¹ . Yei en obedo gikame cimo ne wa jamini kame ogeno pi udo, gikame moko be jamini kalikame wan onenunu tie. ² . Pien yei en kame bin omio Rubanga opwoyo joakwari wa. ³ . Pi yei wan ongeo be Rubanga ocweo piny kede kop mere, me wek gikame wan oneno nan kame ocweo bin likame kocweo ikom jamini kame neeno. ⁴ Pi yei Abel bin oko mino giayala but Rubanga kame ber kalamo me ka Kain, manoni oko mino oko pwone be en ebedo ngat opoore; pien Rubanga kikome omio ijura me bero me giayala mere nono, bed bala nan en eto do pwodi etie yamo. ⁵ . Pi yei omio bin oko tero Enoka, me wek kur ebei ito, Bin en likame eko udere, pien Rubanga oudo otere; pien di pwodi likame otere, en oudo eudo ijura be en oudo eyomo cuny Rubanga. ⁶ . Doko bedo abongo yei, likame tie ngatamoro kame twero yomo cunye, pien ngat kame bino but Rubanga, poore yei be en etie, doko da en kame eculo jo kame moe. ⁷ . Pi yei Nua kakame bin Rubanga okwenyaro en kede ikom gikame oudo pwodi likame oneeno, en eko bedo kede wor, di eko paano yee, pi lako kuo me jo ture; di bin oko mino kongolo ne lobo lung kop: en eko doko ngasikao poore kame oudo pi iyei ⁸ . Pi yei Aburaamu, kakame bin olwonge kede pi ot kabedo kame oudo koyaro mine bala iner mere, eko yei, eko ot di likame engeo kakame oudo etie ot iye. ⁹ . Pi yei en eko bedo ngakumbor ilobo kame oudo ociko pi mine, bedo i emai kede Isaka kede Yakobo, jo kame oudo nywako cikere noni kede en. ¹⁰ . Pien en oudo etie mono bomba kame tie iye acakini, kame ngagedo kede ngacake obedo Rubanga. ¹¹ . Yei en omio Sara da ikome oudo teko me yac, akadi bed bala mwaka mege me nywal oudo okato, pien en oudo eyei be ngat ociko kop no oudo obedo ngat ngolo kop i ateni. ¹² . Pimano, ibut dano acel ni, kame oudo cal bala dano oto, idwe atot bala acer me malo oko wok kibute, kede bala asinge kalikame marere kame tie idog nam. ¹³ . Jo gi dedede oko to di kitie iyei, di likame kiko udo cikere gi, do kineno ikakabor, di iko moko be kibino timere, di kiko tuco be gin kibedo jokumbor kede wele ilobo kan. ¹⁴ . Pien jo kame tuco kamano nyuto be gin kitie mono lobo kame obedo mer gi. ¹⁵ . Ateteni, kame koto gin oudo kitie paro pi lobo kame gin kiwok kiye, gin koto oudo itwero udo winyo me dok iye. ¹⁶ . Do nan do gin kitie kede mit me piny kame ber kalamo, kame tie imalo. Kakame Rubanga likame lewic bino mako pi lwonge be en ebedo Rubanga gi; pien en etieko iiko ne gi bomba ¹⁷ . Pi yei Aburaamu, kakame bin kotame kede pi mino Isaka wode bala giayala; en ngat kame bin ocikere, eko mino wode acel kenekene, ¹⁸ . en ngat kame oyamo kop ikome be, "Kibut Isaka en kame ikwae ni bino wok kiye. ¹⁹ . Di egeno be Rubanga oudo twero yaruno en, ikom jo to; kakame eda egame kede di ebedo bala apor. ²⁰ . Pi yei Isaka bin oko mino winyo but Yakobo kede Esau pi kop amako jamini kame oudo tie bino. ²¹ . Pi yei Yakobo, kakame oudo etie to kede, eko mino but awobe ka Yosepu, eko mino wor di eteno wie iwi ebela mere me komo. ²² . Pi yei Yosepu di do etie to, eko yamo kop ikom yai me idwe me Isirael Imisiri, di en eko ciko epone kame miero yiike kede. ²³ . Pi yei Musa, kakame onywale kede, jonywal mege oko kane pi dwete adek, pien gin oudo kineno be atin gi nono oudo obedo ngat ibus, da gin likame kiko bedo kede lworo ikom cik kame abaka oudo omoko. ²⁴ . Pi yei Musa ikare kame edongo kede, eko dagi be kur lwonge be wot anyar Parao; ²⁵ . En eko yero beo i itidil karacel kede jo ka Rubanga, akaka udo mulem kame dub opong iye pi kare acecek. ²⁶ . En eyei beo i ayet pi Krisito kame abar mere dwong kalamo jame abeco kame tie Misiri. Pien en oudo eketo gen mere icul me pwoc kame oudo eyaro udo. ²⁷ . Pi yei en eko caano bedo Misiri, di likame elworo gero me abaka: en eko kanyakino bala oudo eneno ngat kamelikame neeno. ²⁸ . Pi yei en eko gwoko ebaga me bwot di eko kikiro remo, me wek ngat koneko idwe kao kur mul gin ²⁹ . Pi yei gin kiko ngolo nam Akwar di kibeo kaka otuo: kakame jo me Misiri otamakino kede ngolo, gin kiko mwony ipii. ³⁰ . Pi yei apamai me Yeriko bin oko poto piny, ingei jo bin ririmo pi ceng Kanyaare. ³¹ . Pi yei malaya kame nyinge Rakab, likame oko neko kede jo kalikame oko yei , piento en bin eko gamo kede mulem jo koudo ooto begao kuno. ³² . Doko amed waco benyo? Pien kare likame twero yei na pi tatamo kop amako Gidioni, Barak, Samson kede me ka Joputa, me ka Daudi, kede Samuel kede me inabino ace. ³³ . Kame bin pi yei gin iko bwono abakai, kitimo poore, kiko udo gikame oudo ocikere pire, kiko gengo inguon ngamo dog gi. ³⁴ . Kineko lieto me mac apepe, kibwot kito me pala abit tunituni, bed bala gin oudo kigoro do kiko doko jo atek ika yi, iko mino isirikalen me jokumbor oringo. ³⁵ . Mon oko gamo joe gi koudo oto di kotieko yaruno gi, ace di kotidilo itek, di likame iyei be gony gi, me wek gin kiud iyarun kame ber kalamo. ³⁶ . Kede mogo obeo ican me atama alit, me ayet kede adao; kotweo gi kede irikoi, da di oko rwako gi i otkol: ³⁷ . Kodidipo gi kede kide, kobabaro kom gi idyere, kotamo gi, koneko gi kede pale abit tunituni; kiririmo piny di kingapo launi me romini kede me dyegi; di kibedo cone- acona, kotidilo gi, kotisilaro gi. ³⁸ . Jo kame oudo piny kan likame poore ne gi bedo iye; bin gin kibedo riro-arima iwi tim, imori, kede kakorokere kame oudo tie ilobo. ³⁹ . Jo nogi dedede, bed bala kopwoyo gi pi yei gi, do likame gin kiko udo gikame oudo Rubanga ocikere pi timo. ⁴⁰ . Pien Rubanga oudo otieko iiko gikame ber kalamo pir wa kianyim; tetekeny kur gin kiudi poore nono di wan obedo li iye.