1
. Ango en olok me ateni do papa na en kame ngapur.
2
. Buli ajange kame tie ikoma di likame kinyako anyakini en elwero tenge ajange dedede kame tie ikoma di kinyako anyakini en etemuno me wek enyak nyige atot kalamo.
3
. Nan do kope kame ango awaco ne wu otieko longo wu.
4
. Dongunu i ango, ango da ako dong butu. Bala kite kame ajange likame twero nyako kede anyakini en kame kwanyo ka edong ikom olok, kamanono da wuda likame itwerunu nyako anyakini wun kenu kwanyo ka idongunu iango.
5
. Ango en olok wun en ajange mege ngat kame dong iango di ango da ako dong bute ngat nono en kame bino nyako anyakini atot, pien likame itwerunu timo gimoro abongo ango.
6
. Kame ngata moro likame odong iango kouce tenge bala ajange di eko tuwo di jo ko coko gi di oko uco gi imac di kiko wang.
7
. Ka idongunu i ango, di kop na ko dong butu ibinunu kwano gikame imitunu di oko timo ne wu.
8
. Ikanoni papa na udo deyo ka wun inyakunu anyakini atot di ikounu doko josiao na.
9
. Bala kite kame papa omara kede kamanono da ada amaro wu, otunu i amara na.
10
. Ka igwokunu giacika na, ibinunu dong i amara na, bala kite kame ango agwoko kede giacika ka papa na, di ako dong i amara mere.
11
. Ango awaco ne wu ginogi tetekeny ibedunu kede kilel kopong.
12
. Man en giacika na, marenu kenu kenu bala kite kame ango amaro wu kede.
13
. Likame tie amara dano moro tie kede kame dwong kalamo man, kame dano yei jalo kede kuo mere pi jowote.
14
. Wun jowote kame itimunu gi kame aciko wu iye.
15
. Likame bobo abino lwongo wu be Ipasoi, piento epasoit likame ngeo gikame Ngadwong mere timo, do ango alwongo wu be jowota, pi gidedede kame ango awinyo kibut papa na amio ongeere butu.
16
. Wun likame iyerunu do ango en kame ayero wu, di ako cwano wu, me wek iotunu di ikonu nyako anyakini kede da wek anyakini wu dong nakanaka tetekeny papa na miu gimoroni kame wun ibinunu kwano inyinge.
17
. Ango aciko wu iginogi wek imarerenu kenu kenu.
18
. Ka wilobo odagi wu, ngeunu be bin egeo dagi ango, dipwodi likame edagi wun.
19
. Ka koto di wun oudo ibedunu jo me lobo koto omaro wu bala jo mege do pien wun likame ibedunu jo me lobo do ango ayero wu ilobo manono en omio lobo ni dagi wu.
20
. Yutununu kop kame oudo awaco ne wu be epasoit likame dwong kalamo Ngadwong mere. Ka kitidilo ango kibino tidilo wuda. Ka kiwinyo kop na, kibino winyo kop wuda.
21
. Do gigi dedede kibino timo ne wu pi nyinga, pien likame kingeo ngat kame oora.
22
. Koto udo likame ango abino, di ako yamo kede gi, udo kili kede dub, doko na kili kede ka gengere me pido pi bal gi.
23
. Ngat kame dagi ango, wudo edagi papa na da.
24
. Ka koto oudo likame ango atimo idiere gi tice kalikame tie ngatamoro kotimo, koto udo kili kede dub, do nan kitieko neno gi kame ango atimo, kede dagi ango karacel kede papa na da.
25
. Do magi dedede otimere pi cobo kop kame owandiko iye iswil gi, be kidaga abongo tien kop moro.
26
. Do kame ngakony obino, kame ango abino cwano ne wu di wok ibut papa, Tipo me ateni, kame bino wok kibut papa en ebino jurao ango.
27
. Doko wuda ibinunu bedo ijura na pien wun oudo itienu keda cako ki i agege.