¹ Ikare no oudo, tie jo mogo obino bute di ko tatamo ne kop ikom jo me Galilaya mogo kame Pilato oudo omio oneko di oko nyalo remo gi kede gi ayala gi. ² Do Yesu oko dwoko di ewaco be, "wun iterunu bala jo Galilaya go oudo obedo jo dubo irom akalamo jo Galilaya dedede en omio gin iko kanyo can acal kamano? ³ Awaco ne wu be, li. Pien wu da ibinunu beo ican kame cal kamanono kwanyo kame iswilarunu. ⁴ Arabo jo tomon iwie kanyauni kame goropa me Silom opoto oko neko, iparunu be gin oudo ibedo jo dubo kame kalamo jo dedede kame tie Yerusalem? ⁵ Awaco ne wu be li. Pien wu da ibinunu to iye kite nono, kwanyo kame iswilarunu." ⁶ Yesu bobo oko waco agole ni, "oudo tie dano moro kame opito yat epigi ipoto me olok kakame en ebino kede idude pi mono anyakini moro, likame en eko udo gimoro iye. ⁷ Do en eko waco ne ngat kame gwoko poto olok mere be, "neni, pi mwakini adek gi kame ango likame audo kede gimoro iye. Pimano tonge tenge. pinyo omio etie wumo poto.? ⁸ "Do ngatic no oko dwoko di ewaco be, 'Rwot, wek ber pi mwaka ni bobo ango ayaro kunyo dude rimaro di ako bwoto iye boliya. ⁹ Kame eko nyak udo ber, do kame li, udo icen mere do oko twero tonge piny!" ¹⁰ Di oudo en etie pwony ika cokere acel ceng Sabato. ¹¹ Oudo, tie dako moro kame tie kede tipere areco pi mwakini tomon kiwie kanyauni. En oudo ekude doko da likame etwero riere. ¹² Do kakame Yesu onene kede, en eko lwonge bute di eko waco ne be, "Dako ni otieko gonyi i goro ni." ¹³ Di en eko cinge iwi dako nono, cucuto di dako nono riere di eko mino Rubanga deyo. ¹⁴ Do ngat kame lo ka cokere oko dwoko kede gero piento Yesu ocango dano i ceng me Sabato. Di eko yamo but jo be, "tie cengere kanyape kame jo pore tic iye. Pimano, bianu di oko bino cango wu do likame i ceng me Sabato." ¹⁵ Do Rwot oko dwoko di waco be, "wun jo isidik, ngai ikom wu kalikame gonyo twon moto ko asigira mere ceng me Sabato di eko tero ot mato pii? ¹⁶ Do likame dako ni obedo akwar Aburaam, kame Sitani otweo pi mwakini tomon iwie kanyauni, pinyo omio likame ogonye ceng me Sabato?" ¹⁸ Di doko eko waco be, "Ajakanut a Rubanga cal kede nyo, doko abino pore kede nyo? ¹⁹ En ecal kede kodi me karadadi kame dano moro kwanyo eko ot cuno ipoto mere, di en eko dongo doko yat adwong, kame winy me wi yamo donyo gedo i ajange mege." ²⁰ Doko en eko medo waco be, "Apor ajakanut ka Rubanga kede nyo? ²¹ En ecal acala kede arup kame dako twomo di eko nyalo kede gi pim adek me alos tuno kede kakame alos nono bino yenyo kede." ²² Do en eko donyo beo i bomban kede i calere, di epwonyo jo di edok tetu Yerusalem. ²³ Do dano acel di oko penye be, "Rwot, mam jo anonok en kame bino udo alako?" ²⁴ Do en eko dwoko negi be, "timunu kede teko pi donyo i erute adiding, pien, awaco ne wu be, jo atot bino tamo donyo, do likame ibino twero donyo iye. ²⁵ Pien kame ngadwong won ot bino gai di eko cego ekeko, wun ibinunu cungo oko di kung kungu nu ekeko i oko di i wacunu be, Rwot yab wada, do en ebino dwoko di ewaco ne wu be, " ²⁶ Do wun ibinunu geno waco be, "wan bin ocamo di omato inyimi doko in bin i pwonyo iyote wa." ²⁷ Do en ebino dwoko be, "awaco ne wu be, ango akwia kame i wokunu iye. Irwa wunu tenge inyima wun jo tim tim areco!" ²⁸ Kinono bino bedo ka kok kede mwodo lak, wan ibinunu neno Aburaam, Isaka kede Yakobo kede inabin dedede di itie iye ajakanut ka Rubanga do wan ikomu bino wuco wu tenge. ²⁹ Do jo bino wok ki tetu wok ceng, kede tetu poto ceng, tetu malo, kede tetu piny, doko ibino bedo iye ajakanut a Rubanga. ³⁰ Nenunu bobo da, jo me atiekini bino bedo me agege, dido me agege kobino bedo me atiekini." ³¹ Icuny nono dano acel ikom Iparisayon oko bino bute di ko waco ne be, "dony oko iko yai ikan pien Erode oyaro neki." ³² Do en eko dwoko ne be, "oti iko waco ne ekwee no be, cinga ber abino riamo jwogi kede mino cango tin kede diki di ceng me adek ako bino tieko tie na. ³³ Akadi bed bala mago tie, ango poore ber a oti tin, diki kede ceng alubo, piento likame enabi miero toi oko me Yerusalem. ³⁴ Okwe Yerusalem, Yerusalem, in bomba kame didipo jo kame acwao bute kede engaro. Kame amito be arukumo in bala gweno kame rukumo idwe ibwome, in idagi. ³⁵ Do, obino weko odi dong nono. Ateteni awaco ni be, likame doko ibino nena tuno iceng kame ibino waco kede be, "itie kede winyo in ngat kame bino inying Rwot."