¹ 1. Kakame oudo Yesu tie kede ilega ikabedo moro, di do en etieko lego, ngasiao mere acel oko waco ne be, Rwot, pwony wan epone kame olego kede bala kame Yokana da opwonyo kede josiao mege. ² . En eko waco ne gin be, kame itienu ilega, yamunu kaman; Papa wa kame tie imalo, Nyingi bed me awora, Ajakanut nin bin, Gikame in imito timere, bala kame etimere kede imalo, etimere ipiny da. ³ . Mi wa ceng acelacel cam wa me buli ceng, ⁴ . Di iko sasiro wa gikareco wa, bala kame wada osasiro kede dano acelacel kame timo ne wa gikaraco. Doko kur iwek wa opoti i atama, do lak wa ikom ikom gikarac. ⁵ . Bobo en eko waco ne gi be, Ngai kikom wu kame koto itie kede ngawote, kame bino ot bute idyer iwor di iko waco ne be, Dyera, kopa ber mugati adek, ⁶ . Pien ngawota moro obeo tura nan do ali kede gimoro kame asobolo mine ecami. ⁷ . Di en eko dwoko ni di etie i ode di ewaco be, Kur ilola; ango atieko cego ekeko, doko ango atie kede idwe na otieko buto, likame atwero yai ako mini. ⁸ . Ango awaco ne wu be, Bed bala likame emito yai eko mini, pien en ebedo nga wote, do pi en cobuno adyere nono, en ebino yai di eko mine kame romo. ⁹ . Ango awaco ne wu be, Penyunu, di oko bino mino wu, mounu, di ikounu bino udo, kukungunu, di oko bino yabo ne wu. ¹⁰ . Pien dano acelacel kame penyo, kobino mine, doko ngat kame moo, ebino udo; da ngat kame kukungo kobino yabo ne. ¹¹ . Ka wodi openyo mugati kibut ngatamoro kikom wu ngat kame tie papa, ebino kere mine kidi? arabo ka epenyo deknam, akaka mine deknam ebino mine twol? ¹² . Arabo ka epenyo abe, en ebino mine ekiliton? ¹³ . Ka do ber wun jo areco, ingeunu mino giamia kabeco but idwe wu, do do Papa wu kame tie imalo kalamo tien adi me en mino Tipo Kacil but jo kame kwae. ¹⁴ . En oudo etie riamo jwogi kame oudo ling-alinga. Do kakame jwogi otieko yai kede, dano oudo ling-alinga nono oko cako yamo; jo oko bedo kede wur adwong twatwal. ¹⁵ . Do jo mogo kikom gi oko waco be, En eriamo jwogi kede twer owok kibut Belesebul. ¹⁶ . Do mogo kikom gi oko tame, di kipenye be enyut ne gi gianena moro kame yai imalo. ¹⁷ . Do Yesu oudo ngeo tam gi, en eko waco ne gi be, Ajakanut acelacel kame pokere eko donyo atwomotwomun kene, ebino poto; doko ot acelacel kame bino pokere kene, likame twero cungo. ¹⁸ . Ka Sitani da opokere yii kene, epone mene kame ajakanut mere bino cungo kede? Pien wun iyamunu be ango ariamo jwogi pi twer ka Belesebul. ¹⁹ . Kame ango ariamo jwogi pi twer kame wok kibut Belesebul, awobe wun do udo twer me riame kituai? Pimano, idwe wu do en kame bino ngolo ne wun kop. ²⁰ . Do kame ango atie riamo jwogi kede akarinikin ka Rubanga, udo Ajakanut ka Rubanga otieko bino butu, abongo abuinikin moro. ²¹ . Kame dano atek, kame tie kede jamini me yii, odaro ture; jamini mege udo bedo imulem. ²² . Do ka ngat kame tek kalamo en obino di ko sure, di eko bwone, en ebino tero jamini dedede me yii kame en oudo egeno nogo, di eko pokopoko jamini kame en eyako nogo. ²³ . Ngat kame likame tie keda, udo en likame emita; doko ngat kalikame coko keda, udo en esasaro. ²⁴ . Kame tipo arac oyai tenge ikom dano, eoto bebeo kabedo kotuo, di emo kakame tromo wei iye; do kalikame eko udo karamoro, en eko waco be, Ango abino dok i oda kakame a wok kiye. ²⁵ . Kame en edwogo, en eko ude di koweo do ko di koike kiber. ²⁶ . Di do en eko ot eko kelo bute tipere kanyaare ace kame reco kalamo en; gin kiko donyo, di kiko bedo kuno, kuo ka dano no me ajikini bino bedo rac kalamo me agege. ²⁷ . Ingei en yamo kope gi, dako moro idyer ekodet oko yamo kede dwan amalo di eko waco ne be, Tie kede winyo aliliget konywali kede tuno kame in idoto. ²⁸ . Do en eko waco be, Eebo, do akato mere, tie kede winyo jo kame winyo kop ka Rubanga di kiko keto itic. ²⁹ . Doko kakame ekodet adwong oko cokere kede karacel, Yesu oko cako waco be, Man en obedo lwak arac, gin kitie mono gianena, do likame tie gikanena moro kame oyaro mino gi, kwanyo gianena ka enabi Yona. ³⁰ . Pien bala kame Yona obedo kede gianena ne jo me Nenibe, kamanono da Wot ka dano bino bedo gianena me lwak ni. ³¹ Abaka adako me tetu Ongalo-kimat, bino cungo malo pido kede jo me lwak ni, di eko ngolo kop lo gi, pien bin en eyai i ajikini me lobo pi bino winyo kop kabaka Solomon me rieko; do nan wan otie kede ngat kame dwong kalamo Solomon tie kan. ³² . Cuo me Ninebe bino cungo malo esawa me ngolo kop ne jo me lwak ni; gin kiko bino ngolo ne gi kop. Pien gin bin kiko swilaro ikare kame Yona otuco kede ejiri; do nan neni, dano kame dwong kalamo Yona tie kan. ³³ . Likame tie dano kame ecwinyo etala, eko kete kaka opwono arabo ume kede ebukit, do eketo kakame ecungo iye, me wek jo kame donyo i ot udo ot ler. ³⁴ . Lero me kom en obedo wang dano, pi mano kame wangi oriere, komi dedede udo opong kede lero; do kame wangi rac, udo komi da opong kede colo. ³⁵ . Pi mano gwokere nu, me wek kur lero kame nataman tie ni dok colo. ³⁶ . Ka komi dedede tie kede lero, di likame tie dul moro kame tie i colo, komi dedede udo do opong kede lero; bala kame asara me liel me etala mio kede lero. ³⁷ . Di do en oudo etie yamo, Ngaparisayo moro oko lwonge ot cam kede: en eko donyo i ot cam, eko bedo piny pi cam. ³⁸ Do kakame Ngaparisayo noni oneno kede kamano, eko bedo kede ur pien Yesu oudo ocako cam di likame elwoko cinge. ³⁹ . Di Rwot oko waco ne be, Wun Iparisayon ilwokunu ngei ikopo kede bakuli, do di cuny wu opong kede amao kede gikareco. ⁴⁰ . Wun jo mingo, bin likame ngat otimo ooko en kotimo kiton yie da? ⁴¹ . Do miunu giamia me epone go but jocan bala kame mitere, di do gi me yie dedede ko doko gikame cil. ⁴² . Do can tie iwi wu, wun Iparisayon; pien wun imiunu acel me tomon me otigo kede amalakwang, kede epone me gi acamere dedede kame ongwedo angweda, do di likame iparunu pi timo ateni kede amara ka Rubanga, oudo koto magi en kame wun ipoore nu timo, abongo weko ace di likame otimo. ⁴³ . Itie nu ican, wun Iparisayon pien wun imarunu komini me wor i sinagogan, kede di omoto wu kede wor adwong i atalen. ⁴⁴ . Can ikomu, wun jo i wandik kede Iparisayon, joecuke! Pien wun icalunu bala atesin kalikame neeno, doko jo kame beo i wi gi da likame ngeo be kitie kanono. ⁴⁵ . Di do ngagwok iswil acel oko dwoko di waco ne be, Ngadwong, yamo epone mano kelo ayet naka ikom wa da. ⁴⁶ . Di Yesu oko waco be, can ikom wu da, wun joagwoko iswilia! Pien wun i miunu jo yeno yec apek adikinicel, kame wun ikom wu likame tie dano kame yei mulo kede lwete. ⁴⁷ . Can ikom wu! Pien wun igerunu atesin me inabin, kame bin joapapi wu en oneko. ⁴⁸ . Ateteni wun imokunu ijura be iyeunu kede tice ka joapapi wu: pien ateteni gin riki kineko inabin; di wun nan ikounu gero atesin no go. ⁴⁹ . Pi mano, doko rieko ka Rubanga waco kaman be, Ango abino cwano ne gi inabin kede joor, do mogo kikom gi gin iyaro tidilo kede nedo da. ⁵⁰ . Me wek remo me inabin dedede kame riki oony cako i agege me cweno lobo, peny kibut lwak noni. ⁵¹ . Cako kibut remo ka Abel tuno naka iremo ka Sakaria, kame koneko idyere-dyere me alutari kede tempulo.Ateteni awaco ne wu be, kobino penyo gi kibut jo me lwak noni. ⁵² . Can ikom wu, wun jogwok iswil! Pien wun iterunu agony me ngec ikanunu, do wu da ikom wu likame bobo ikounu donyo iye; doko jo kame mito donyo iye da, wun itie nu gengo gi. ⁵³ . Kakame Yesu oudo tie yamo kede kope gi but gi; jo angeo iswilia kede Iparisayon oko cako bunano en kitek di ki ko kelo ne peny atot me tame tetekeny eyam kope ace atot. ⁵⁴ . Di oudo kitie kine, kede pi momo kope me doge pi mito make kede.