¹ Ingei mano, Yesu oko donyo ririmo bomban kede calere, di etuco kede nyuto ne jo kope kabeco me ajakanut ka Rubanga; di josiao mege tomon kiwie are da tie upere kede en. ² . Karacel kede mon mogo kame en oudo eriamo tipere areco ikom gi, kede cango gi ikom tuwo apapat, Mria kame olwongo be Magadalina, kame bin jwogi kanyare oyai ikome; ³ . kede Joana dako ka Cusa ngagwok jamini ka Erode kede Susana, kede ace apatpat da, kame bin mio Yesu kony me jamini gi. ⁴ . Kakame jo atot oko cokere kede, di kibino bute i bomban apapat, en eko yamo but gi kede agole di ewaco be; ⁵ . Nga cui kodi moro bin ooto cuno kodi ipoto mere, kakame etie cuno kede kodi, mogo oko popoto ilak yo; di tyen jo oko nyonyono gi, winy di ko bino oko camaro mago. ⁶ . Mogo oko popoto ilobo kame tie lela lela, kakame bin kodi nogo otui kede, kiko susunyo ner, pien lobo oudo otieko tuo. ⁷ . Mogo oko popoto idier okuto, okuto di ko dongo karacel kede gi, di kiko twilo gi atwalatwala. ⁸ . Do kodi mogo oko popoto ilobo kame ber; gin kiko tui di iko dongo, kiko nyak mogo oko keto nyige tol acel. Inge en yamo kope nogi, en eko yamo kede dwan amalo be, Ngat kame tie kede yite, ewinyi. ⁹ . Josia mege oko penye, di ki waco be, Agole ni dwong mere nyo? ¹⁰ . Di en eko waco be, Kotieko mino wun ngeeno mung me ajakanut ka Rubanga: do jo apat, oyamo kede gi i agole. me wek akadi kineni, do likame itwero neeno, doko akadi kiwinyi, do likame itwero niang. ¹¹ . Dwong me agole no en ine; Kodi obedo kop ka Rubanga. ¹² . Kodi kopopoto ilak yongayo en obedo jo kame winyo kop, di Sitani ko bino ko kwanyo kop no tenge ki cuny gi, tetekeny kur gin kiyei di kiko udo alako. ¹³ . Kodi kopopoto kakame tie lela lela obedo jo, kame ka winyo kop, igamo kede ilel, do kop noni likame ko keto aliasin, gin kiyei, do ikare me atama, gin kiko poto iyei. ¹⁴ . Kodi kopopoto idier okuto obedo jo, kame ka gin kiwinyo kop, kidongo, do paro kede mito abar kede mito bedo me ilel me ikare ni ko dino gi, di do anyakini gi likame ko twero cato. ¹⁵ . Do kodi oko popoto ilobo aber obedo jo, kame winyo kop kede genere kede cuny me aber, kame iwinyo kop kimako itek, di kiko kelo anyakini kede ikanyakin atek. ¹⁶ . Likame tie dano moro, kame ecwinyo etala, di en doko eko ume kede aum arabo kete idud itanda; do ekete kakame ocibo etala iye, me wek jo kame donyo i ot sobolo neno lero. ¹⁷ . Pien likame tie gimoro me mung, kalikame kobino woto kakalar, doko likame tie gimoro kame kobino mugo, kalikame kobino mino ngere di eko wok ilero. ¹⁸ . Pimano, gwokunu epone kame wun iwinyunu kede kop, pien ngat kame tie kede gimoro, kobino mine, da ngat kame li kede gimoro, kobino kwanyo kibute akadi atitidi kame en etie kede kobino kwanyaro. ¹⁹ . Di do Toto me Yesu kede imiegu mege oko bino bute, do gin likame kiko twero tuno bute pien jo koluke oudo tot. ²⁰ . Di ngatamoro oko waco ne Yesu di eyamo be, Toto ni kede imiegu ni tie cungo ooko, kimito neni. ²¹ . Do en eko dwoko di ewaco be, Toto na kede imiegu na en obedo jo kame winyo kope ka Rubanga, di kiko timo gikame ewaco. ²² . Iceng moro acel, kame en eko oot kede i yee karacel kede josiao mege, di en eko waco ne gi be, Ongolunu nam ootunu loka tetu ca. Di do gin kiko cako ot. ²³ . Do kakame gin kitie kede kwang, en eko nino, Yamo atek oko cako buko inam, pii di oko cako pongo yee gi, omio gin kiko bedo ipeko adwong. ²⁴ . Gin kiko ot bute, di kiko cene di kiwaco be, Ngadwong, ngadwong we, wan kara otie nu to. Yesu oko cei, di en coko yamo kede ebuka, di yamo kede ebuka oko kwei, anapakin oko bedo tie. ²⁵ . Yesu oko waco ne gi be, Yei wun do ber tie tuai? Pi lworo, gin kiko bedo kede ur, di kiyamo ken gi ken gi be, Dano me epone mene ine, pien en ecoko akadi yamo kede pii da wore. ²⁶ . Di gin kiko ngolo nam, kiko tuno i lobo me Geraseni, kame oudo pimere kede Galilaya. ²⁷ . Kakame Yesu onyono kede kakotuo, icuo moro me bomba kanono kame oudo tie kede jwogi oko riamo kede en, kame oudo pi kare alac, likame engapo igoen akadi bedo bedo ipaco; do en oudo ebedo iwi atesin ²⁸ . Kakame eneno kede Yesu, en eko kok di eko poto piny i nyime, kede dwan amalo en eko waco be, Peko nyo kame ango atie kede in, Yesu Wot ka Rubanga Ngamalo twal? Akwai kur icana. ²⁹ . Pien Yesu oudo ociko tipo arac pi wok tenge ikom dano nono. Pien ikare atot, tipo arac nono oudo make di oko dare di kotwee atwea kede irikoi kede loc; do en oudo ecocoto gi ka tipo arac nono omie ot bedo itela kaka oling. ³⁰ . Yesu oko penye di ewaco be, Nyingi ngai? En eko waco be, Legon: pien jwogi atot oudo odonyo ikome. ³¹ . Jwogi di ko donyo ngangao Yesu be kur ecik gin pi ot donyo ibur atut. ³² . Do oudo ipegei mogo atot tie ingete kanono, di kitie cam inget moru; di kiko donyo bako ne dog gi be ewek gi kioti idonyi ikom ipegei go, Yesu oko yei ne gi. ³³ . Jwogi di do oko wok ikom dano nono, iko ot donyo ikom ipegei. Di do ipegei oko bwangere iko ringo lor piny naka donyo i nam, di kiko lwiny i pii. ³⁴ . Kakame jo kame oudo tie kwano ipegei oneno kede gi otimere, gin kiko ringo, kiko donyo tatamo ne jo me bomba kede me adul me nget bomba. ³⁵ . Di do jo oko ot neno gi otimere, gin kiko bino but Yesu, kiko udo dano kame jwogi oudo oyai ikome di tie bedo inet Yesu, di engapo igoen, di edoko ber: lworo oko mako gi. ³⁶ . Jo kame bin oneno gi otimere da, oko ot tatamo epone kame dano kame jwogi oudo tie ikome nono ocango kede. ³⁷ . Di do jo dedede me adulion apapat me Gereseni, oko kwano be Yesu yai tenge kikuno igiere gi, pien lworo atek oudo omako gi; di Yesu oko yai, eko donyo iyee dok bobo loka tuca. ³⁸ . Icuo kame oudo jwgo oyai ikome nono, oko kwano Yesu be eyei ne eda upere kede. Do Yesu oko genge di ewaco ne be, ³⁹ . In dok paco wu, di iko waco ne gi gikame dwong kame Rubanga otimo ni. Di do icuo nono oko yai ot, en eko tatamo ne jo me bomba dedede gi adwong kame Yesu otimo ne. ⁴⁰ . Kakame Yesu odwogo kede, didi ekodet me jo oko game kede yom cuny; pien oudo gin dedede itie dare. ⁴¹ . Neni, icuo moro kame nyinge Yairo oko bino bute, en oudo ebedo atel me sinagoga, en eko riebere piny itien Yesu, di en eko kwano Yesu be ot ture. ⁴² Pien en oudo etie kede nyare acel kenekene, kame mwaka mege oudo tomon kiwie are, kame oudo tuo iyapiyapi to. Do kakame Yesu oudo tie kede, ekodet me jo oko donyo dire i kome. ⁴³ . Doko idiere gi oudo tie dako moro kame tie kede tuwo kame mie oonyo remo pi mwaka tomon kiwie are, kame oko dudubo jame kame oudo etie kede pi mino imuroko, do likame eko twero udo cango kibut ngatamoro. ⁴⁴ . En eko ot but Yesu icen nge di eko mulo lak egoe ka Yesu; esawa nono mol me remo oko jik. ⁴⁵ . Yesu oko waco be, Ngai en komula? Kakame jo dedede oko dagi kede, Petero kede jo kame oudo upere kede Yesu oko waco ne be, Ngadwong, ekodet ni en odire ikomi di ko muli, do in itie waco be, Ngai en komula. ⁴⁶ . Do Yesu oko waco be, Tie ngat omula: pien awinyo di teko tie yai ikoma. ⁴⁷ . Kakame dako nono oko niang kede be en doko likame etwero pwono, en eko bino di kome tie miel, eko riebere piny inyim Yesu: di eko tatamo ne Yesu gi kotimere di jo dedede tie winyo, gikame omio en emulo Yesu kede epone kame en eudo kede cango esawa nono. ⁴⁸ . Yesu oko waco ne dako nono be, Nyara, ot kede yomcuny, yei ni ocangi. ⁴⁹ . Di pwodi en etie yamo, icuo moro oko bino oyai ipaco me ngatel me sinagoga, di ewaco ne be, Nyari otieko to; kur bobo emeede lolo Ngapwony. ⁵⁰ . Do kakame Yesu oko winyo kede kop nono, en eko dwoko ne di ewaco ne be, Kur ibed kede lworo, kenekene yei, di en eko bino doko ber. ⁵¹ . Kakame Yesu oko tuno kede i ot, likame en eko yei ne ngatamoro donyo i ot kede en, kwanyo Petero kede Yakobo kede Yokana karacel kede papa kede toto me atin. ⁵² . Jo dedede oudo tie koko itek pi to mere, do Yesu oko waco be, Kur ikokunu, en likame eto, do etie nino anina. ⁵³ . Gin kiko donyo nyere, nyero me anywar, pien gin oudo ingeo be atin otieko to. ⁵⁴ . Do Yesu oko woto jo dedede oko, en eko mako cing atin, di eko lwongere di ewaco be, Nyako yai. ⁵⁵ . Di do tipo me atin nono oko dwogo, en eko yai esawa nono; Yesu oko ciko be mie gi acama. ⁵⁶ . Jonywal mege oko bedo kede ur adwong: do Yesu oko kwenyaro gin be kur iwac ne ngatamoro gi kotimere.