¹ Kubanga tintaka imwe obutategeera, ab'oluganda, bazeiza baisu bonabona bwe babbaire wansi w'ekireri, era bonabona bwe babitire mu nyanza; ² era bonabona bwe baabatiziibwe eri Musa mu kireri no mu nyanza; ³ era bonabona ne balyanga emere imu ey'omwoyo; era bonabona ne banywanga ekyokunywa ekimu eky'omwoyo: ⁴ kubanga baanywanga mu Iwazi olw'omwoyo olwabasengereryanga: n'olwazi olwo lwabbaire Kristo. ⁵ Naye bangi ku ibo Katonda teyabasiimire: kubanga baazikiririziibwe mu idungu. ⁶ Naye ebyo byabbaire byokuboneraku gye tuli, tulekenga okwegomba ebibbiibi, era nga ibo bwe beegombere. ⁷ So temubbanga basinza be bifaananyi, ng'abamu ku ibo: nga bwe kyawandiikiibwe nti Abantu ne batyama okulya n'okunywa, ne basituka okuzanya. ⁸ Era titwendanga, ng'abamu ku ibo bwe baayendere, ne bagwa ku lunaku olumu emitwaalo ibiri mu enkumi satu. ⁹ Era tetukemanga Mukama waisu, ng'abamu ku ibo bwe baakemere, emisota egyo ne gibaita. ¹⁰ Era temwemulugunyanga, ng'abamu ku ibo bwe beemulugunyire, ne bazikirizibwa omuzikirirya. ¹¹ Naye ebyo byababbaireku abo okubbanga ebyokuboneraku; era byawandiikiibwe olw'okutulabulanga ife abatuukiibweku enkomerero gy'emirembe. ¹² Kale alowooza ng'ayemereire yeekuumenga aleke okugwa. ¹³ Wabula kukema okubakwata okutali kwa bantu: naye Katonda mwesigwa, ataabalekenga kukemebwa okusinga bwe musobola; naye awamu n'okukemebwa era yateekangawo n'obwirukiro; kaisi musobolenga okugumiinkiriza. ¹⁴ Kale, bagande bange, mwirukenga okusinza ebifaananyi. ¹⁵ Mbakoba ng'abalina amagezi; mulowooze kye ntumula. ¹⁶ Ekikompe eky'omukisa, kye tusabira omukisa, ti niikwo kwikirirya ekimu omusaayi gwa Kristo? Omugaati gwe tumenyaamenya ti niikwo kwikiriya ekimu omubiri gwa Kristo? ¹⁷ kubanga ife abangi tuli mugaati gumu, omubiri gumu: kubanga fenafena tugabana omugaati gumu. ¹⁸ Mubone Isiraeri ow'omubiri: abalya sadaaka tebaikirirya kimu ne kyoto? ¹⁹ Kale ntumula ki? ekiweebwa eri ekifaananyi nga kintu, oba ekifaananyi nga kintu? ²⁰ Naye ntumula ng'ab'amawanga bye bawaayo bawa eri balubaale, so ti eri Katonda: nzeena tintaka imwe kubbanga abaikirirya ekimu na balubaale. ²¹ Temusobola kunywa ku kikompe kya Mukama waisu no ku kikompe kya balubaale: temusobola kugabana ku meeza ya Mukama waisu no ku meeza ya balubaale. ²² Oba Mukama waisu tumukwatisia eyali? Ife tumusinga amaani? ²³ Byonabyona bisa; naye ebisaana ti byonabyona. Byonabyona bisa, naye ebizimba ti byonabyona. ²⁴ Omuntu yenayena tasagiranga bibye yenka, wabula ebyo mwinaye. ²⁵ Buli kye batundanga mu katale, mukiryenga, nga temubwirye kigambo olw'omwoyo; ²⁶ kubanga ensi ya Mukama waisu n'okwizula kwayo. ²⁷ Omumu ku abo abataikirirya bw'abeetanga, mwena bwe mutakanga okwaba; ekiteekebwanga mu maiso ganyu mukiryenga, nga temubwirye kigambo olw'omwoyo. ²⁸ Naye omuntu bw'abakobanga nti Kino kyaweweibwe okubba sadaaka, temukiryanga ku lw'oyo akobere, n'olw'omwoyo: ²⁹ bwe ntumula omwoyo, ti gugwo iwe naye gwa gondi; kubanga eidembe lyange lwaki okusalirwa omusango n'omwoyo gwa gondi? ³⁰ Nze bwe ndya n'okwebalya, kiki ekinvumisya olw'ekyo kye neebalya? ³¹ Kale oba nga mulya, oba nga munywa, oba nga mukola ekigambo kyonakyona, mukolenga byonabyona olw'ekitiibwa kya Katonda. ³² Temuleetanga ekyesitalya eri Abayudaaya, waire eri Abayonaani, waire eri ekanisa ya Katonda: ³³ era nga nzeena bwe ntasagira magoba gange nze, wabula ag'abangi; kaisi balokoke.