¹ Era tubategeezia, ab'oluganda, ekisa kya Katonda ekyaweweibwe mu kanisa egy'e Makedoni; ² mu kubonaabona okwabakemere einu eisanyu lyabwe eryasukiriire, n'obwavu bwabwe obwayingire obungi byasukiriire mu bugaiga obw'obugabi bwabwe. ³ Kubanga, ntegeeza ibo, bagabire bonka nga bwe basobola era n'okusinga obuyinza bwabwe, ⁴ nga batusaba n'okwegayirira okungi olw'ekisa ekyo n'okwikirirya ekimu okwo mu kuweereza abatukuvu; ⁵ so ti nga bwe nabbaire ndowooza, naye baasookere okwewaayo bonka eri Mukama waisu, n'eri ife mu kutaka kwa Katonda. ⁶ Kyetwaviire tubuulirira Tito, nga bwe bweyatandikire eira, era atyo kaisi akituukirirye era n'ekisa ekyo gye muli. ⁷ Naye nga bwe musukirira mu byonabyona, mu kukirirya, no mu kutumula, no mu kutegeera, no mu kufuba kwonakwona, no mu kutaka kwanyu eri ife, era musukirirenga no mu kisa ekyo. ⁸ Tintumula nga mbalagira bulagili, wabula olw'okufuba kw'abandi nga nkema okutaka kwanyu nga kwa mazima. ⁹ Kubanga mutegeera ekisa kya Mukama waisu Yesu Kristo, nti bwe yabbaire omugaiga, naye n'afuuka omwavu ku lwanyu, obwavu bwe kaisi bubagaigawalye imwe. ¹⁰ Era mbakobere kye ndowooza olw'ekyo: kubanga kibasaanira imwe, abaasookere okutandiika, ti kukola kwonka, era naye n'okutaka, nga mwakamala omwaka gumu. ¹¹ Naye atyanu mutuukirirye n'okukola; nga bwe waaliwo okutaka amangu, era n'okutuukirirya kutyo kaisi kubbeewo, nga bwe muyinza. ¹² Kuba oba nga waliwo okutaka amangu, kwikirizibwa ng'omuntu bw'alina, ti nga bw'abula. ¹³ Kubanga tintumwire ntyo, abandi bawumulibwe naimwe muteganyizibwe: ¹⁴ wabula olw'okwekankana, okusukirira kwanyu kuweereze okwetaaga kwabwe atyanu mu biseera bino, era n'okusukirira kwabwe kaisi kuweererye okwetaaga kwanyu; okwekankana kubbewo: ¹⁵ nga bwe kyawandiikiibwe nti Eyakuŋanyanga enyingi, teyasigaziangawo; naye eyakuŋŋaanyanga akatono, teyeetaaganga. ¹⁶ Naye Katonda yeebazibwe, eyateekere mu mwoyo gwe Tito okufuba okwo ku lwanyu. ¹⁷ Kubanga okwikirirya aikirirya okubuulirira kwaisu; kubanga yeena mweene alina okufuba okungi, asitula okwaba gye muli nga yeetuma. ¹⁸ Era tutuma wamu naye ow'oluganda, atenderezebwa mu njiri mu kanisa gyonagyona; ¹⁹ so ti ekyo kyonka, era so naye oyo niiye yalondeibwe ekanisa okutambula naife olw'ekisa ekyo, kye tuweereza ife Mukama waisu aweebwe ekitiibwa, era tulage okutaka kwaisu amangu: ²⁰ nga twewala ekyo, omuntu obutatunenya olw'ekirabo kino kye tuweereza: ²¹ kubanga tuteekateeka ebisa, ti mu maiso ga Mukama waisu mwonka, era naye ne mu maiso g'abantu. ²² Era tutuma wamu nabo muganda waisu, gwe twakemanga emirundi emingi mu bigambo ebingi nga munyiikivu, naye atyanu munyiikivu inu okusingawo, olw'okwesiga okungi kw'alina eri imwe. ²³ Omuntu bw'eyabuulyanga ebya Tito, niiye aikirirya ekimu nanze era niiye mukozi munange eri imwe; oba bya baganda baisu, niibo ababaka ab'ekanisa, abo niikyo ekitiibwa kya Kristo. ²⁴ Kale mubalage mu maiso g'ekanisa ekindi okutaka kwanyu n'okwenyumiriza kwaisu ku lwanyu.