¹ Kiŋwaniire okwenyumirizia, waire nga tekusaana; naye ke njabe mu kwolesebwa n'okubikuliwa kwa Mukama waisu. ² Maite omuntu mu Kristo, eyaakamala emyaka eikumi n'eina (oba mu mubiri, timaite; oba awabula mubiri, timaite; Katonda amaite), okutwalibwa omuntu ali atyo mu igulu ery'okusatu. ³ Era, maite omuntu ali atyo (oba mu mubiri, oba awabula omubiri, timaite; Katonda amaite), ⁴ bwe yatwaliibwe mu lusuku lwa Katonda, n'awulira ebigambo ebitatumulikika, ebitasaanira muntu kubyatula. ⁵ Ku bw'omuntu ali atyo neenyumirizianga: naye ku bwange tindyenyumirizia, wabula mu by'obunafu bwange. ⁶ Kuba singa yatakire okwenyumirizianga, tinandibbaire musirusiru; kubanga nanditumwire amazima: naye ndeka, omuntu yenayena alekenga okundowooza okusinga bw'ambona oba bw'ampulira. ⁷ N'olw'obukulu obusinga einu obw'ebyo ebyabikulibwe, ndekenga okugulumizibwa einu, Kyenaviire mpeebwa eiwa mu mubiri, omubaka wa Setaani okunkubbanga, ndekenga okugulumizibwa einu. ⁸ Olw'ekigambo ekyo neegayiriire Mukama waisu emirundi eisatu, kinveeku. ⁹ N'ankoba nti Ekisa kyange kikumala: kubanga amaani gange gatuukiririra mu bunafu. Kyenaavanga neenyumirizia n'eisanyu eringi olw'eby'obunafu bwange, amaani ga Kristo kaisi gasiisire ku nze. ¹⁰ Kyenva nsanyukira eby'obunafu, okukolerwanga eky'eju, okwetaaganga, okuyiganyizibwanga, okutegananga, okulangibwanga Kristo: kubanga bwe mba omunafu, lwe mba ow'amaani. ¹¹ Nfuukire musirusiru: imwe mwampalirizirye; kubanga nagwaniire okutenderezebwa imwe; kubanga tinasiingiibwe mu kigambo kyonakyona abatume abakulu einu, waire nga nze tindi kintu. ¹² Mazima obubonero obw'omutume bwakolerwanga ewanyu mu kuguminkiriza kwonakwona, mu bubonero n'eby'amagero n'eby'amaani. ¹³ Kubanga kiki ekanisa egendi kye gyabasingiiremu, wabula nze nzenka obutabazitoowereranga? munsonyiwe ekyonoono ekyo. ¹⁴ Bona, omulundi ogw'okusatu atyanu neeteekereteekere okwiza gye muli; so tindibazitoowerera: kubanga tinsagira byanyu, wabula imwe: kubanga tekigwanira abaana okugisiranga abakaire, wabula abakaire okugisiranga abaana. ¹⁵ Era ndiwaayo era ndiweebwayo n'eisanyu eringi olw'obulamu bwanyu. Bwe nsinga okubalagala einu, ntakibwa katono? ¹⁶ Naye ti musango, nze tinabazitoowereire, naye, bwe nabbaire omugerengetanya, nabateegere mu lukwe. ¹⁷ Omuntu yenayena gwe nabatumiire namufunisirye amagoba eri imwe? ¹⁸ Nabuuliriire Tito, ne ntuma ow'oluganda awamu naye. Tito yafunire amagoba eri imwe? tetwatambwire n'Omwoyo mumu? tetwatambuliire mu kisinde kimu? ¹⁹ Obw'eira mulowoozere nga ife tubawolezia ensonga. Mu maiso ga Katonda tutumulira mu Kristo. Naye byonabyona, abatakibwa, byo kubazimba imwe. ²⁰ Kubanga ntire, bwe ndiiza, koizi okubasanga nga mufaanana nga bwe ntataka, nzeena imwe muleke okunsanga nga nfaanana nga bwe mutataka; koizi okubba eyo okutongana, eiyali, obusungu, empaka, okulyolyoma, okugeya, okwegulumizia, okujeema; ²¹ bwe ndiiza ate, Katonda wange aleke okuntoowaza eri imwe, nanze okubanakuwalira abangi abaayonookere eira ne bateenenya obugwagwa n'obwenzi n'obukaba bwe baakola.