¹ . Di oko miina atad kame cal kede gi me pimo boro, di malaika oko cungo di ewaco be; yai malo di iko piimo Tempulo ka Rubanga, alutari kede wel me jo kame woro i kanono. ² . Do wek diakal kame tie oko me Tempulo kur ipimi pien ko tieko miine but abilere. Dokon gin ki bino nyonyono bomba kacil pi dwete ot ongwon ki wie are. ³ . Dokon ango abino miino twer but jo jurao nango are, di gin kiko bino imurai pi cengere tutumia acel kede tol are iot kany kape di ki ngapo bongu. ⁴ . Magonogi en kobedo yen olibeti are kede gi cungo me italan kame cungo inyim Rubanga me lobo. ⁵ . Doko kame ngatamoro mito musungo gi, mac bwote ki dog gi di eko muducaro jo kwor gi, dokon kame ngatamoro mito musungo gi en opoore neke i epone noni. ⁶ . Jogonogi tie kede twer me ceege malo tetekeny kot kur cwei pi cengere kame gin ki tie imurai iye, dokon gin ki tie kede twer ikom pie me loko gi dooko remo, kede dokon bungo wi lobbo kede aumpulin pi wel kame gin kimito. ⁷ . Kame do gin kitieko miino mujuragi, lee kame wokun i bur katut iriwir ca, bino cako yi kede gi, diko lono gi, di eko neko gi. ⁸ . Liele gi do kobino buto piny idier gudo me me bomba kadwong kame i cuny ko iwongo be Sodoma kede Ijiot (Misiri) en kanono kame bin koguro iye Rwot wa. ⁹ . Dido iwak kame wok ikom ikodeta me jo, abilere dedede, leb kede atekerin kobino neeno liele ka jogi pi cengere adek kede dul di likame ki yei ne jo keto liele gi i atesin. ¹⁰ . Dokon jo kame bedo iwi lobo bino i lel ikom gi, di ki camo i bagai me yom cuny di ki gabo gi amia but icegun, pien inabino are gi otidilo jo kame bedo iwi lobo twatwal. ¹¹ . Nan do, ingei cengere adek kede dul gi, wei kame wok ki but Rubanga bino donyo ikom gi, di ki ko cungo kede tien gi, di iworo adwong ko bino poto ikom jo ko neno gi. ¹² . Dido gin kiko winyo dwan ka lelemo imalo di waco ne gi be, "Bia nu malo kan" di gin kiko yito malo kii edou, jo kwor gi oko neno gi. ¹³ . Ayayangun me piny oko time iye sawa acel nono, di acel me tomon me bomba oko poto piny, kii ayayanun nono, jo tutumia kany kaare oko too, dido jo odong oko bedo kede iworo, di kiko mino deyo but Rubanga me malo. ¹⁴ . Can me are oko kato, Nenunu dokon can me adek da tie bino. ¹⁵ . Malaika me kany kaare da oko kuto agwara di dwan ka lelemo i malo oko waco be, ajakanuto me piny kan otieko dooko me ka Rwot wa kede Kurisito mere, dokon ebino pug pi ikar kede i kar! ¹⁶ . Dido idongia ot are ki wie ongwon kame bedo iwi komini gi inyim Rubanga, oko poto arieba cuny di ki ko wooro Rubanga. ¹⁷ . Di ki waco be; Wan omio pwoc butin okwe Rwot Rubanga me akarinikin, lo kame nan tie kede kamo bin tie, kede kame oyaro bino, pien yin itieko kwanyo twero ni ka dwong di iko pug. ¹⁸ . Atekerin oudo yi gi owang, di lilo nin oko bino, dokon kare me jo ko too, me ngolo negi kop, kede kare kame yin ipore culo kede jo tic ni kame obedo inabino kede jo acil, kede jo kame iworo nyingi, ikom jo katino kede jo ka dongo, kede kare me dudubo jo ko dudubo lobo otieko tuno. ¹⁹ . Dido tempulo ka Rubanga oko yabere i malo, di sanduku me isikan mere oko neeno ki i tempulo, di meny, woo, mwoc, ayangun kede akako oko bedo tie.