¹ Munsengereryenga nze, nga nzeena bwe nsengererya Kristo. ² Mbatenderezia kubanga mwijukira mu byonabyona, era munywezia bye mwaweweibwe nga bwe nabibawaire. ³ Naye ntaka imwe okumanya ng'omutwe gwa buli musaiza niiye Kristo; n'omutwe gw'omukali niiye musaiza; n’omutwe gwa Kristo niiye Katonda. ⁴ Buli musaiza bw'asaba oba bw'abuulira, omutwe gwe nga gubikiibweku, aswaza omutwe gwe. ⁵ Naye buli mukali bw'asaba oba bw'abuulira, omutwe gwe nga tegubikiibweku, aswaza omutwe gwe: kubanga niibwo bumu dala ng'amwereibwe. ⁶ Kuba oba ng'omukali tabikibwaku, era asalibwenga enziiri: naye oba nga kya nsoni omukazi okusalibwanga enziiri oba okumwebwanga, abikibwengaku. ⁷ Kubanga omusaiza tekimugwanira kubikibwanga ku mutwe, kubanga oyo niikyo ekifaananyi n'ekitiibwa kya Katonda: naye omukali niikyo kitiibwa ky'omusaiza. ⁸ Kubanga omusaiza teyaviire mu mukali; wabula omukali niiye yaviire mu musaiza: ⁹ era kubanga omusaiza teyatondeibwe lwo mukali; wabula omukali olw'omusajja: ¹⁰ kyekiva kigwanira omukali okubbangaku akabonero ak'okufugibwa ku mutwe gwe olwa bamalayika. ¹¹ Era naye omukali tabbaawo awabula musaiza, era omusaiza tabbaawo awabula mukali, mu Mukama waisu. ¹² Kuba omukali nga bwe yaviire mu musaiza, era n'omusajja atyo azaaliibwa mukali; naye byonabyona biva eri Katonda: ¹³ Musale omusango mweena mwenka: kisaana omukali asabenga Katonda nga tabikiibweku? ¹⁴ Obuzaaliranwa bwonka tebubegeresya nga omusaiza bw'akulya enziiiri gimuswaza? ¹⁵ Naye omukali bw'akulya enziiri; niikyo ekitiibwa gy'ali: kubanga yaweweibwe enziri gye mu kifo ky'ebivaalo. ¹⁶ Naye omuntu yenayena bw'abba ng'ataka okuleeta empaka, ife tubula empisa ng'eyo, waire ekanisa gya Katonda. ¹⁷ Naye bwe mbalagira kino timbatenderezia, kubanga temukuŋaana lwo busa wabula olw'obubbiibi. ¹⁸ Kubanga eky'oluberyeberye, bwe mukuŋaanira mu kanisa, mpulira nga waliwo okwawukana mu imwe; era nkikiririryamu. ¹⁹ Kubanga era n'okwesalamu kikugwanira okubbangamu imwe, abasiimibwa kaisi babonesebwenga mu imwe. ²⁰ Kale bwe mukuŋaanira awamu, tekisoboka okulya emere ya Mukama waisu: ²¹ kubanga mu kulya kwanyu buli muntu asooka mwinaye okutoola emere iye yenka; n'ogondi alumwa enjala, n'ogondi atamiira. ²² Kiki ekyo? mubula nyumba gyo kuliirangamu n'okunywerangamu? oba munyooma ekanisa ya Katonda, ne muswaza ababula nyumba? Nabakobere ntya? naabatendereza olw'ekyo? Timbatendereza. ²³ Kubanga nze naweweibwe eri Mukama waisu era ekyo kye nabawaire imwe, nga Mukama waisu Yesu mu bwire budi bwe yaliirirwemu olukwe yatoire omugaati; ²⁴ ne yeebalya, n'agumenyamu, n'atumula nti Guno niigwo mubiri gwange oguli ku lwanyu: mukolenga mutyo olw'okunjijukiranga nze. ²⁵ Era n'ekikompe atyo bwe baamalire okulya, ng'atumula nti Ekikompe kino niiyo endagaano enjaaka mu musaayi gwange: mukolenga mutyo buli lwe mwanywangaku, olw'okunjijukiranga nze. ²⁶ Kubanga buli lwe mwaalyanga ku mugaati guno no lwe mwaanywanga ku kikompe, mwabonekyanga okufa kwa Mukama waisu okutuusia lw'aliiza. ²⁷ Kyayaavanga airya omusango ogw'omubiri n'omusaayi gwa Mukama waisu buli eyaalyanga ku mugaati aba eyaanywanga ku kikompe kya Mukama waisu nga tasaanire. ²⁸ Naye omuntu yeekeberenga yenka kaisi alyenga ku mugaati atyo, era anywenga no ku kikompe. ²⁹ Kubanga alya era anywa, alya era anywa musango gwe iye, bw'atayawula mubiri. ³⁰ Mu imwe kyemuviire mubbamu abangi abanafu n'abalwaire, era bangiku abagonere: ³¹ Naye singa twesalira omusango fenka, tetwandisaliirwe musango. ³² Naye bwe tusalirwa omusango, tubuulirirwa Mukama waisu, tuleke okusingibwa omusango awamu n’ensi. ³³ Kale, bagande bange, bwe mukuŋaananga okulya, mulindaganenga. ³⁴ Omuntu bw'alumwanga enjala, alyenga eika; okukuŋaana kwanyu kulekenga okuba okw'ensobi. N'ebindi ndibirongoosya, we ndiziira wonawona.