1
. Oudo tie icuo moro kame oudo tuwo, kame nyinge Lasaro, dano me Betania kame tie bomba ka Maria kede amimere Marita.
2
. Maia nono en kame oudo owiro Rwot kede mo me sut, di eweweo tiene kede yer me wie; en kame omimere Lasaro oudo tuwo.
3
. Pimano, amiegu mege oudo oko cwano kop bute di kiwaco be, Rwot, neningo, dano kame in imaro kome lit twatwal.
4
. Kakame Yesu owinyo kede kope go, En eko waco be, Tuwo ni likame bino tere naka ito; do pi kelo ne Rubanga deyo, me wek Wot ka Rubanga ud deyo iye.
5
. Oudo Yesu maro Marita, kede amimere karacel kede Lasaro.
6
. Pimano, kakame en oudo ewinyo kede be Lasaro tuwo, en eko ber dong bedo kakame oudo etie iye pi ceng are.
7
. Do icen mere, en eko waco ne josiao mege be, odukunu bobo ber Yudea.
8
. Josiao mege oko dwoko ne be, Nyadwong, nyoro-anyora Iyudayan oudo mito didipo in kede kide; in bobo imito dok kunono?
9
. Yesu oko dwoko be, Benyo iceng acel likame tie iye isawan tomon kiwie are? Ka dano moro tie ot iceng likame etwero dipo tiene, pien etie neno lero me lobo kan.
10
. Do ka dano tie ot iwor, etwero dipo tiene pien lero udo likame tie ikome.
11
. En eyamo gigi, di icen mere eko waco ne gi be, Ngawot wa Lasaro en onino: do Ango atie ot pi wek amie ecei inino.
12
. Di josiao mege oko waco be, Rwot ka enino, ebino cei.
13
. Do Yesu oudo tie yamo kop amako to mere, do gin kitamo be en oudo etie yamo nino anina me wei.
14
. Di do Yesu oko tuco ne gi kop kakaler be, Lasaro en otieko to.
15
. Do Ango cunya yom pi wun, pien Ango oudo likame atie kuno; me wek wun iyeunu, do akadi mago tie da, ootunu bute.
16
. Do Tomasi kame oudo olwongo be Didimosi, oko waco ne josiao icegun be, wada ootunu; tetekeny otoi karacel kede en.
17
. Kakame Yesu otuno kede kuno, eudo be en oudo etieko ceng ongwon i ates.
18
. Betania oudo iyapiyapi kede Yerusalem boro me mairo aromo are.
19
. Pimano, Iyudayan atot oudo obino cungo ne Marita kede Maria pi kweno cuny gi pi to omin gi.
20
. Awakawaka kakame Marita owinyo kede be Yesu oudo tie bino, en eko ot pi game; do Maria oko dong i ot
21
. Di do Marota oko waco ne Yesu be, Rwot, ka koto oudo in itie kane, koto omina oudo likame oto.
22
. Do nataman da, ango angeo be, gi dedede kame in ikwao Rubanga; Rubanga bino mini.
23
. Yesu oko waco ne be, omini bino dwogo ikuo bobo.
24
. Marita oko waco ne be, ango angeo be en ebino dwogo ikuo bobo iceng me ajikini kame jo bino yaruno kede.
25
. Yesu oko waco ne be, Ango en iyarun kede kuo; ngat kame yei Ango, bed bala oudo eto, en ebino kuo.
26
. Doko ngat kame nan kuo kame yei Ango, likame bino to: in iyei kede kop go?
27
. Marita oko waco ne be, Eebo Rwot: ango ayei be in en ibedo Kristo, Wot ka Rubanga kame oudo poore bino ilobo,
28
. kakame Marita otieko yamo kede kope go, en di eko yai ot, eko lwongo amimere Maria i imung, di ewaco be, Nyadwong obino, etie lwongi.
29
. Awakawaka kakame Maria owinyo kede kop no, en eko susunyo yai eko onyaro ot bute.
30
. Yesu oudo pwodi likame otuno ipaco, oudo pwodi etie kakame Marita oriamo kede iye ca.
31
. Kakame Iyudayan kame oudo tie bedo kede Maria i ot, di kikweo cunye, oneno kede Maria di yai awakawaka di eko donyo ooko; gin kiko lube di kiparo be en etie ot koko i ates.
32
. Kakame Maria otuno kede but Yesu, di eko neene, en eko riebere piny itiene di ewaco ne be, Rwot, ka koto in oudo itie kan, omina koto oudo likame oto.
33
. Pimano, kakame Yesu onene kede di etie koko, kede Iyudayan kame bin tie upere kede da oudo tie koko, eko winyo apil icunye, di eko winyo lito atek.
34
. Eko waco be, Iyiike nu tuai? Gin kiko waco ne be, Rwot, bia ineni.
35
. Yesu oko kok.
36
. Iyudayan oko waco be, nenunu kite kame en oudo emaro kede Lasaro.
37
. Do mogo ikom gi oko yamo be, En bin ngat eyabo wang emuduk, likame oudo esobolo gengo icuo ni di likame eko to?
38
. Yesu bobo oko winyo apil icunye, di eko ot i ates. oudo etie abo, di koumo doge kede kidi.
39
. Yesu oko waco be, Kwanyunu kidi no tenge. Marita kede amime nga to, oko waco ne Yesu be, Rwot, nan do eromo doko ngwe, pien etieko nan ceng ongwon i ates.
40
. Yesu oko waco ne be, Likame Ango awaco ni be ka in iyei ibino neno deyo ka Rubanga?
41
. Dido gin kiko kwanyo kidi tenge ikakame oudo oyiko iye kom nga to. Yesu oko neno malo, di eko waco be, Papa, Ango apwoyi pien in iwinya.
42
. Doko Ango angeo be in nakanaka iwinya: do pi jo kame nataman tie cungo kan mio Ango ayamo kop gi me wek gin kiyei be in en kame i ora.
43
. Ingei en yamo kope go, en eko yamo kede dwan amalo be, Lasaro wok ooko kan.
44
. Di dano kame oudo oto, oko wok di kotweo cinge kede tiene kede igoen kame oyiko kede jo; doko nyime da oudo kotweo kede egoe. Yesu oko waco ne gi be, Gonye nu, di ikounu weke eoti.
45
. Dido Iyudayan atot kame bin obino but Maria, di kiko neno gikame Yesu otimo, gin kiko yei en.
46
. Do mogo ikom gi oko ot but Iparisayon, di kiko yamo ne gi gikame Yesu oudo otimo.
47
. Dido jotel me josasedoti kede Iparisayon oko lwongo cokere me kansulo, di ki yamo be otim nyo? pien icuo ni tie timo jame atot me aura.
48
. Kame wan owekenu aweka, jo dedede bino yei en, di jo me Roma kobino maano kabedo ni kede lobo wa.
49
. Di ngat acel ikom gi kame oudo nyinge Kayapa, en oudo ebedo ngatel adwong me josasedoti imwaka nono, oko waco ne gi be, Wun likame ingeunu gimoro akadi acel.
50
. Doko likame itamunu be etie gikame pire tek ne wan, be dano acel poore toi pi jo, me wek kur ateker dedede muducar.
51
. En oudo likame etie yamo kamano ipire kene, do bala kame en oudo ebedo kede ngatel adwong me josasedoti imwaka nono, en oudo etie murao be Yesu poore to pi ateker nono.
52
. Doko likame pi ateker nono kenekene, do kede pi coko karacel idwe ka Rubanga kame bin osarakin obukui.
53
. Aso cako ceng nono, gin kiko moko tam me neno be kineko Yesu.
54
. Pimano, Yesu do likame oko donyo nyutere but Iyudayan; do en eyai eko ot i adul kiyapiyapi kede tim, ibomba kame olwongo be Epuraimu, ikuno en eko mede bedo kede josiao mege.
55
. Ebago me Iyudayan me Yai oudo odoko iyapiyapi; jo atot oko yai ot Yerusalem di ceng me ebaga me yai pwodi, pi ot lonyere.
56
. Gin kiko donyo mono Yesu, di kipenyere ken gi ken gi, di kitie cungo i tempulo be, Benyo, itamunu be likame eyaro bino i ebaga?
57
. Pimano, jotel me josasedoti kede Iparisayon oudo otieko mino jo cikere be, ka dano moro ngeo kakame en oudo etie iye; poore enyut ne gin, me wek gin kimake.