¹ Di kare oko tuno kitakame eoto kede i ot me nga pug moro obedo nga parisayo pi camo mugati ceng sabato, di iko donyo ngice. ² Di ikano, oudo tie icuo moro atie inyime, kame tie kede tuo apopongo kome. ³ Di Yesu oko penyo nga dwong me iswil kede Iparisayon, di ewaco be, "Iswil yei pi cano dano ceng sabato?" ⁴ Di gin iko ling alinga. Di Yesu oko make di eko cange, di eko mine eot. ⁵ Yesu oko dwoko ne gi di ewaco be, "Ngai kikomu kame atin mere arabo twon mere opoto ibur likame ewoto awakawaka ceng Sabato? ⁶ Di likame iko twero dwokone kop bobo ikope gi. ⁷ Di en eko cako yamo kede jo oudo tie kanono iya agole, kame eneno kede kitekame kitie yero kede agola me wor, eko waco negi be, ⁸ "Kame ngatamoro olwongi inyom kacil, kur iot bedo kabedo me wor, cemogo tie ngatamoro kame olwongo apire tek kalamo in. ⁹ Di ngat kalwongo wu nono kobino eko waco ni be, 'yai iweke welo ni kabedo,' dido lewic komaki di iyoto bedo kabedo me piny. ¹⁰ Do ka olwongi, oti iko bedo kabedo me piny, kame ngat olwongi obino, ewaco ni be, 'diera yai ikob malo.' mano bino mini wor inyim wele kame tie kedi. ¹¹ Pien ngat kame tingere malo kene, kobino dwoke piny, do ngat kame dwogo piny, kobino tinge malo." ¹² Do Yesu oko waco ne icuo olwonge i ode nono be, kame itedo cam me iceng arabo me otieno, kur ilwong jo woti arabo imiegu kede amiegu ni, arabo jo awade ni, arabo jo kioni obaro, pien ceng mogo gi da kibino lwongi, kame bedo bala cul. ¹³ Do kame itedo ebaga, lwong jo can, jo kame liao alia, jo ongwalo, kede jo awangi oto. ¹⁴ Di oko bino mini winyo, pi gin likame kitwero culi. Pien kobino culin ikare me oyaruno kede jo opoore." ¹⁵ Di ngat acel ikom jo oudo tie bedo kede Yesu ka cam, owinyo kop gi, eko waco ne be, "Etie kede winyo ngat kame bino camo mugati iya ajakanut ka Rubanga! ¹⁶ Do en eko waco ne be, "icuo moro bin oiko cam atot me otieno, do eko lwongo jo atot. ¹⁷ Di eko cwano ngatic mere, iye sawa me cam ocek kede pi ot kwenyaro jo kame elwongo, 'Bianu pien jame dedede do otieko cek.' ¹⁸ Di gin dedede inyang ngat acelacel kiko geno kwano kisa. Dano me agege owaco be, 'Dano me agege owaco be. Akwai itima kisa.' ¹⁹ "Di dano ace oko waco be, 'Ango awilo twonin me ayokon kany, do amito oot tamo gi,. Akwai itima kisa.' ²⁰ "Di dano ace oko waco be, 'Ango anyomo dako do pi mano likame atwero bino.' ²¹ Ngatic nono oko dwogo, di eko dwoko ne nga dwong mere kop, dido ngadwong mere nono kite kame cunye owang kede eko waco ne ngatic mere, ot oko awakawaka iyote adongo - dongo kede yote atitino idier bomba, di kiko kelo jo can, jo aliao alia, ingwalasa, kedo jo awangi oto.' ²² "Do ngatic oko waco be, 'nyadwong, atieko timo bala kite kame iwaco kede, di pwodi kabedo tie.' ²³ "Di ngadowng oko waco ne ngatic, ot oko kiyote adongo kede atitino me calo, di iko dino jo bino ipaco tetek, me wek oda pongi. ²⁴ Pien awaco ni be, likame tie ngatamoro kikom jo kame kolwongo go abino bilo cam na." ²⁵ Di oudo ikodeta me jo atota tota tie upere kede en, di en eko lokere, di ewaco ne gi be, ²⁶ "Kame ngatamoro obino buta, di likame eko dagi Papa, Toto, dako, idwe, imiegu kede amiegu, kede kwo mere da, likame twero bedo ngasiao na. ²⁷ Kede ngat kalikame riongo musalaba mere, di eko bino luba, likame etwero bedo ngasiao na. ²⁸ Ngai kikom wu, kame emito gero ot abor malo, likame bedo piny ber, di eko maro wel sente kame gedo nono mito, kame etie kede aromo pi tieko ot nono? ²⁹ Kalika me itimo amano, kame itieko do cako kede gedo, di likame iko twero tieke, jo dedede kame neno gedo nono bino nyeri. ³⁰ di iwaco be, 'Icuo ni ocako gedo, do likame eko etwero tieko.' ³¹ Arabo abaka mene, ame twaruno ot yi kede abaka ocelu, di likame ebedo piny, di likame eko tamo kame etwero kede isirikalen mege tutumia tomon, pi yi kede ngat kame tie kede isirikalen tutumia ot are? ³² Arabo, di pwodi joka tie kaka abor, en ecwao joor mege pi nywako kop akelo mulem? ³³ Kamanono da, ngatamoro ikom wu kalikame jalo gi dedede kame etie kede, likame twero bedo ngasiao na. ³⁴ Munyo ber, do kame munyo odoko obot, otwero mine doko edok kec? ³⁵ Likame udo eber ne lobo da, akadi me eketa ibolia, Do ouce tenge. Ngat kame tie kede yit me winyo, wek ewinyi."