¹ . Ingei magonogo Rwot ono yero jo ot kanyaare ace da, di en eko oro gin jo are are ingeo ot nen i bomba dedede kede kabedere dedede, kame en oudo eyar ot iye. ² . En ewaco negi be, kac Ateteni dwong, do jotic nonote; pimano kwaunu Rwot won rac wek icwai jotic i kac mere. ³ . Nenunu ango aoro wu bala idwe me romini I diere me ipeon as ootunu. ⁴ . Kur imiakunu isaun me sente kur imotunu dano moro i yongayo. ⁵ . Ot moroni kenekene kame idonyunu iye, kong wacunu be, “mulem wu bed i ot noni.” ⁶ . Di na tie dano moro kanono kame maro mulem, mulem wu bino iye. Aso ka li mulem wu dwogo butu bobo. ⁷ . Bedunu i ot acel nono, di icamunu kede imatunu gikame gin kimio, pien poore komi ngatic cul mere. Kur ibedunu konobo akokob i ude ⁸ . Bomba moroni kenekene kame ibinunu donyo iye, di gin kiko gamo wu, camunu gikame gin kiketo inyim wu. ⁹ . Congunu jotune kame tie iye, di inonu waco negi be, “Ajakanut ka Rubanga etieko bino iyapiyapi kede wu. ¹⁰ . Do bomba moroni kenekene kame wur idonyunu iye, di gin likame kiko gamo wu, otunu i yote mege di ikounu waco be, ¹¹ . “Kiton apua me bomba wu, kame moko ikom wa, wan otetengo gi newu. Akadi namanono da, poore ingeunu manoni en be Ajakanut ka Rubanga otieno bino iyapiyapi butu. ¹² . Do ango awaco newu be, i ceng nono ebino bedo beber ne Sodom kalamo bomba nono. ¹³ . Itie i peko tin benyo, in Korasin! Itie i peko tin benyo in Betesaida! Pien ka noto tice me twer kame kotino buti nogi, bin kotimo i Taya kede Sidon, koto oudo gin bin Kiswilaro sen, di kibedo i ipunoi kede i buru. ¹⁴ . Do ebino bedo beber ne Taya kede Sidon i ceng me Ngolonop kalamo in. ¹⁵ . Kede in Kaperanaum kame etingere naka i malo, kobino wuci piny i Geana. ¹⁶ . Ngat kame winyo wu, winye, kede ngat kame cao wu, udo ecaa; dono ngat kame caa udo ecao ngat koora. ¹⁷ . Di jo ot – kanyaare nogo eko dok kede nilel di kiwaco be, Rwot, kiton jwogi da tie itwer wan i nyingi. ¹⁸ . En eko waco negi be, “Ango aneno Sitani di epoto i malo bala epie. ¹⁹ . Nenunu, ango amio wu twer me nyono twole kede ikilitonga, kede ikom twer dedede me ngakwor, di likame tie gimoro akadi acel kame bino mino wu awanon. ²⁰ . Akadi kamanono da, kur ilelunu pi manoni be pien tipere tie i twer wu; do akaka manono lelunu pien kowandiko nyingu i malo.” ²¹ . Esawa nono Yesu oko ilel i Tipo kacil, di eko waco be, “Ango apwoyi, okure papa, Rwot me i malo kede piny, piento in iko kano ginogi kibut jorieko kede kame tie kede niang, di iko mino gi kingere but imukerun akadi kamanono da, papa, manoni oudo eneeno eber i wangi. ²² . Papana otieko mima jame dedede, likame tie ngat kame ngeo ngai en kobedo wod, kwanyo papa, doko likame tie ngat kame ngeo tie ngat kame wod mie engeo. ²³ . Di en eko lokere but josiao mege, di eko waco ne gin kenogi be, “Etie kede winyo en ngat kame eneno gikame wun inenunu. ²⁴ . Pien ango awaco newu be, inabino kede abakai atot oudo cuny gi mito nono ginogo kame wun inenunu do likame kiko neno gi; kede oudo kimito winyo ginogo kame wun iwinyunu, di likame kiko winyo gi. ²⁵ . Di neningo, pulida moro oko cungo malo, di eko tame; en enaco be, “Nyadwong, nyo kame ango abin atimi en amio adonyi i kuo kame bedo nakanaka?” ²⁶ . Yesu oko waco ne be, “Nyo kame kowandiko i iswil? Isome benyo?” ²⁷ . En eko gamo di ewaco be, “In ibino maro Rwot Rubanga ni kede cunyi lung, kede kuo ni lung kere tam ni dedede, kede nyakio ni bala kame i maro kede noni keni.” ²⁸ . Di Yesu oko waco ne be. “In idwoko kakare; tim kamanono, di in iko bino kuo. ²⁹ . Do en pi mito waco be en eber eko waco ne Yesu be, “Ngai en ngakio na?” ³⁰ . Yesu oko dwoko ne be, “Tie bin icuo moro koudo oyai ni Yerusalem etie ot Yeriko, di en eko poto i cing jokuwo, di gin kiko gonyo igoen lu kome di kiko bunge, kiko yai kioto kiweke di ewile. ³¹ . Winyo aber, nyasaseredoti moro oko beo kanono. Kakame en enene kede, en eko beo ingete kitenge. ³² . Kamanono da ngalebi moro oko beo, kakame eturo kede kanono, eko bino di eko nene, di eko beo ingete kitenge. ³³ . Do ngasamaria moro, kakame oudo etie ot kede, eko turo kakame icuo nono oudo tie iye, kakame enene kede, kisa oko make i kome. ³⁴ . En eko ot bute di eko twetweo aporeso mege di eonyo i yigi moo kede bwini, di eko tere i ot me gwoko wele, di en eko gwoko. ³⁵ . Di i ceng alubo mere, kakame en oudo etie yai kede, eko kwanyo denari are di eko mino Ngatel me ot nono di ewaco ne be, “Gwok icuo ni; doko gimoroni dedede ace kame in ibino tic kere i kome, ango abino culi ikare kame adwogo kede.” ³⁶ . Ngai do nan ikom jo adek nogi, kame in itamo be oudo obedo ngakio me icuo nono koudo opoto i cing jokuwo? ³⁷ . Di en eko maco be, “Ngat konyuto ne cuny me kisa.” Dido Yesu oko waco ne be, “Oti iko ida timo kamanono.” ³⁸ . Nataman do di gin oudo kitie ot, Yesu oko donyo i calo moro: di dako moro kame nyinge Marita oko game i ode. ³⁹ . Marita oudo tie kede amimere kame yinge Maria kame oudo tie bedo katyen Yesu di ewinyo pwony mere. ⁴⁰ . Do Marita oudo tie lole timo tice atot atota, di en eko ot bute, di eko waco ne Rwot be, “Mam in likame iparo be amina oweka timo tic ango nena? Pimano, wace ekonya. ⁴¹ . Di Yesu oko gamo doge di ewaco ne be, Marita, Marita, in itie paro, doko jamini atot atota tie lolo tam nin. ⁴² . Do giacel en amitere: Maria otieko yero dul aber, kalikame kobino kwanyo tenge kibute.