¹ I kare no, kakame ekodet me jo kame oudo likame marere ocokere kede karacel, kame oko mino oudo do kitie nyonyono jo icegun; en oko cako waco ne josiao mege me agege be, “Gwokerenu kikom arup me Iparisayon, kame obedo ecuke. ² Pien likame tie gimoro kame koumo, kalikame kobino nyuto kakaler, amoto kame kokano kalikame bino ngere. ³ Pi mano, gimoro kenekene kame ibinunu yamo i kakacol, ebino winyere i lero, doko kope kame iweweunu i mung i agola, kobino tatamo gi ki wi ude. ⁴ “Ango awaco ne wu jowota be, kur ibedunu kede lworo but jo kame neko kom, di likame kiko twero doko timo gimoro ace ingei mano. ⁵ Do ango ayaro kwenyaro wu i kom ngat kame poore ilworunu: Lworunu ngat kame ingei en neko etie kede twer me uco i geana; ebo, awaco ne wu be Lworenu! ⁶ “Mam ocato omobilo kany pi siringi are? do di likame tie acel moro kikom gi kame wi Rubanga wil kede. ⁷ Kiton yer acelacel me wi wu da kotieko maro. Pi mano, kur ibedunu kede lworo moro; pien wun piru tek kalamo omobilo atot. ⁸ “Doko ango aniango wu be, ngat acelacel kame tuco be en ebedo ngat kame luba i nyim jo, Wot ka dano da bino tuco be en engee i nyim imalaikan ka Rubanga; ⁹ do ngat kame bino daga i nyim jo, eda kobino dage i nyim imalaikan ka Rubanga. ¹⁰ “Doko ngat acelacel kame yamo kop me anywar i kom Wot ka dano, kobino sasiro en, do ngat kame yamo kop me acae i kom Tipo Kacil, likame kobino sasiro en. ¹¹ “Doko kame kikelo wu pi pido wu i sinagogan, kede i nyim ikikon, amotoko i nyim wegi twer, kur ibedunu kede par i kom kop kame ibinunu dwoko, arabo epone me dwoko, amoto gikame ibinunu waco; ¹² Pien Tipo Kacil bino pwonyo wu iesawa nono gikame ipoorenu waco.” ¹³ Di icuo acel oudo tie i dier ekodet oko waco ne be, “Apwony, wac ne omina pok keda jame kame wan osikao.” ¹⁴ Do Yesu oko waco ne be, “Icuo ni, ngai en komia twer me bedo ngangolkop arabo ngat kame poko ne wu jame?” ¹⁵ Di en eko waco ne gi be, “Gwokerenu, doko bedunu riek i kom kop amako paro jame; pien kuo me dano likame cungo i kom rom me jamini kame en etie kede.” ¹⁶ En oko tatamo ne gi agole di ewaco be, “Lobo me icuo ngabar moro bin oko ceko ne cam atot; ¹⁷ en eko donyo paro i cunye kene be, ‘Abino timo benyo? Pien karamoro kame ango aromo keto iye cam na gi likame tie.’ ¹⁸ Di do en eko waco be, ‘Ango nan abino timo kaman, ango ayaro rereto dere na gi piny, di ako gero adongodongo mege, en kame ako coko iye cam na kede jame na abeco dedede. ¹⁹ Di do ako waco ne cunya be, “Kuo na, nen do nan itie kede jame dedede abeco kame in ibino mito pi mwakini atot; bed do mot, cami, doko mati, di iko bedo kede yomcuny.’ ²⁰ Do Rubanga oko waco ne be, ‘Ngamingo, iwor me tin noni komito kuo ni; nan do jame kame in idiato go bino bedo me ka ngai?’ “ ²¹ Kamanono da but dano kame kano abar pire kene, do di likame ebaro i nyim Rubanga. ²² Di en oko waco ne josiao mege be, “Pi mano, ango awaco ne wu be, Kur ibedunu kede par pi kuo wu, pi gikame ibinunu camo, arabo pi komu, pi gikame ibinunu ngapo. ²³ Pien kuo pire tek kalamo cam, doko kom da pire tek kalamo giangapa. ²⁴ Nenunu ber agak, gin likame kicuo kodi, akadi likame kikao da; gin ki li kede ude me kano cam arabo dere, do Rubanga pito gi; piru tek kalamo winy go tien adi? ²⁵ Ngai kikom wu, pi bedo kede par atot, atwero medo ceng me kuo mere? ²⁶ Ka in likame itwero timo gikame titidi kamano, pinyo kame mio ibedo kede par pi jame ace? ²⁷ Paruru ber epone kame ature me itela dongo kede; gin likame kipuro, doko likame kiwio ausin; do awaco ne wu be, akadi Sulumani da ki deyo mere dedede likame oudo engapere bala ature acel ikom gi. ²⁸ Ka do Rubanga ngapo lum, kame kuo i itela tin diki di doko oko wuco gi i mac, nan do ebino ngapo wu kalamo gin tien adi. Wun jo kame yei wu titidi! ²⁹ “Pi mano, kur ibedunu mono giacama kede giamata, doko kur ibedunu kede gung cunyu. ³⁰ Pien gigi atekerin me piny mo gi, doko Papa wu ngeo be wun imitunu gi nogi. " ³¹ Do akaka mano, mounu kong Ajakanut ka Rubanga, di do gigi da ko bino bedo megu. ³² Kur ibedunu kede lworo, in ekodet atitidi, pien etie mit ka Papa wu pi mino wu Ajakanut. ³³ Cat jame kame itie kede, di iko konyo kede jocan; bedunu kede isaun kalikame twero ti, di ikounu kano abar wu malo kakame kei li kiye, kakame ngakuwo likame twero tuno iye, akadi ajekel da likame twero dudubo gi kiye. ³⁴ Pien kakame abar ni tie iye, en kame cunyi da bino bedo iye. ³⁵ Bedunu di iikerenu, doko di italan wu tie liel, ³⁶ Wuda itienu bala jo kame tie kuro dwogo ka ngadwong gi i ebaga me nyom, me wek kame edwogo di eko kukungo ekeko, kitwero yabe awakawaka. ³⁷ Kitie kede winyo jotic kame ngadwong gi bino dwogo di eko udo gi di kineeno; ateteni awaco ne wu be, en ebino tweno piere di eko mino gi kibedo piny cam, di eko poko ne gi cam. ³⁸ Ka edwogo esawa me i dier iwor amotoko obai, di eko udo jotic nogo di kitieko iikere; winyo bino mako gi. ³⁹ Do miero ingeunu be, ka koto di oudo won ot ngeo esawa kame ngakuwo oyaro bino kede, oudo koto egwokere di likame eko weko koturo ode. ⁴⁰ Pi mano, en komio uda miero ibedunu di itiekunu iikere, pien Wot ka dano bino ngoole dwogo iesawa kame wun likame iparunu.” ⁴¹ Di Petero oko waco ne Yesu be, “Rwot itie yamo agole ni pi wan kenwa, arabo pi jo dedede?” ⁴² Rwot oko waco ne be, “Ngai en kame ngagwok kame genere da di eriek, kame ngadwong mere kete telo ture kede jame dedede kame tie iye, pi mino jotic icegun cam iesawa ikokome? ⁴³ Ngatic nono tie kede winyo ka ngadwong mere bino dwogo ko ude di etie timo kamanono. ⁴⁴ Ateteni ango awaco ne wu be, en ebino keto ngatic nono pi lono jame kame etie kede dedede. ⁴⁵ Do ka ngatic no oko donyo yamo i cunye kene kene be, ‘Ngadwong na oyaro gal dwogo; di en eko cako bungo jotic icegun acuo kede amon, di eko donyo cam kede amata di eko donyo mer, ⁴⁶ ngadwong ka ngatic nono bino ngoole dwogo i ceng kalikame en egeno, kede iesawa kame en ekwia, di eko bino ngongolo en di eko ribe i kom jo kalikame genere. ⁴⁷ “Doko ngatic kame oudo ngeo gikame ngadwong mere mito, di en likame eko iikere arabo timo gikame mit mere mito, kobino daane ibelai atot. ⁴⁸ Do ngatic kalikame oudo ngeo gikame ngadwong mere mito, di en eko donyo timo gikame oudo romo mino kobunge, kobino bunge kede ibelai anonok. Pien ngat kame komio atot, kobino penyo atot da kibute; doko ngat kame kogeno kede atot, kobino da burao atot kibute.” ⁴⁹ Ango abino pi kelo mac i lobo, do oudo amito be koto di nan kotieko cwinye. ⁵⁰ Do ango atie kede batisimu kame miero batiso ango kede, da cunya winyo lito tuno kede ka etieko cobere! ⁵¹ Iparunu be ango abino pi kelo mulem i lobo? Awaco ne wu be likame amano; do apokapoka. ⁵² Pien cako nan, jo kany bino bedo tie ipaco acel di ipokere, jo adek bino dagi jo are, di jo are da ko bino dagi jo adek. ⁵³ Papa bino pokere eko dagi wode, doko awobi da bino dagere kede papa mere; toto bino dagi nyare, di nyako da ko dagi toto mere. Toto me awobi bino dagi dako ka wode, doko dako me awobi da bino dagi daa mere.” ⁵⁴ Doko Yesu oko waco ne jo be, “Ka wun inenunu idoun di tingere malo i tetu poto ceng, esawa nono di icakunu waco be, ‘Kot oyaro cwei’; doko di eko timere kamanono da. ⁵⁵ Doko ka inenunu yamo kame buko di wok i tetu ongalimake, iwacunu be, ‘Piny tin oyaro doko liet’; da di eko timere da. ⁵⁶ Wun joecuke, ingeunu gonyo dwong me gikame tie timere ka inenunu cal me malo kede me piny, do pinyo ber komio likame itwerunu poko kare noni? ⁵⁷ Ebo, pinyo ber komio wun likame itwerunu ngeno poko gikaber? ⁵⁸ Kame itie ot i nyim ngangolkop di i upere kede ngat kame tie pidi, tamakino kede teko pi poro kede kop di itienu i yongayo me wek kur eteri i nyim ngangolkop, di ngangolkop ko bino keti i cing sirikale kame ko bino rwaki i otkol. ⁵⁹ Awaco ni be, likame ibino wok ki kuno tuno kede di itieko culo nusu me ajikini kame kotangi kede.