¹ Imiegu na, likame ingeunu be iswil pugo dano i kare kame en ekuo kede? pien ango atie yamo kede jo kame ngeo iswil. ² Pien dako kame tie kede cware iswil twee but cware nono tek ka pwodi cware kuo, do ka cware oto, udo en egonyere ikom iswil otwe but cware nono. ³ Pi mano, ka di pwodi cware kuo, di en eko ot nyomere kede icuo ace, kobino lwonge ngadote, do ka cware oto, udo egonyere i iswil no, ka do en enyomere kede icuo ace, likame kolwonge be ngadote. ⁴ Pi mano, imiegu na, etie kamanono kede uda, wun itiekunu doko jo oto iye iswil pi kom Krisito, me wek ibedunu jo konyomere bute, en ngat kame koyaruno ikom jo oto, tetekeny onyakunu anyakini abeco ne Rubanga. ⁵ Pien di bin wan otienu i ekite me kom, mit areco kame beo iswil, en kame oudo tie tic i adulion me kom wa, pi kelo ne wa nyako anyakini kame tero wa ito. ⁶ Do nan wan otieko udo alako kiye iswil, gikame bin otweo wa iye ikare kame oudo otie kede di oto, me wek otimunu tic ikuo anyen me tipo, di likame olubunu bobo kuo me kom acon kame owandiko. ⁷ Oyamunu do benyo? Be iswil en dub? Likame kamano. Ango koto likame angeo dub; ka koto iswil oudo li. Oudo koto ango likame angeo nyo en obedo ingobel ka koto iswil oudo likame owaco be, “Kur ingobelo jame me jo.” ⁸ Do dub, oko udo winyo di beo i cik, eko nyuto na egere dedede me ingobel. Pien abongo iswil, dub udo tie gikame oto. ⁹ Ango bin oudo akuo, obongo iswil, do i kare kame cik obino kede, dub di oko udo teko di do ango ako to. ¹⁰ Do cik kame oudo miero kelo kuo: ango ako udo etie gikame kelo to. ¹¹ Pien dub oudo kare me pug di beo i cik, en eko ngala, doko beo iye eko neka. ¹² Pi mano, iswil obedo gikame cil kede cik da obedo gikame cil, doko etie gi me ateni, kede kame ber. ¹³ Benyo, mam do gikame bin ber en oko kelo nango to? Likame kamano! Do dub en okelo nango to me wek en edong di etie dub; di ekelo na to di beo i gikame ber, tetekeny di beo i cik en edok dub kalikame wacere. ¹⁴ Pien wan ongeunu be iswil tie gi me tipo; do ango atie kom kame kocato pi bedo epasoit me dub. ¹⁵ Pien gikame ango adagi, en kame ango atie timo: pien atimo gikame ango likame amito, do alunyo timo gikame adagi. ¹⁶ Nan do ka ango atimo gi kalikame ango amito, udo do ayei be iswil ber ¹⁷ Nan do, likame ango en kame atimo gini, do dub kame tie i ango. ¹⁸ Pien ango angeo be i ango, kame tie kuo me kom, likame tie iye gimoro kame ber i kite me kuo me kom; pi cunya mito timo gikame ber, do timo gikame ber no, udo likame atwero. ¹⁹ Pien gikame ber kame amito likame atimo, do alunyo timo gikarac kame cunya dagi timo. ²⁰ Pi mano, ka ango atimo gikame cunya dagi, udo do likame ango en kame atime, do dub kame tie i ango en kame time. ²¹ Ango, audo be tie iswil atio, tek kame ango amito timo gimoro aber, dub bedo iyapiyapi keda. ²² Pien ango ikuo me cunya yom, atie kede ilel pi iswil ka Rubanga, ²³ Do doko aneno iswil ace tie yi i adulion me koma, kame tie yi kede iswil me tam na, di eko mina adoko mabus me iswil me dub, kame tie i adulion me koma. ²⁴ Can ikoma, Ngai kame bino laka i kom kuo me to noni? ²⁵ Do ango apwoyo Rubanga pi Yesu Krisito Rwot wa. Nan do, ango abino i tam na timo tic ne iswil ka Rubanga, do kite na me anywali me kom abino timo ne dub.