwa. ⁵ Kubanga beerabira kino nga babona, ng'eira wabbairewo eigulu, n'ensi eyaviire mu maizi era yabbaire wakati mu maizi, olw'ekigambo kya Katonda, ⁶ ensi ey'eira amaizi kyeyaviire gagisaanyaawo n'ezikirira: ⁷ naye eigulu erya atyanu n'ensi olw'ekigambo ekyo bigisiibwe musyo, nga bikuumibwa okutuusia ku lunaku olw'omusango n'okuzikirira kw'abantu abatatya Katonda. ⁸ Naye kino kimu temukyerabiranga, abatakibwa, nga eri Mukama waisu olunaku olumu luli ng'emyaka olukumi, n'emyaka olukumi giri ng'olunaku olumu. ⁹ Mukama waisu talwisia kye yasuubizirye, ng'abandi bwe balowooza okulwa; naye agumiikirizia gye muli, nga tataka muntu yenayena kugota, naye bonabona batuuke okwenenya. ¹⁰ Naye olunaku lwa Mukama waisu lwiza nga mubbiibi; eigulu lwe lirivaawo n'okuwuuma okunene n'ebintu eby'obuwangwa birisaanuuka olw'okwokyebwa okungi, n'ensi n'ebikolwa ebigirimu birisirika. ¹¹ Ebyo byonabyona bwe byaba okusaanuuka bityo, mugwaniire okubbanga mutya mu mpisa entukuvu n'okutyanga Katonda, ¹² nga musuubira nga mwegomba inu olunaku lwa Katonda okutuuka, olulisaanuusisia eigulu nga lyokyebwa, n'ebintu eby'obuwangwa ne biseebengerera olw'eibbugumu eringi? ¹³ Naye nga bwe yasuubizire tusuubira eigulu eiyaka n'ensi enjaka, obutuukirivu mwe butyama. ¹⁴ Kale, abatakibwa, kubanga musuubira ebyo, mufubenga okusangibwa mu mirembe nga mubula ibala waire omusango mu maiso ge. ¹⁵ Era mulowoozenga ng'okuguminkiriza kwa Mukama waisu niibwo bulokozi, era nga mugande waisu omutakibwa Pawulo mu magezi ge yaweweibwe bwe yabawandikiire; ¹⁶ era nga mu bbaluwa gye gyonagyona, ng'atumula ku ebyo mu igyo; omuli ebimu ebizibu okutegeera, abatamaite n'abatali banywevu bye banioola, era nga n'ebyawandiikibwa ebindi, olw'okuzikirira kwabwe ibo. ¹⁷ Kale, abatakibwa, kubanga musookere okutegeera, mwekuumanga muleke okugwa okuva mu bunywevu bwanyu imwe nga mutwalibwa obukyamu bw'ababbiibi. ¹⁸ Naye mukulire mu kisa ne mu kutegeera Mukama waisu era Omulokozi Yesu Kristo. Oyo awebwenga ekitiibwa atyanu era n'okutuusia ku lunaku olw'emirembe n'emirembe. Amiina.