¹ Simooni Peetero, omwidu era omutume wa Yesu Kristo, eri abo abaafunire okwikirirya okw'omuwendo omungi nga ife bwe twafunire mu butuukirivu bwa Katonda waisu era Omulokozi waisu Yesu Kristo; ² ekisa n'emirembe byeyongerenga gye muli mu kutegeerera kimu Katonda ne Yesu Mukama waisu; ³ kubanga obuyinza bw'obwakatonda niibwo bwatuwaire byonabyona eby'obulamu n'eby'okutya Katonda, olw'okutegeerera kimu oyo eyatwetere olw'ekitiibwa n'obusa bwe iye; ⁴ ebyatuweserye ebisuubizibwa eby'omuwendo omungi ebinene einu; olw'ebyo kaisi mugabanire wamu obuzaaliranwa bwa Katonda, bwe mwawonere okuva mu kuzikirira okuli mu nsi olw'okwegomba. ⁵ Naye era olw'ekyo kyeene bwe muleeta ku lwanyu okufuba kwonakwona, ku kwikirirya kwanyu mwongeryengaku obusa, era ne ku busa bwanyu okutegeera; ⁶ era no ku kutegeera kwanyu okwegendereza; era n ku kwegendereza kwanyu okugumiikiriza; era no ku kugumiikiriza kwanyu okutya Katonda; ⁷ era no ku kutya Katonda kwanyu okutaka ab'oluganda; era no ku kutaka ab'oluganda kwanyu okutaka. ⁸ Kubanga bwe mubba n'ebyo ne bibba ebingi, bibafuula abatali bagayaavu n'abandi ebibala olw'okutegeerera kimu Mukama waisu Yesu Kristo. ⁹ Kubanga atabba n'ebyo iye muzibe (muduka) w'amaiso awunawuna, bwe yeerabira okunaabibwaku ebibbiibi bye eby'eira. ¹⁰ Kale, ab'oluganda, kyemwavanga mweyongera obweyongeri okufubanga okunywezia okwetebwa kwanyu n'okulondebwa: kubanga ebyo bwe mwabikolanga, temulyesitala n'akatono (akadidiiri): ¹¹ kubanga kityo tewalibulawo bugaiga mu kuyingira kwanyu mu bwakabaka obutawaawo obwa Mukama waisu era Omulokozi waisu Yesu Kristo. ¹² Kyenaavanga nintaka enaku gyonagyona okubaijukirya ebyo waire nga mubimaite ne munywerera mu mazima ge mulina. ¹³ Era ndowooza nga kye nsonga, nga nkaali mu kigangu kino, okubakubbirizyanga nga mbaijukirya; ¹⁴ nga maite nga ndikumpi , okwambula amangu ekigangu kyange, era nga Mukama waisu Yesu Kristo bwe yategeezerye. ¹⁵ Naye era nafubanga okubasobozesya buli kaseera nga malire okufa okwijukiranga ebyo. ¹⁶ Kubanga tetwasengereirye ngero egyagunjiibwe n'amagezi bwe twabategeezerye obuyinza n'okwiza kwa Mukama waisu Yesu Kristo, naye twaboine n'amaiso gaisu obukulu bwe. ¹⁷ Kubanga yaweweibwe Katonda Itwaisu eitendo n'ekitiibwa, eidoboozi bwe lyaviire mu kitiibwa ekimasamasa ne liiza gy'ali liti nti Ono niiye Mwana wange omutakibwa, gwe nsanyukira einu: ¹⁸ n'eidoboozi eryo ife ne tuliwulira nga liva mu igulu, bwe twabbaire awamu naye ku lusozi olutukuvu. ¹⁹ Era ekisinga obunywevu tulina ekigambo kya bannabbi; mukola kusa okukibona ekyo, ng'etaala eyakira mu kifo eky'endikirirya, okutuusa obwire bwe bulikya emunyeenye ekyesia obwire n'eyaka mu myoyo gyaisu: ²⁰ nga mumalire okutegeera kino, nti buli kigambo ekya banabbi ekyawandikiibwe tekitegeeza kukoma kw'oyo yenka. ²¹ Kubanga wabula kigambo kya banabbi ekyabbaire kireeteibwe mu kutaka kw'abantu: naye abantu batumulanga ebyaviire eri Katonda, nga bakwatiibwe Omwoyo Omutukuvu.