¹ Di ceng oudo odong kanyape tuno i ebaga me Bwot, Yesu oko ot Betania kakame oudo Lasaro ngat oudo oto bedo iye; ngat kame en eyaruno kikom jo oto. ² Gin bin kiko iiko ne en cam me otieno, di Marita oko donyo toko; Lasaro da oudo tie ngat acel kikom jo kame oudo tie bedo i emesa kanono kede Yesu. ³ Di Maria oko woto cupa acel me mo opong kame olwongo be nardi, kame wel mere dwong twatwal, en eko onyo i tien Yesu, di eko donyo weweo kede yer wie. Ngwece me mo nono oko wosun oromo ot dedede. ⁴ Di acel ikom josiao mege kame nyinge Yuda Isikariot, wot ka Simoni ngat acel kame oudo oyaro rupao en, oko penyere be, ⁵ “Pinyo komio likame oudo ocato mo kikukuny ni i wel me denari tol adek di oko mino jocan?” ⁶ En eyamo kamano likame be piento en oudo eparo pi jocan, do piento en oudo ebedo akuwo; doko isau me sente oudo bin tie bute, di oudo elwidanaro gikame oketo iye. ⁷ Di Yesu oko waco be, “Wun wekunu dako no, en egwoko mo no pi daro ceng me yika na. ⁸ Pi wun iyarunu bedo kede jocan nakanaka, do ango likame abino bedo kede wu nakanaka.” ⁹ Ekodet adwong me Iyudayan oko ngeeno be Yesu oudo tie kuno, gin kiko ot kuno, likame pi neno Yesu kenekene, do pi neno Lasaro da, ngat kame en oudo oyaruno kikom jo oto. ¹⁰ Do jodongo me josaseredoti oko cako iiko tam me neko Lasaro da, ¹¹ pien kop mere omio Iyudayan atot oudo tie yai weko gin di kidonyo yei Yesu. ¹² Oru mere, jo atot kame oudo tie bino i ebaga kakame kiwinyo kede be Yesu oudo tie bino Yerusalem. ¹³ Kiko jako jange me otit, di kiko ot pi riamakin kede di kilelemo be, “Osana! Winyo bed but Abaka me Isirael kame tie bino i nying Rwot” ¹⁴ Kakame Yesu oko udo kede atin me punda, en eko yito ingee, bala kame oudo owandiko kede be, ¹⁵ “Kur ibed kede lworo in nyako me Sion. Neni, abaka nin ine tie bino, di etie bedo ingei atin me punda!” ¹⁶ Josiao mege bin likame oko niang dwong me kope gi i agege mere; do kakame Yesu oko neeno kede i deyo mere, gin kiko yutuno be kara oudo kowandiko kop nogi be bino timere i kom en, doko da di oko timo ne. ¹⁷ Pi mano, jo kame oudo tie kede en kakame elwongo kede Lasaro ooko ki ates di eko yaruno en kikom jo oto, oko mino ijura i kom gi dedede kame oudo otimere. ¹⁸ Pi tien kop noni en oko mino jo da oko ot riamakin kede en, pien gin oudo kiwinyo be en kame bin etimo gianena noni. ¹⁹ Pi mano, Iparisayon oko donyo yamo ken gi ken gi be, “Mam wun inenu be wan nan do likame obinunu twero timo gimoro akadi acel? pien piny dedede do ogwarere ot lube!” ²⁰ Doko oudo tie Jogurik mogo da kame oudo tie idiere gi obino Yerusalem pi ilega i kare me ebaga. ²¹ Gin kiko ot but Pilipo ngat kame oudo owok ki Betesaida, kame tie Galilaya, di kiko kwane, di kiwaco be, “Adwong, wan omito neno Yesu.” ²² Pilipo oko ot di eko waco ne Anderia, di do Anderia kede Pilipo oko ot waco ne Yesu. ²³ Di Yesu oko dwoko ne gi di eyamo be, “Esawa otieko tuno kame kobino mino kede deyo Wot ka dano deyo. ²⁴ Ateteni, ateteni awaco ne wu be, kalikame nyige me mawele opoto i lobo di eko to, en ebino dong di etie acel kamanono; do ka eto, ebino nyako nyige atot. ²⁵ Ngat kame maro kuo mere bino kei, do ngat kame dagi kuo mere i piny kan, udo en etie dare pi kuo kame bedo nakanaka. ²⁶ Ka ngatamoro otimo tic pira, poore en luba, me wek kakame ango abedo iye, en kakame ngatic na da bino bedo iye: ka ngatamoro otimo tic pira, Papa na bino nyuto wor i kom ngat nono. ²⁷ Nataman cunya likame winyo iber, awac benyo? ‘Papa, laka i esawa me noni’ do pi kop noni en komio ango atuno i esawa ni. ²⁸ Papa, mi nyingi ud deyo.” Di dwan oko wok i malo di ewaco be, “Ango atieko mine deyo, doko abino medo mine deyo.” ²⁹ Jo kame oudo tie cungo kuno oko winyo dwan nono, di kiko waco be manono oudo mwoc me kot, do mogo oko waco be, “Malaika en oyamo kede!” ³⁰ Do Yesu oko dwoko ne gi di ewaco be, “Dwan no li obino pira, do pir wu. ³¹ Nan do en esawa me ngolo kop ne piny kan: da nan en obedo esawa kame oyaro riamo kede ngapug piny kan tenge. ³² Doko kame kotinga malo i piny kan, ango abino kelo jo dedede buta.” ³³ En eyamo kaman pi nyuto epone kame oudo eyaro to kede. ³⁴ Jo oko dwoko ne be, “Wan owinyo i Iswil wa, be Krisito bino bedo nakanaka; benyo benyo komio in itie waco be poore ting Wot ka dano malo? Wot ka dano noni en ngai?” ³⁵ Di do Yesu oko waco ne gi be, “Itienu kede lero pi kare moro acecek, miero iotunu di lero pwodi tie kede wu, me wek kur colo ngol wu; pien ngat kame oto i colo likame ngeo kakame etie ot iye. ³⁶ Di nan lero pwodi etie kede wu, yeunu lero, tetekeny ibedunu idwe me lero.” " Ingei yamo kope nogi, Yesu oko yai di eko ot pwono ne gi. ³⁷ Bed bala en oudo otimo gianena atot i nyim gi, do likame gin kiko yei en; ³⁸ Me wek kop kame Isaya enabi bin owaco cobere kakare, kame en ewaco be, " “Rwot, ngai en koyei kop kame wan owaco? Doko ngai en kame twer ka Rwot onyutere bute?” ³⁹ Pi mano, omio gin likame kiko yei, pien oudo Isaya bobo owaco be, ⁴⁰ En etieko umo wang gi, doko ecego tam gi, me wek kur kineni kede wan gi; kede udo niang icuny gi, di kiko lokere, di ango ako cango gi.” ⁴¹ Isaya bin oyamo kope gi di oudo etieko neno deyo mere di eko yamo kope kame make. ⁴² Bed bala mago tie, idiere me jotel me Iyudayan atot mege oko yei en, do pi lworo Iparisayon oko mino gin likame kiko tuco yei gi, me tetekeny kur riam gi tenge i sinagoga. ⁴³ Pien gin oudo kimaro pak me jo kalamo pak kame Rubanga mio. ⁴⁴ Yesu oko yamo kede dwan amalo di ewaco be, “Ngat kame yei ango, udo likame eyei ango do udo eyei ngat kame oora. ⁴⁵ Doko ngat kame nenango, udo eneno ngat kame oora. ⁴⁶ Ango abino i piny bala lero, tetekeny ngat kame yei ango kur edong di etie i colo. ⁴⁷ Doko ka ngatamoro owinyo kope na, di likame eko lubo gi, ango likame angolo ne kop, pien ango likame abino pi ngolo kop ne piny, do pi lako piny. ⁴⁸ Ngat kame daga di likame emito gamo kop na, en etie kede ngat kame bino ngolo ne kop; doko kop kame ango ayamo en kame bino ngolo nen kop i ceng me ajikini. ⁴⁹ Pien ango likame ayamo kop kame maka, do Papa ngat koora en komia cik, gikame poore ango tatamo kede gikame poore ango yamo. ⁵⁰ Doko ango angeo be cik mere obedo kuo kame bedo nakanaka: pi mano, gikame ango ayamo dedede, udo kop kame Papa oyamo en kame ango awaco.”